Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 96: Yesu A Hanyisa Lava Vabyaka

Dyondzo 96: Yesu A Hanyisa Lava Vabyaka

Loko Yesu a ri karhi a rhendzeleka ni tiko, a a hanyisa lava vabyaka. Masingita lawa a ma endleke ma runguriwe eswimitanini ni le madorobeni hinkwawo. Kutani vanhu a va tisa vanhu lava lamaleke, lava nga voniki ni lava feke tindleve eka yena ni van’wana vo tala lava vabyaka. Naswona Yesu a a va hanyisa hinkwavo.

Se ku hundze malembe manharhu Yohane a khuvule Yesu. Kutani Yesu u byele vaapostola vakwe leswaku ku nga ri khale a a ta tlhandlukela eYerusalema, laha a nga ta dlayiwa kona ni ku tlhela a pfuxiwa eka lava feke. Enkarhini wolowo, Yesu u hambete a hanyisa lava vabyaka.

Yesu a hanyisa wansati la vabyaka

Siku rin’wana Yesu a a ri karhi a dyondzisa hi Savata. Savata a ku ri siku ra ku wisa ka Vayuda. Wansati loyi u n’wi vonaka laha a a vabya ngopfu. Se a ku hele malembe ya 18 a gunguvarile, a nga swi koti ku yima a ololoka. Hiloko Yesu a n’wi tlhandleka mavoko naswona u sungula ku ololoka. A va a hanyisiwile hi ndlela yoleyo!

Sweswo swi va karihise ngopfu varhangeri va vukhongeri. Un’wana wa vona u huwelele ntshungu a ku: ‘Ku ni masiku ya tsevu lawa hi faneleke hi tirha ha wona. Lawa hi wona masiku lawa munhu a faneleke ku ta ha wona a ta hanyisa, ku nga ri hi Savata!’

Kambe Yesu u hlamule a ku: ‘N’wina vakanganyisi. Un’wana ni un’wana wa n’wina wa yi ntshunxa hi Savata mbhongolo yakwe exivaleni kutani a ya yi nwisa mati. Kutani, xana wansati loyi wa xisiwana loyi a vabyeke malembe ya 18, a nga fanelanga a hanyisiwa hi Savata?’ Nhlamulo ya Yesu yi endle leswaku vakanganyisi lava va khomiwa hi tingana.

Endzhakunyana, Yesu ni vaapostola vakwe va kongome eYerusalema. Loko va ri ehandle ka muti wa Yeriko, vavanuna vambirhi lava feke mahlo, lava a va tshamela ku kombela, va swi twile leswaku Yesu wa hundza. Hiloko va huwelela va ku: ‘Yesu, hi pfune!’

Yesu u vitane vavanuna lava feke mahlo kutani a va vutisa a ku: ‘Xana mi lava leswaku ndzi mi endlela yini?’ Va te: ‘Hosi, pfula mahlo ya hina.’ Hiloko Yesu a khumba mahlo ya vona kutani xikan’we-kan’we va sungula ku vona! Xana wa swi tiva leswaku ha yini Yesu a endle masingita lawa hinkwawo yo hlamarisa? Hikuva a a rhandza vanhu naswona a a lava leswaku va va ni ripfumelo eka yena. Naswona hi nga tiyiseka leswaku loko se a ri Hosi, a nga kona munhu la nga ta tlhela a vabya emisaveni.

Matewu 15:30, 31; Luka 13:10-17; Matewu 20:29-34.



Swivutiso

  • Xana Yesu u endle yini loko a ri karhi a famba etikweni?
  • Endzhaku ka malembe manharhu Yesu a khuvuriwile, u va byele yini vadyondzisiwa vakwe?
  • I vamani vanhu lava nga laha xifanisweni, naswona Yesu u n’wi endlela yini wansati loyi?
  • Ha yini leswi Yesu a swi endleke swi karihise varhangeri va vukhongeri?
  • Loko Yesu ni vaapostola vakwe va ri ekusuhi ni le Yeriko, xana Yesu u va endlele yini vanhu vambirhi lavo fe mahlo lava a va kombela?
  • Ha yini Yesu a endle masingita?

Swivutiso swo engetela

  • Hlaya Matewu 15:30, 31.

    Hi xihi xikombiso xa matimba ya Yehovha lexi vonakeke ha Yesu, naswona leswi swi ku khumba njhani ku twisisa ka hina ka swilo leswi Yehovha a swi tshembiseke emisaveni leyintshwa?

  • Hlaya Luka 13:10-17.

    Xana mhaka ya leswaku Yesu u endle man’wana ya masingita yakwe yo hlamarisa hi Savata yi swi kombisa njhani leswaku u ta tisa ntshunxeko lowu fanaka eka Mfumo wakwe wa Gidi ra malembe?

  • Hlaya Matewu 20:29-34.

    Xana mhaka leyi yi swi kombisa njhani leswaku Yesu a a tinyika nkarhi wo pfuna vanhu, naswona hi nga dyondza yini eka swona?