Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 103: A Nghena eNdlwini Leyi Lotleriweke

Dyondzo 103: A Nghena eNdlwini Leyi Lotleriweke

Endzhaku ka loko Petro na Yohane va suke esirheni laha ntsumbu wa Yesu a wu ri kona, Mariya u sele a ri swakwe. Hiloko a sungula ku rila. Kutani a korhama a hlometela esirheni, hilaha hi n’wi voneke hakona eka xifaniso lexi hundzeke. Kwalaho u vone tintsumi timbirhi! Ti n’wi vutise ti ku: ‘U rilela yini?’

Mariya u hlamule a ku: ‘Va teke Hosi yanga, naswona a ndzi tivi leswaku va yi veke kwihi.’ Hiloko Mariya a hundzuluka kutani a vona wanuna. Wanuna loyi u n’wi vutise a ku: ‘Xana u lava mani?’

Mariya a a anakanya leswaku wanuna loyi i mutirhi wa le ntangeni, nileswaku swi nga ha endleka a teke ntsumbu wa Yesu. Hiloko a ku: ‘Loko u n’wi tekile, ndzi byele leswaku u n’wi veke kwihi.’ Kambe entiyisweni, wanuna yoloye a ku ri Yesu. A a ambale miri lowu Mariya a nga wu tiviki. Kambe loko a n’wi vitana hi vito, hiloko Mariya a swi vona leswaku i Yesu. Kutani a tsutsuma a ya byela vadyondzisiwa a ku: ‘Ndzi vone Hosi!’

Hi ku famba ka siku, loko vadyondzisiwa vambirhi va ri karhi va ya eximutanini xa Emawusi, wanuna un’wana u fambisane na vona. Vadyondzisiwa a va ri ni gome hikuva Yesu a a dlayiwile. Kambe loko va ri karhi va famba, wanuna loyi u va hlamusele swilo swo tala swa le Bibeleni leswi va chaveleleke. Eku heteleleni, loko va wisile leswaku va ta dya, hiloko vadyondzisiwa va swi xiya leswaku wanuna loyi i Yesu. Kutani Yesu a nyamalala, naswona vadyondzisiwa volavo vambirhi va hatlisa va tlhelela eYerusalema va ya byela vaapostola van’wana malunghana na yena.

Loko swa ha ri tano, Yesu u tlhele a humelela eka Petro. Van’wana va tsake ngopfu loko va twa sweswo. Hiloko vadyondzisiwa lavambirhi va ya eYerusalema va ya kuma vaapostola. Va va hlamusela ndlela leyi Yesu a humeleleke ha yona eka vona endleleni. Kutani loko va ha hlamusela sweswo, xana wa wu tiva nchumu wo hlamarisa lowu humeleleke?

Languta xifaniso lexi. Yesu u humelele ekamareni rero, hambileswi nyangwa a yi lotleriwile. Vadyondzisiwa a va nga ha tikoti hi ku tsaka! Xana rero a ku nga ri siku ro tsakisa? Xana u nga hlayela minkarhi leyi Yesu a humeleleke ha yona eka valandzeri vakwe ku fikela sweswi? Xana u kuma minkarhi ya ntlhanu?

Yesu a humelela eka vadyondzisiwa

Muapostola Tomasi a a nga ri kona loko Yesu a humelela. Kutani vadyondzisiwa va n’wi byela va ku: ‘Hi vone Hosi!’ Kambe Tomasi u vule leswaku u ta tshemba loko a n’wi vonile Yesu hi yexe. Endzhaku ka masiku ya nhungu vadyondzisiwa nakambe a va ri endlwini leyi lotleriweke, Tomasi na yena a a ri kona hi nkarhi wolowo. Yesu u humelele hi xitshuketa endlwini yoleyo. Hiloko Tomasi a tshemba.

Yohane 20:11-29; Luka 24:13-43



Swivutiso

  • Mariya u te yini eka wanuna loyi a a anakanya leswaku i murimi, kambe i yini lexi endleke leswaku a swi xiya leswaku i Yesu hi xiviri?
  • Ku humelele yini eka vadyondzisiwa vambirhi lava a va ya eximutanini xa Emawusi?
  • Hi wihi nchumu wo hlamarisa lowu humeleleke loko vadyondzisiwa vambirhi va byela vaapostola leswaku va vone Yesu?
  • Yesu u humelele kangani eka valandzeri vakwe?
  • Tomasi u te yini loko a twa leswaku vadyondzisiwa va vone Hosi, naswona ku humelele yini endzhaku ka masiku ya nhungu?

Swivutiso swo engetela

  • Hlaya Yohane 20:11-29.

    Eka Yohane 20:23, xana Yesu a a vula leswaku vanhu va nyikiwe mpfumelelo wo rivalela swidyoho? Hlamusela.

  • Hlaya Luka 24:13-43.

    Xana hi nga tilunghisa njhani timbilu ta hina leswaku ti amukela tidyondzo ta Bibele?