Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 97: Yesu A Ta Tanihi Hosi

Dyondzo 97: Yesu A Ta Tanihi Hosi

Endzhaku ko horisa vavanuna vambirhi lava feke mahlo lava a va tshamela ku kombela, Yesu u ye eximutanini xin’wana xa le kusuhi na Yerusalema. U byele vadyondzisiwa vakwe vambirhi, a ku: ‘Fambani mi ya eximutanini lexiya kutani mi ta kuma ximbhongolwana. Xi ntshunxeni kutani mi xi tisa eka mina.’

Loko ximbhongolwana xi tisiwile eka yena, Yesu u xi gadile. Hiloko a ya eYerusalema leyi a yi ri ekusuhi. Loko a tshinela ekusuhi ni muti, ntshungu lowukulu wu n’wi hlanganisile. Hiloko vanhu vo tala va hluvula tinguvu ta vona kutani va ti andlala endleleni. Van’wana va tseme marhavi ya mirhi ya micindzu. Na vona va ma andlale endleleni kutani va huwelela va ku: ‘Xikwembu a xi katekise hosi leyi taka hi vito ra Yehovha!’

Vanhu va amukela Yesu

Le Israyele, khale tihosi letintshwa a ti nghena eYerusalema hi ximbhongolwana ti tikombisa eka vanhu. Hi leswi Yesu a swi endleke. Kutani vanhu lava va kombise leswaku va lava Yesu a va hosi ya vona. Kambe a hi vanhu hinkwavo a va n’wi lava. Swi ve tano loko Yesu a ya etempeleni.

Loko a ri etempeleni, Yesu u hanyise vanhu lava feke mahlo ni swilema. Loko vana lavatsongo va vona leswi, va dzunise Yesu. Kambe sweswo swi hlundzukise vaprista naswona va byele Yesu va ku: ‘Xana wa swi twa leswi vana lava va swi vulaka?’

Yesu u va hlamule a ku: ‘Ina, ndza swi twa. Xana a mi si tshama mi hlaya eBibeleni laha yi nge: “Xikwembu xi ta humesa swidzuniso emilon’wini ya vana?”’ Kutani vana lava va hambeta va dzunisa hosi leyi vekiweke hi Xikwembu.

Hi lava ku fana ni vana volavo, a swi tano ke? Vanhu van’wana va nga ringeta ku hi tshikisa ku vulavula hi mfumo wa Xikwembu. Kambe hi ta hambeta hi byela van’wana hi swilo swo hlamarisa leswi Yesu a nga ta swi endlela vanhu.

A wu nga si fika nkarhi wa leswaku Yesu a sungula ku va hosi loko a ha ri emisaveni. Xana nkarhi wo tano wu ta fika rini? Vadyondzisiwa va Yesu a va lava ku tiva. Hi ta hlaya hi mhaka leyi exihlokweni lexi landzelaka.

Matewu 21:1-17; Yohane 12:12-16.



Swivutiso

  • Loko Yesu a fika eximutanini lexi nga ekusuhi na Yerusalema, xana u byele vadyondzisiwa vakwe leswaku va endla yini?
  • Exifanisweni lexi, ku humelele yini loko Yesu a tshinela emutini wa Yerusalema?
  • Xana vana va endle yini loko va vona Yesu a hanyisa vanhu lavo fe mahlo ni swigono?
  • Xana Yesu u te yini eka vaprista lava hlundzukeke?
  • Xana hi nga fana njhani ni vana lava dzuniseke Yesu?
  • Xana vadyondzisiwa a va lava ku tiva yini?

Swivutiso swo engetela

  • Hlaya Matewu 21:1-17.

    Xana ku nghena ka Yesu eYerusalema tanihi Hosi a ku hambane njhani ni ka tindhuna ta le nkarhini wa Rhoma leti hluleke enyimpini?

    Xana vana va nga dyondza yini eka vafana va Vaisrayele lava tshahiweke eka Pisalema 118 loko Yesu a nghena etempeleni?

  • Hlaya Yohane 12:12-16.

    Xana ku tirhisiwa ka marhavi ya mirhi ya mincindzu hi vanhu lava a va dzunisa Yesu a swi fanekisela yini?