Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 90: A Ri Ni Wansati eXihlobyeni

Dyondzo 90: A Ri Ni Wansati eXihlobyeni

Yesu u fike a wisa exihlobyeni xa le Samariya. Vadyondzisiwa vakwe va ye emutini va ya xava swakudya. Wansati loyi Yesu a vulavulaka na yena u te eku keni ka mati. U byele wansati loyi a ku: ‘Ndzi kombela mati.’

Yesu a ri karhi a vulavula ni wansati wa Musamariya

Mhaka leyi yi hlamarise wansati yoloye swinene. Xana wa swi tiva leswaku ha yini? Hikuva Yesu i Muyuda kasi yena i Musamariya. Naswona Vayuda vo tala a va nga va rhandzi Vasamariya. A va nga va vulavurisi! Kambe Yesu a a rhandza vanhu va tinxaka hinkwato. Hiloko a ku: ‘Loko a wu n’wi tiva loyi a kombelaka mati eka wena, a wu ta va u kombele eka yena, a a ta ku nyika mati lama nyikaka vutomi.’

Hiloko wansati yoloye a ku: ‘Nkulukumba, xihlovo lexi xi entile naswona a wu na rona khuwana. Xana u ta ma kuma kwihi mati lama nyikaka vutomi?’

Yesu u hlamusele a ku: ‘Loko u nwa mati lama humaka exihlobyeni lexi u ta tlhela u twa torha. Kambe mati lawa ndzi nga ta hanana ha wona ma endla munhu a hanya hilaha ku nga heriki.’

Kutani wansati a ku: ‘Nkulukumba, ndzi nyike mati ya kona! Kutani a ndzi nge he tlheli ndzi twa torha. Naswona a ndzi nge he ti laha ndzi ta ka mati.’

Wansati loyi a a ehleketa leswaku Yesu u vulavula hi mati ya xiviri. Kambe a a vulavula hi ntiyiso wa Xikwembu ni mfumo wa xona. Ntiyiso lowu wu fana ni mati lama nyikaka vutomi. Wu nga nyika munhu vutomi lebyi nga heriki.

Hiloko Yesu a byela wansati loyi a ku: ‘Famba, u ya vitana nuna wa wena u vuya na yena laha.’

Wansati loyi u hlamule a ku: ‘A ndzi na nuna.’

Yesu u te: ‘U hlamule kahle. Kambe a wu ri ni vanuna va ntlhanu naswona wanuna loyi u tshamaka na yena sweswi a hi nuna wa wena.’

Wansati loyi u hlamarile, hikuva hinkwaswo leswi a swi ri ntiyiso. Xana Yesu a a yi tivela kwihi mhaka leyi? Phela, Yesu a a tiva mhaka leyi hileswi a a ri Loyi a Tshembisiweke, la rhumiweke hi Xikwembu kutani Xikwembu xi n’wi nyike rungula leri. Hiloko vadyondzisiwa va Yesu va vuya naswona a va hlamarile hileswi a a vulavula ni wansati wa Musamariya.

Xana hi dyondza yini emhakeni leyi? Hi dyondza leswaku Yesu u ni tintswalo eka vanhu va tinxaka hinkwato. Kutani na hina hi fanele hi va tano. A hi fanelanga hi ehleketa leswaku vanhu van’wana va bihile hileswi ntsena va nga va rixaka rin’wana. Yesu u lava leswaku vanhu hinkwavo va tiva ntiyiso lowu yisaka evuton’wini lebyi nga heriki. Na hina hi fanele hi lava ku pfuna vanhu leswaku va dyondza ntiyiso.

Yohane 4:5-43; 17:3.



Swivutiso

  • Ha yini Yesu a wisa ekusuhi ni xihlovo eSamariya, naswona u n’wi byela yini wansati loyi a a ri kwalaho?
  • Ha yini wansati loyi a hlamarile, xana Yesu u te yini eka yena naswona ha yini?
  • Xana wansati a a ehleketa leswaku Yesu u vulavula hi mati ya njhani, naswona hi wahi mati lawa Yesu kahle-kahle a a vulavula ha wona?
  • Ha yini wansati loyi a hlamarisiwe hi leswi Yesu a swi tivaka ha yena, naswona Yesu u swi tivise ku yini leswi?
  • Hi dyondza yini eka mhaka ya wansati wa le xihlobyeni?

Swivutiso swo engetela

  • Hlaya Yohane 4:5-43.

    Hi ku landza xikombiso xa Yesu, xana hi fanele hi va languta njhani vanhu va tinxaka tin’wana?

    Xana munhu loyi a vaka mudyondzisiwa wa Yesu u vuyeriwa njhani hi tlhelo ra moya?

    Xana hi nga ku kombisa njhani ku tlangela loku fanaka ni ka wansati wa Musamariya, loyi a hisekeleke ku byela van’wana leswi a swi dyondzeke?