Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 94: A A Rhandza Vana Lavatsongo

Dyondzo 94: A A Rhandza Vana Lavatsongo

Vona Yesu hi luya u vukarhe xifanyatana. Swi le rivaleni leswaku Yesu a a khathala hi vana lavatsongo. Vavanuna lava n’wi languteke a ku ri vaapostola vakwe. Xana Yesu u va byela yini? A hi voneni.

Yesu ni vadyondzisiwa vakwe a va ha ku vuya eriendzweni ro leha. Loko va ri endleleni, vaapostola a va phikizana. Kutani loko va fika, Yesu u va vutise a ku: ‘Xana a mi phikizana ha yini?’ Entiyisweni, Yesu a a swi tiva leswaku a va phikizana ha yini. Kambe a a vutisa xivutiso lexi ku vona loko vaapostola va ta n’wi byela leswi a va phikizana ha swona.

Yesu ni n’wana

Vaapostola a va n’wi hlamulanga hikuva endleleni a va phikizana hileswaku i mani lonkulu exikarhi ka vona. Vaapostola van’wana a va lava ku va va nkoka ku tlula van’wana. Xana Yesu a a ta va byerisa ku yini leswaku a swi kahle ku tiendla lonkulu?

U vitana xifanyatana kutani a xi yimisa emahlweni ka vona hinkwavo. Hiloko a byela vadyondzisiwa vakwe a ku: ‘Ndzi lava leswaku mi tiva leswi hakunene, Loko mi nga hundzuki kutani mi fana ni vana lavatsongo, a mi nge ngheni emfun’weni wa Xikwembu. Munhu lonkulu emfun’weni hi loyi a fanaka ni n’wana loyi.’ Xana wa swi tiva leswaku ha yini Yesu a vule leswi?

Ina, vana lavatsongo a va lweli ku lava ku kuma xikhundlha xa ku va lonkulu kumbe xa ku tekiwa va ri va nkoka ngopfu ku tlula van’wana. Kutani vaapostola va fanele va dyondza ku fana ni vana hi ndlela leyi naswona va nga phikizani hi ku lava ku va lavakulu kumbe ku va va nkoka.

Nakambe, ku ni minkarhi yin’wana laha Yesu a a kombisa ndlela leyi a a khathala ha yona hi vana lavatsongo. Endzhaku ka tin’hweti ti nga ri tingani vanhu van’wana va tise vana va vona leswaku va ta vona Yesu. Vaapostola va ringete ku va sivela. Kambe Yesu u byele vaapostola a ku: ‘Tshikani vana va ta eka mina, mi nga va siveli hikuva mfumo wa Xikwembu i wa vanhu lava fanaka na vona.’ Hiloko Yesu a teka vana a va vukarha kutani a va katekisa. Xana a swi tsakisi ku tiva leswaku Yesu a a rhandza vana lavatsongo?

Matewu 18:1-4; 19:13-15; Marka 9:33-37; 10:13-16.



Swivutiso

  • Xana vaapostola a va kanetana ha yini loko va ri karhi va vuya eriendzweni ra vona ro leha?
  • Ha yini Yesu a vitane n’wana kutani a n’wi yimisa exikarhi ka vaapostola?
  • Xana vaapostola va fanele va dyondza ku fana ni vana hi ndlela yihi?
  • Xana Yesu u swi kombise njhani leswaku u rhandza vana eka tin’hweti ti nga ri tingani leti hundzeke?

Swivutiso swo engetela

  • Hlaya Matewu 18:1-4.

    Ha yini Yesu a a tirhisa swifaniso loko a dyondzisa?

  • Hlaya Matewu 19:13-15.

    Hi tihi timfanelo leti vana va nga na tona leti hi faneleke hi ti tekelela loko hi lava ku kuma mikateko ya Mfumo?

  • Hlaya Marka 9:33-37.

    Xana Yesu u va dyondzise yini vadyondzisiwa vakwe malunghana ni ku lava swikhundlha?

  • Hlaya Marka 10:13-16.

    Xana Yesu a ngheneka ku fikela kwihi, naswona vakulu lava nga Vakreste va nga dyondza yini eka xikombiso xa yena?