Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 91: Yesu A Dyondzisa eNtshaveni

Dyondzo 91: Yesu A Dyondzisa eNtshaveni

Hi luya Yesu a tshameke lahaya. A a dyondzisa vanhu volavo hinkwavo entshaveni ya Galeliya. Lava tshameke ekusuhi na yena a ku ri vadyondzisiwa vakwe. A a hlawule va 12 leswaku va va vaapostola. Vaapostola i vadyondzisiwa va Yesu vo hlawuleka. Xana wa ma tiva mavito ya vona?

Yesu a ri karhi a dyondzisa

A ku ri na Simoni Petro ni makwavo Andriya. Nakambe a ku ri na Yakobo na Yohane, lava na vona a va ri vana va munhu. A ku ri ni muapostola un’wana loyi na yena a vitaniwaka Yakobo naswona un’wana na yena a a vuriwa Simoni. A ku ri ni vaapostola vambirhi lava vuriwaka Yudasi. Un’wana a ku ri Yudasi Iskariyota kasi Yudasi lowun’wana a a vitaniwa Tadiya. Kutani a ku ri na Filipi na Nataniyele (loyi nakambe a a vuriwa Bartolomi) na Matewu na Tomasi.

Loko a vuyile eSamariya, Yesu u sungule ku chumayela ro sungula a ku: ‘Mfumo wa matilo wu tshinele.’ Xana wa wu tiva mfumo wolowo? I hulumendhe ya xiviri ya Xikwembu. Yesu i hosi ya yona. U ta fuma a ri etilweni naswona u ta tisa ku rhula emisaveni. Misava hinkwayo yi ta endliwa paradeyisi yo saseka hi mfumo wa Xikwembu.

Laha Yesu a a dyondzisa vanhu hi ta mfumo wolowo. U hlamusele a ku: ‘Mi fanele mi khongela hi ndlela leyi. Tata wa hina la nge matilweni, vito ra wena a ri xiximiwe. Mfumo wa wena a wu te. Ku rhandza ka wena a ku endliwe emisaveni ku fana ni le tilweni.’ Vanhu vo tala va xi vitana ‘Xikhongelo xa Hosi.’ Van’wana va ri i xikhongelo xa ‘Tata wa Hina.’ Xana wa xi tiva xikhongelo xexo hinkwaxo?

Nakambe Yesu u dyondzise vanhu ndlela leyi va faneleke ku khoma van’wana ha yona. U te: ‘Endlelani van’wana leswi mi lavaka va mi endlela swona.’ Xana a wu swi tsakeli loko vanhu van’wana va ku khoma hi ndlela ya tintswalo? Hikwalaho, Yesu u vula leswaku hi fanele hi khoma vanhu van’wana hi tintswalo. Xana a swi nge tsakisi eparadeyisini ya laha misaveni loko munhu un’wana ni un’wana a endla tano?

Matewu tindzima 5 ku ya eka 7; 10:1-4.



Swivutiso

  • Laha xifanisweni, xana Yesu u dyondzisa kwihi, naswona i vamani lava tshameke ekusuhi na yena?
  • I vamani vaapostola va 12?
  • Hi wihi Mfumo lowu Yesu a dyondziseke ha wona?
  • Yesu u dyondzise vanhu leswaku va khongelela yini?
  • Yesu u vule leswaku vanhu va fanele va khomana njhani?

Swivutiso swo engetela

  • Hlaya Matewu 5:1-12.

    Hi nga swi kombisa njhani leswaku ha khathala hi xilaveko xa hina xa moya?

  • Hlaya Matewu 5:21-26.

    Xana Matewu 5:23, 24 yi swi kandziyisa njhani leswaku vuxaka bya hina ni vamakwerhu byi khumba vuxaka bya hina na Yehovha?

  • Hlaya Matewu 6:1-8.

    Hi tihi tindlela ta ku tiendla mululami leti Vakreste va faneleke va ti papalata?

  • Hlaya Matewu 6:25-34.

    Yesu u dyondzise yini malunghana ni ku tshemba Yehovha leswaku a hi phamela hi tlhelo ra nyama?

  • Hlaya Matewu 7:1-11.

    Xana xifaniso xo olova lexi kumekaka eka Matewu 7:5 xi hi dyondzisa yini?

DYONDZA SWO TALA

Loko U Landzela Xikombiso Xa Yesu Ni Tidyondzo Takwe U Nga Va Ni Vutomi Lebyi Nga Ni Xikongomelo

Swikombiso swa vutomi bya xiviri swi kombisa ndlela leyi ku tirhisa marito lawa Yesu a ma vuleke eDyondzweni yakwe ya le Ntshaveni ma nga hi pfunaka leswaku hi va ni vutomi lebyi nga ni xikongomelo.