Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 92: Yesu A Pfuxa Mufi

Dyondzo 92: Yesu A Pfuxa Mufi

Xinhwanyatana lexi u xi vonaka laha xi ni malembe ya 12. Yesu u xi khome hi voko naswona mana wa xona na tata wa xona va yime ekusuhi. Xana wa swi tiva leswaku ha yini va tsake swonghasi? A hi voneni.

Yesu a pfuxa n’wana wa Yayiro

Tata wa xinhwanyatana lexi i wanuna wa nkoka la vuriwaka Yayiro. Siku rin’wana n’wana wakwe wa nhwanyana u sungule ku vabya kutani a latiwa emubedweni. Kambe a a nga antswi. Vuvabyi bya yena byi nyanyile. Yayiro ni nsati a va nga dyi byi rhelela, hikuva a swi tikomba onge xinhwanyatana xa vona xi ta fa. Xi lo tswariwa xi ri xoxe. Hiloko Yayiro a famba a ya lava Yesu. A a twe hi ta masingita lawa Yesu a a ma endla.

Loko Yayiro a kuma Yesu, a ku ri ni ntshungu lowukulu lowu n’wi rhendzeleke. Kambe Yayiro u manyukute exikarhi ka ntshungu kutani a fika a nkhinsama emilengeni ya Yesu. A ku: ‘N’wana wa mina wa nhwanyana u vabya ngopfu.’ Hiloko a kombela a ku: ‘Ndzi kombela u famba na mina u ya n’wi hanyisa.’ Yesu u vule leswaku u ta ta.

Loko va ri eku fambeni, ntshungu a wu susumetana wu tshinela ekusuhi na yena. Hiloko Yesu a yima. Kutani a vutisa a ku: ‘I mani la nga ndzi khumba?’ Yesu u twe matimba ma huma eka yena hiloko a swi lemuka leswaku ku ni munhu la n’wi khumbeke. Kambe i mani? I wansati loyi a a vabya swinene ku ringana malembe ya 12. U tile a ta khumba tinguvu ta Yesu kutani a hanyisiwa!

Leswi swi tiyise Yayiro nhlana, hikuva a a vona ndlela leyi swi olovaka ha yona eka Yesu ku hanyisa munhu un’wana. Kambe, hiloko ku fika murhumiwa. A byela Yayiro a ku: ‘U nga ha n’wi karhati Yesu. N’wana wa wena u file.’ Yesu u yi twile mhaka leyi hiloko a byela Yayiro a ku: ‘U nga chavi, u ta hanya.’

Loko va fika endlwini ya Yayiro, vanhu a va ri eku rileni hi xiviti lexikulu. Kambe Yesu u te: ‘Mi nga rili. N’wana a nga fanga. U lo etlela.’ Hiloko va hleka ni ku hlekula Yesu, hikuva a va swi tiva leswaku n’wana u file.

Hiloko Yesu a teka tata wa xinhwanyatana ni vaapostola vakwe vanharhu a nghena na vona endlwini leyi n’wana loyi a etleleke eka yona. U n’wi khome hi voko kutani a ku: ‘Pfuka!’ Hiloko n’wana a pfuka, hilaha u swi vonaka hakona laha. Kutani a pfuka a sungula ku famba-famba! Hi swona leswi endlaka leswaku mana wakwe ni tata wakwe va tsaka ngopfu.

Loyi a hi munhu wo sungula ku va a pfuxiwa hi Yesu eku feni. Munhu wo sungula loyi Bibele yi hi byelaka ha yena a ku ri n’wana wa jaha wa noni ya le mutini wa Nayini. Endzhakunyana, Yesu u tlhele a pfuxa Lazaro loyi a a file, makwavo wa Mariya na Marta. Loko Yesu a fuma tanihi hosi leyi vekiweke hi Xikwembu, u ta pfuxa vanhu vo tala swinene. Xana sweswo a swi nge hi tsakisi?

Luka 8:40-56; 7:11-17; Yohane 11:17-44.



Swivutiso

  • I mani tata wa xinhwanyatana lexi nga laha xifanisweni, naswona ha yini tatana loyi ni nsati wakwe va karhatekile swinene?
  • Xana Yayiro u endle yini loko a kuma Yesu?
  • Ku humelele yini loko Yesu a ya ekaya ra Yayiro, naswona hi rihi rungula leri Yayiro a ri kumeke loko a ha ri endleleni?
  • Ha yini vanhu lava a va ri ekaya ka Yayiro va hleke Yesu?
  • Endzhaku ko teka vaapostola vanharhu ni vatswari va n’wana a nghena na vona ekamareni ra xinhwanyatana lexi, xana Yesu u endle yini?
  • I vamani van’wana lava Yesu a va pfuxeke eku feni, naswona leswi swi kombisa yini?

Swivutiso swo engetela

  • Hlaya Luka 8:40-56.

    Xana Yesu u wu kombise njhani ntwela-vusiwana ni ku anakanyela eka wansati loyi a a khomiwe hi vuvabyi byo khuluka ngati, naswona vakulu lava nga Vakreste namuntlha va nga dyondza yini emhakeni leyi?

  • Hlaya Luka 7:11-17.

    Ha yini lava feriweke hi varhandziwa va vona yi va chavelela swinene ndlela leyi Yesu a anguleke ha yona eka noni ya le Nayini?

  • Hlaya Yohane 11:17-44.

    Yesu u swi kombise njhani leswaku i swa ntumbuluko ku rila munhu la feke?