Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 102: Yesu Wa Hanya

Dyondzo 102: Yesu Wa Hanya

Xana wa swi tiva leswaku wansati loyi ni vavanuna lavambirhi i vamani? Wansati loyi i Mariya Magadala, munghana wa Yesu. Kasi vavanuna lava ambaleke swo basa i tintsumi. Laha Mariya a hlometeleke kona i ndhawu leyi ntsumbu wa Yesu a wu vekiwe kona. Yi vuriwa sirha. Kambe sweswi ntsumbu a wa ha ri kona! Xana wu tekiwe hi mani? A hi voneni.

Tintsumi ti vulavula na Mariya wa Magadala

Endzhaku ka loko Yesu a file, vaprista va vule leswi eka Pilato: ‘Loko Yesu a ha hanya u vule leswaku u ta pfuxiwa endzhaku ka masiku manharhu. Kutani lerisa leswaku ku rindziwa sirha. Xisweswo vadyondzisiwa vakwe a va nge yivi ntsumbu wa yena kutani va vula leswaku u pfuxiwile!’ Pilato u byele vaprista leswaku va rhuma masocha ma ya rindza sirha.

Kambe hi matakuxa ya siku ra vunharhu endzhaku ka ku fa ka Yesu, ku fike ntsumi ya Yehovha. Yi suse ribye esirheni. Masocha a ma nga ha tikoti hi ku chava. Eku heteleleni, loko ma languta esirheni, ntsumbu a wu nga ha ri kona! Masocha man’wana ma ye emutini ma ya byela vaprista. Xana wa swi tiva leswaku vaprista lavo homboloka va endle yini? Va hakele masocha ya kona leswaku ma hemba. Vaprista va byele masocha va ku: ‘Vulani leswaku vadyondzisiwa vakwe va tile ni vusiku loko ha ha etlele kutani va yiva ntsumbu wa yena.’

Hi nkarhi wolowo, vavasati van’wana lava a va ri vanghana va Yesu va ye esirheni. Vona ndlela leyi va hlamaleke ha yona loko va nga n’wi kumi esirheni! Hi ku hatlisa ku humelele tintsumi timbirhi ti ambale tinguvu leto vangama. Ti vutisa ti ku: ‘Ha yini mi lava Yesu laha? U pfuxiwile. Tsutsumani mi ya byela vadyondzisiwa vakwe.’ Vavasati volavo va tsutsume ngopfu! Kambe loko va ri endleleni wanuna un’wana u va yimisile. Xana wa swi tiva leswaku a ku ri mani? A ku ri Yesu! U te: ‘Fambani mi ya byela vadyondzisiwa va mina.’

Loko vavasati va byela vadyondzisiwa leswaku Yesu wa hanya naswona va n’wi vonile, vadyondzisiwa a va nga va kholwi. Petro na Yohane va tsutsumele esirheni leswaku va ya tivonela hi voxe, kambe va kume ku nga ri na nchumu esirheni! Loko Petro na Yohane va famba, Mariya Magadala u sele kwalaho. Hi wona nkarhi lowu a nga hlometela esirheni kutani a vona tintsumi timbirhi.

Xana wa swi tiva leswaku ku humelele yini hi ntsumbu wa Yesu? Xikwembu xi endle leswaku wu nyamalala. Xikwembu a xi pfuxanga Yesu a ri ni miri wa nyama lowu a a ri na wona loko a nga si fa. Xi nyike Yesu miri lowuntshwa wa moya, wo fana ni lowu tintsumi leti nga etilweni ti nga na wona. Kambe leswaku a komba vadyondzisiwa vakwe leswaku wa hanya, Yesu a a ta ambala miri lowu vanhu a va ta kota ku wu vona, hilaha hi nga ta swi vona hakona.

Matewu 27:62-66; 28:1-15; Luka 24:1-12; Yohane 20:1-12



Swivutiso

  • I mani wansati loyi a nga laha xifanisweni, i vamani vavanuna lavambirhi naswona va le kwihi?
  • Ha yini Pilato a byele vaprista leswaku va rhumela masocha ma ya rindza sirha ra Yesu?
  • Ntsumi yi endle yini hi mixo wa siku ra vunharhu endzhaku ka loko Yesu a file, kambe vaprista va endle yini?
  • Ha yini vavasati van’wana va hlamarile loko va ya esirheni ra Yesu?
  • Ha yini Petro na Yohane va tsutsumele esirheni ra Yesu, naswona xana va kume yini?
  • Ku humelele yini hi ntsumbu wa Yesu, naswona xana u endle yini leswaku a komba vadyondzisiwa vakwe leswaku wa hanya?

Swivutiso swo engetela

  • Hlaya Matewu 27:62-66 na 28:1-15.

    Hi nkarhi wa ku pfuxiwa ka Yesu, xana vaprista lavakulu, Vafarisi ni vakulukumba va wu dyohele njhani moya lowo kwetsima?

  • Hlaya Luka 24:1-12.

    Xana mhaka ya ku pfuxiwa ka Yesu yi swi kombisa njhani leswaku Yehovha u languta vavasati tanihi timbhoni leti tshembekaka?

  • Hlaya Yohane 20:1-12.

    Xana Yohane 20:8, 9 yi hi pfuna njhani ku vona xilaveko xo lehisa mbilu loko hi nga ku twisisi kahle ku hetiseka ka vuprofeta byo karhi bya Bibele?

DYONDZA SWO TALA

Xana Yesu U Pfuxiwe A Ri Ni Miri Wa Nyama Kumbe Wa Moya?

Bibele yi vula leswaku Yesu u ‘hanyisiwe a ri wa moya,’ kutani vadyondzisiwa vakwe va n’wi vone njhani ni ku n’wi khumba endzhaku ka loko pfuxiwile?

Rifu Ra Yesu Ni Ku Pfuxiwa Ka Vafi—Leswi Swi Nga Vulaka Swona Eka Wena

Swilo swa tsevu leswi nga ntiyiso wa xisekelo leswi hlamuselaka ndlela leyi rifu ra munhu un’we ri nga tisaka ha yona vutomi eka vo tala.