Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 104: Yesu A Tlhelela eTilweni

Dyondzo 104: Yesu A Tlhelela eTilweni

Loko masiku ma ri karhi ma famba, Yesu u humelele eka valandzeri vakwe ko tala. Siku rin’wana u humelele eka vadyondzisiwa vakwe va kwalomu ka 500. Loko a humelela eka vona, xana wa swi tiva leswi Yesu a a vulavula na vona ha swona? Mfumo wa Xikwembu. Yehovha u rhumele Yesu emisaveni leswaku a ta dyondzisa hi Mfumo. Kutani u hambete a endla sweswo hambiloko se a pfuxiwile.

Yesu a tlhelela etilweni

Xana wa tsundzuka leswaku mfumo wa Xikwembu i yini? Ina, Mfumo i hulumendhe ya Xikwembu ya xiviri leyi nga etilweni, naswona Yesu hi yena Loyi Xikwembu xi n’wi hlawuleke leswaku a va hosi. Tanihi laha hi dyondzeke hakona, Yesu u kombise leswaku u ta va hosi leyinene ngopfu hi ku phamela lava nga ni ndlala, a horisa lava vabyaka ni ku pfuxa lava feke!

Kutani loko Yesu a ta va hosi etilweni ku ringana gidi ra malembe, xana misava yi ta va njhani? Ina, misava hinkwayo yi ta va paradeyisi yo saseka. A ku nge he vi na tinyimpi, vugevenga, vuvabyi hambi ku ri rifu. Ha swi tiva leswaku leswi i ntiyiso hikuva Xikwembu xi endle misava yi va paradeyisi leswaku vanhu va yi tsakela. Hi yona mhaka leyi xi endleke ntanga wa Edeni eku sunguleni. Nakambe Yesu u ta tiyiseka leswaku leswi Xikwembu xi lavaka leswaku swi endliwa, swa hetiseka.

Kutani ku fike nkarhi wa leswaku Yesu a tlhelela etilweni. Yesu u humelele eka vadyondzisiwa vakwe ku ringana masiku ya 40. Hikwalaho a va tiyiseka leswaku wa hanya nakambe. Kambe loko a nga si siya vadyondzisiwa vakwe u va byele a ku: ‘Tshamani eYerusalema kukondza mi kuma moya lowo kwetsima.’ Moya lowo kwetsima i matimba ya Xikwembu lama tirhaka, ku fana ni moya lowu hungaka, a wu ta pfuna valandzeri vakwe ku endla ku rhandza ka Xikwembu. Eku heteleleni, Yesu u te: ‘Mi ta chumayela hi mina ku ya fika etindhawini ta le kule swinene ta misava.’

Endzhaku ka loko Yesu a vule leswi, ku humelele nchumu wo hlamarisa. U sungule ku tlhandlukela etilweni, hilaha u n’wi vonaka hakona laha. Kutani papa ri n’wi fihlile a nga ha vonaki, naswona vadyondzisiwa a va ha n’wi vonanga nakambe. Yesu u tlhandlukele etilweni, naswona u sungule ku fuma valandzeri vakwe emisaveni a ri kwale.

Vadyondzisiwa va langute exibakabakeni

1 Vakorinto 15:3-8; Nhlavutelo 21:3, 4; Mintirho 1:1-11.



Swivutiso

  • I vadyondzisiwa vangani lava voneke Yesu hi siku rin’we, naswona u vulavule na vona hi yini?
  • Xana Mfumo wa Xikwembu i yini, naswona vutomi byi ta va njhani emisaveni loko Yesu a fuma a ri Hosi ku ringana gidi ra malembe?
  • Xana Yesu u humelele eka vadyondzisiwa vakwe ku ringana masiku mangani, kambe sweswi i nkarhi wa leswaku a endla yini?
  • Loko Yesu a nga si siya vadyondzisiwa vakwe, xana u va byele ku endla yini?
  • Ku humelela yini eka xifaniso lexi, naswona swi te njhani leswaku Yesu a nga ha vonaki?

Swivutiso swo engetela

  • Hlaya 1 Vakorinto 15:3-8.

    Ha yini muapostola Pawulo a vulavule hi ku tiyiseka malunghana ni ku pfuxiwa ka Yesu, naswona hi swihi swilo leswi Vakreste namuntlha va nga vulavulaka ha swona hi ku tiyiseka?

  • Hlaya Mintirho 1:1-11.

    Xana ntirho wo chumayela wu andze ku ya fika kwihi, hilaha Mintirho 1:8 yi swi hlamuseleke hakona ka ha ri emahlweni?