Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 95: Ndlela Leyi Yesu A A Dyondzisa Ha Yona

Dyondzo 95: Ndlela Leyi Yesu A A Dyondzisa Ha Yona

Siku rin’wana Yesu u byele wanuna un’wana leswaku u fanele a rhandza muakelani wakwe. Wanuna loyi u vutise Yesu a ku: ‘I mani muakelani wa mina?’ Kahle-kahle, Yesu a a swi tiva leswi wanuna loyi a swi ehleketaka. Wanuna loyi a a ehleketa leswaku vaakelani vakwe i vanhu va rixaka ni va vukhongeri byakwe ntsena. Kutani a hi voneni leswi Yesu a n’wi byeleke swona.

Minkarhi yin’wana Yesu a a dyondzisa hi ku tirhisa xitori. U endle sweswo siku rero. U hlamusele xitori xa Muyuda ni Musamariya. Ana se hi dyondzile leswaku Vayuda vo tala a va venga Vasamariya. Kutani hi lexi xitori xa Yesu:

Siku rin’wana Muyuda a a rhelela hi pato a ya eYeriko. Hiloko a khomiwa hi swigevenga. Swi n’wi tekele mali yakwe swi tlhela swi n’wi bukutela kukondza a lava ku fa.

Endzhakunyana, ku te muprista wa Muyuda a ri karhi a famba hi ndlela yoleyo. Hiloko a vona wanuna la bukuteriweke. Xana u ehleketa leswaku u endle yini? Phela, u lo hundza hi le tlhelo lerin’wana ra pato, a famba. Ku tlhele ku ta munhu un’wana wa vukhongeri lebyi fanaka ni bya yena. A a ri Mulevhi. Xana u yimile? Doo, a nga yimanga a pfuna wanuna la biweke. Hi luya muprista na Mulevhi ekulenyana va ri karhi va rhelela hi pato.

Kambe languta munhu loyi a nga laha ni wanuna loyi a bukuteriweke. I Musamariya. Naswona u pfuna Muyuda. U n’wi chela murhi etimbangeni. Endzhaku ka sweswo, u teke Muyuda a n’wi yisa endhawini leyi a nga ta wisela eka yona, naswona a nga ta hola a tshame eka yona.

Musamariya lonene

Endzhaku ko hlamusela xitori xakwe, Yesu u byele wanuna la n’wi vutiseke a ku: ‘Xana u ehleketa leswaku i mani exikarhi ka vanhu lavanharhu loyi a vonakaka a ri muakelani eka wanuna la bukuteriweke? Xana a ku ri muprista, Mulevhi kumbe Musamariya?’

Wanuna loyi u hlamule a ku: ‘I Musamariya. U ve ni tintswalo eka wanuna la bukuteriweke.’

Yesu u te: ‘U tiyisile. Famba u ya endla tano eka van’wana.’

Xana a wu yi rhandzi ndlela leyi Yesu a a dyondzisa ha yona? Hi nga dyondza swilo swo tala swinene swa nkoka loko hi yingisa leswi Yesu a swi vuleke eBibeleni, a swi tano ke?

Luka 10:25-37.



Swivutiso

  • Hi xihi xivutiso lexi wanuna un’wana a xi vutiseke Yesu, naswona ha yini?
  • Xana Yesu a a tirhisa yini ku dyondzisa minkarhi yin’wana, naswona se hi dyondze yini hi Vayuda ni Vasamariya?
  • Eka xifaniso lexi Yesu a vulavuleke ha xona, ku endleke yini hi Muyuda loyi a a kongome eYeriko?
  • Ku humelele yini loko muprista wa Muyuda ni Mulevhi va famba hi ndlela yoleyo?
  • Exifanisweni lexi, i mani loyi a pfunaka Muyuda loyi a vavisekeke?
  • Endzhaku ka loko Yesu a hete ku hlamusela xifaniso lexi, hi xihi xivutiso lexi a xi vutiseke, naswona wanuna loyi u n’wi hlamule njhani?

Swivutiso swo engetela

  • Hlaya Luka 10:25-37.

    Ematshan’weni yo nyikela nhlamulo leyi kongomeke, xana Yesu u n’wi pfune njhani wanuna loyi a a ri ni vutivi bya Nawu leswaku a anakanyisisa hi mhaka leyi a va vulavula ha yona?

    Xana Yesu u swi tirhise njhani swikombiso leswaku a hlula xihlawuhlawu eka vayingiseri va yena?