Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 99: Ekamareni Ra Xithezi Xa Le Henhla

Dyondzo 99: Ekamareni Ra Xithezi Xa Le Henhla

Se i vusiku bya Ravumune, endzhaku ka masiku mambirhi. Yesu ni vaapostola vakwe va 12 va te ekamareni lerikulu ra le henhla leswaku va ta dya Paseka. Wanuna loyi u n’wi vonaka a famba, i Yudasi Iskariyota. U ya byela vaprista ndlela leyi va nga kumaka Yesu ha yona.

Xilalelo xa Hosi

Tolo wa kona, Yudasi u ye eka vona kutani a va vutisa a ku: ‘Xana mi ta ndzi nyika yini loko ndzo mi pfuna ku khoma Yesu?’ Va te: ‘Swingwece swa 30 swa silivhere.’ Kutani hi luya Yudasi u ya hlangana ni vavanuna lava leswaku a ya va komba Yesu. Swa vava hakunene, a swi tano ke?

Swakudya swa Paseka swi herile. Kambe Yesu se a a sungule swakudya swin’wana swo hlawuleka. U nyike vaapostola vakwe xinkwa kutani a ku: ‘Dyanani hikuva leswi swi vula miri wa mina lowu nga ta nyiketiwa hikwalaho ka n’wina.’ Hiloko a va nyika xinwelo xa vhinyo kutani a ku: ‘Nwanani hikuva leswi swi vula ngati ya mina leyi nga ta halatiwa hikwalaho ka n’wina.’ Bibele yi swi vitana ‘xilalelo xa Hosi.’

Vaisrayele va dye Paseka leswaku yi va tsundzuxa hi ta nkarhi lowu ntsumi ya Xikwembu yi ‘tluleke’ tiyindlu ta vona aEgipta, kambe yi dlaya mativula etindlwini ta Vaegipta. Kambe Yesu a a lava leswaku valandzeri vakwe va n’wi tsundzuka va tlhela va tsundzuka ni ndlela leyi a nyikeleke vutomi bya yena ha yona hikwalaho ka vona. Hi yona mhaka leyi a va byeleke leswaku va tlangela swakudya leswi swo hlawuleka lembe ni lembe.

Endzhaku ko dya Xilalelo xa Hosi, Yesu u byele vaapostola vakwe leswaku va tlhariha naswona va tiya eripfumelweni. Eku heteleleni va yimbelelele Xikwembu risimu kutani va famba. Se a ri sikurile swinene, kumbexana hi matakuxa. A hi voneni laha va yaka kona.

Matewu 26:14-30; Luka 22:1-39; Yohane tindzima 13 ku ya eka 17; 1 Vakorinto 11:20.



Swivutiso

  • Hilaha swi kombisiweke hakona laha xifanisweni, ha yini Yesu ni vaapostola vakwe va 12 va ri ekamareni lerikulu ra le henhla?
  • I mani wanuna loyi a fambaka, naswona u ya endla yini?
  • Hi swihi swakudya swo hlawuleka leswi Yesu a swi sunguleke endzhaku ka loko va hete ku dya Paseka?
  • Xana Paseka a yi va tsundzuxa yini Vaisrayele, naswona swakudya leswi swo hlawuleka swi va tsundzuxa yini valandzeri va Yesu?
  • Endzhaku ka Xilalelo xa Hosi, Yesu u va byele yini valandzeri vakwe, naswona va endle yini?

Swivutiso swo engetela

  • Hlaya Matewu 26:14-30.

    Xana Matewu 26:15 yi swi kombisa njhani leswaku Yudasi u xenge Yesu hi vomu?

    Hi swihi swikongomelo swimbirhi swa ku halatiwa ka ngati ya Yesu?

  • Hlaya Luka 22:1-39.

    Xana Sathana u nghene eka Yudasi hi ndlela yihi?

  • Hlaya Yohane 13:1-20.

    Loko hi languta mhaka leyi nga eka Yohane 13:2, xana hi nga veka Yudasi nandzu eka leswi a swi endleke, naswona malandza ya Xikwembu ma nga dyondza yini eka leswi?

    Hi yihi dyondzo leyikulu leyi Yesu a hi vekeleke yona?

  • Hlaya Yohane 17:1-26.

    Xana Yesu u va khongelele njhani valandzeri vakwe leswaku “va va un’we”?