Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 98: ENtshaveni Ya Mitlhwari

Dyondzo 98: ENtshaveni Ya Mitlhwari

Loyi i Yesu a ri eNtshaveni ya Mitlhwari. Vavanuna va mune lava a nga na vona i vaapostola vakwe. I Andriya ni makwavo Petro, na Yakobo ni makwavo Yohane. Kasi lahaya hi le tempeleni ya Xikwembu ya le Yerusalema.

Se ku hundze masiku mambirhi Yesu a nghene hi ximbhongolwana eYerusalema. Sweswi i Ravumbirhi. Nimixo, Yesu a a ri etempeleni. Kwalaho vaprista va ringete ku khoma Yesu va lava ku n’wi dlaya. Kambe a va chava ku endla leswi hikuva vanhu a va rhandza Yesu.

Yesu ni vaapostola va yena

Yesu u byele varhangeri lava va vukhongeri a ku: ‘N’wina tinyoka, vana va timhiri!’ Kutani Yesu u vule leswaku Xikwembu a xi ta va xupula hikwalaho ka swilo hinkwaswo swo biha leswi va swi endleke. Endzhaku ka sweswo, Yesu u ye eNtshaveni ya Mitlhwari naswona vaapostola lava va mune va sungule ku n’wi vutisa swivutiso. Xana wa swi tiva leswaku va vutise yini eka Yesu?

Vaapostola lava a va vutisa hi ta swilo swa nkarhi lowu taka. A va swi tiva leswaku Yesu u ta herisa vubihi hinkwabyo laha misaveni. Kambe a va lava ku tiva leswaku leswi swi ta humelela rini. Xana Yesu u ta ta rini a ta fuma tanihi Hosi?

Yesu a a swi tiva leswaku valandzeri vakwe va laha misaveni a va nga ta swi kota ku n’wi vona loko a vuya nakambe. U ta va a ri etilweni kutani a va nge swi koti ku n’wi vona kwalaho. Kutani Yesu u byele vaapostola vakwe swilo swin’wana leswi nga ta humelela emisaveni loko a fuma tanihi Hosi etilweni. Xana hi swihi swin’wana swa swilo leswi?

Yesu u vule leswaku a ku ta va ni tinyimpi letikulu, vanhu vo tala a va ta vabya ni ku sika hi ndlala, vugevenga a byi ta nyanya naswona a ku ta va ni ku tsekatseka ka misava lokukulu. Nakambe Yesu u vule leswaku mahungu lamanene ya mfumo wa Xikwembu a ma ta chumayeriwa emisaveni hinkwayo. Xana hi tshame hi swi vona swilo leswi swi humelela enkarhini wa hina? Ina! Kutani hi nga tiyiseka leswaku sweswi Yesu wa fuma etilweni. Ku nga ri khale u ta herisa vubihi hinkwabyo emisaveni.

Matewu 21:46; 23:1-39; 24:1-14; Marka 13:3-10.



Swivutiso

  • Exifanisweni lexi, Yesu hi wihi, naswona i vamani lava nga na yena?
  • Xana vaprista va ringete ku n’wi endla yini Yesu etempeleni, naswona u te yini eka vona?
  • Xana vaapostola va n’wi vutise yini Yesu?
  • Ha yini Yesu a byele vaapostola vakwe swin’wana swa swilo leswi nga ta humelela emisaveni loko a fuma a ri Hosi ematilweni?
  • Xana Yesu u te ku ta humelela yini loko a nga si herisa vubihi hinkwabyo emisaveni?

Swivutiso swo engetela

  • Hlaya Matewu 23:1-39.

    Hambileswi Matsalwa ma kombisaka leswaku swi nga ha fanela ku tirhisa swithopo, xana marito ya Yesu lama kumekaka eka Matewu 23:8-11 ma kombisa yini malunghana ni ku tirhisa swithopo leswi tlakusaka munhu evandlheni ra Vukreste?

    Xana Vafarisi va endle yini leswaku va sivela vanhu ku va Vakreste, naswona varhangeri va vukhongeri va swi endle njhani sweswo enkarhini wa hina?

  • Hlaya Matewu 24:1-14.

    Xana nkoka wa ku tiyisela wu kandziyisiwe njhani eka Matewu 24:13?

    Xana rito leri nge “emakumu” eka Matewu 24:13 ri vula yini?

  • Hlaya Marka 13:3-10.

    Xana marito lama nga eka Marka 13:10 ma swi kombisa njhani leswaku ntirho wo chumayela mahungu lamanene i wa xihatla, naswona marito ya Yesu ma fanele ma hi khumba njhani?

DYONDZA SWO TALA

XIHONDZO XO RINDZA

Xana Makumu Ma Tshinele?

Xiya swilo swa mune leswi kombisaka makumu lawa ku vulavuriwaka ha wona eBibeleni.