Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 89: Yesu A Basisa Tempele

Dyondzo 89: Yesu A Basisa Tempele

Yesu u vonaka a karihe hakunene laha, a swi tano ke? Xana wa swi tiva leswaku i yini xi n’wi karihiseke ngopfu? Hikwalaho ka leswi vavanuna lava, lava nga etempeleni ya Xikwembu eYerusalema a va ri ni makwanga. A va ringeta ku endla mali yo tala hi vanhu lava teke laha ku ta gandzela Xikwembu.

Yesu a ri karhi a wisetela matafula lama nga ni mali

Xana wa swi vona swinkuzana ni tinyimpfu ni matuva lawa hinkwawo? Phela, vavanuna lava a va xavisa swifuwo leswi etempeleni. Xana wa swi tiva leswaku ha yini? Hileswi Vaisrayele a va lava swifuwo ni swinyenyana leswaku va endlela Xikwembu magandzelo.

Nawu wa Xikwembu a wu vula leswaku loko Muisrayele a dyohile, a a fanele a endlela Xikwembu gandzelo. Nakambe a ku ri ni minkarhi yin’wana leyi Vaisrayele a va fanele va endla magandzelo. Kambe, xana Muisrayele a a ta swi kuma kwihi swinyenyana kumbe swifuwo swo endlela Xikwembu gandzelo ha swona?

Vaisrayele van’wana a va ri ni swinyenyana ni swifuwo. Kutani a va ta nyikela ha swona. Kambe Vaisrayele vo tala a va nga ri na swifuwo kumbe swinyenyana. Naswona van’wana a va tshama ekule ngopfu ni le Yerusalema lerova a va nga ta swi kota ku ta ni swifuwo swa vona etempeleni. Hikwalaho vanhu a va fika laha va xava swifuwo kumbe swinyenyana leswi a va swi lava. Kambe vavanuna lava a va swi durhisa ngopfu swifuwo leswi a va swi xavisa. A va rhoba vanhu. Tlhandlakambirhi, a va nga fanelanga va xavisela etempeleni ya Xikwembu.

Hi swona leswi karihiseke Yesu. Hikwalaho u menule matafula ya vavanuna lava ni ku hangalasa mali ya vona. U tlhele a endla ximoko hi tintambhu kutani a humesa swifuwo sweswo hinkwaswo etempeleni. U lerise vavanuna lava a va xavisa matuva, a ku: ‘Ma humeseni laha! Tshikani ku endla yindlu ya Tatana yi va yindlu yo bindzula eka yona.’

Van’wana va valandzeri va Yesu a va ri na yena kwale tempeleni eYerusalema. Va hlamarile ku vona leswi Yesu a a swi endla. Hiloko va tsundzuka marito ya le Bibeleni lama vulavulaka hi N’wana wa Xikwembu, lama nge: ‘U ta dyiwa hi ku hisekela yindlu ya Xikwembu.’

Loko Yesu a ri eYerusalema enkhubyeni wa Paseka, u endle masingita yo tala. Endzhaku ka sweswo, Yesu u suke eYudiya kutani a sungula riendzo rakwe ro tlhelela eGaleliya. Kambe loko a ri endleleni, u hundze hi le mugangeni wa Samariya. A hi voneni leswi humeleleke kwalaho.

Yohane 2:13-25; 4:3, 4.



Swivutiso

  • Ha yini ku xavisiwa swifuwo etempeleni?
  • I yini leswi endlaka leswaku Yesu a hlundzuka?
  • Hilaha u nga swi vonaka hakona laha xifanisweni, xana Yesu u endla yini naswona u va lerisa ku endla yini vavanuna lava xavisaka matuva?
  • Loko valandzeri va Yesu va vona leswi a swi endlaka, swi va tsundzuxe yini?
  • Hi xihi xifundzha lexi Yesu a hundzeke eka xona loko a tlhelela eGaleliya?

Xivutiso xo engetela

  • Hlaya Yohane 2:13-25.

    Loko hi kambisisa mhaka ya Yesu ya ku hlundzukela vacincisi va mali lava a va ri etempeleni, xana hi rihi langutelo lerinene malunghana ni ku endla bindzu eHolweni ya Mfumo?

DYONDZA SWO TALA

Yesu A Basisa Tempele

Hlaya rungula ra Bibele kutani u kuma swilo swa mune leswi hoxeke eka xifaniso lexi.