Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 88: Yohane A Khuvula Yesu

Dyondzo 88: Yohane A Khuvula Yesu

Vona tuva leri phatsamaka enhlokweni ya wanuna loyi. Wanuna loyi i Yesu. Hi nkarhi lowu a a ri ni kwalomu ka malembe ya 30. Naswona wanuna loyi a nga na yena i Yohane. Ana se hi dyondze swo karhi hi ta yena. Xana wa ha tsundzuka loko Mariya a endzele xaka rakwe Elizabeta kutani ricece leri a ri ri ekhwirini ra Elizabeta ri tlula-tlula hi ku tsaka? Ricece ra kona leri a ri nga si velekiwa a ku ri Yohane. Kambe, xana Yohane na Yesu va endla yini?

Yesu loko a ri karhi a khuvuriwa

Yohane wa ha ku nyuperisa Yesu ematini ya Nambu wa Yordani. Leyi i ndlela leyi munhu a khuvuriwaka ha yona. U sungula hi ku nyuperisiwa ematini kutani a humesiwa. Leswi Yohane a a khuvula vanhu, a a vuriwa Yohane lowo Khuvula. Kambe, ha yini Yohane a khuvule Yesu?

Entiyisweni, Yohane u endle tano hikwalaho ka leswi Yesu a teke kutani a kombela Yohane leswaku a n’wi khuvula. Yohane a a khuvula vanhu lava lavaka ku kombisa leswaku va tisola eka swilo swo biha leswi va swi endleke. Kambe, xana Yesu u tshame a endla nchumu wo karhi lowu a nga tisolaka ha wona? Doo, Yesu a a nga si tshama a endla tano hikuva i N’wana wa Xikwembu la humaka etilweni. Kutani u kombele Yohane leswaku a n’wi khuvula hikwalaho ka xivangelo xin’wana. A hi voneni xivangelo xa kona.

Yesu a a ri muvatli loko a nga si ta eka Yohane. Muvatli i munhu la vatlaka swilo hi mapulanga, swo tanihi matafula ni switulu ni mabenci. Yosefa, nuna wa Mariya a a ri muvatli kutani u dyondzise na Yesu ku va muvatli. Kambe Yehovha a nga rhumelanga N’wana wakwe emisaveni leswaku a ta va muvatli. U n’wi rhumele ku ta endla ntirho wo hlawuleka naswona nkarhi a wu fikile wa leswaku Yesu a sungula ntirho wa kona. Leswaku a kombisa leswaku nkarhi a wu fikile wo endla ku rhandza ka Tata wakwe, Yesu u kombele Yohane leswaku a n’wi khuvula. Xana Xikwembu xa swi tsakela sweswo?

Ina, xa swi tsakela, hikuva loko Yesu a huma ematini, rito leri humaka etilweni ri te: ‘Loyi i N’wananga, loyi ndzi n’wi amukeleke.’ Nakambe, a swi vonaka onge matilo ma pfulekile kutani tuva leri ri xikele eka Yesu. Kambe a ku nga ri tuva ra xiviri. A ri vonaka onge i tuva. A ku ri moya lowo kwetsima wa Xikwembu.

Hi nkarhi wolowo Yesu a a ri ni swo tala swo anakanya ha swona, kutani u ye endhawini leyi nga riki na munhu ku ringana masiku ya 40. Loko a ri kwalaho, Sathana u n’wi endzerile. Sathana u ringete kanharhu ku endla leswaku Yesu a tlula milawu ya Xikwembu. Kambe Yesu a nga yi tlulanga.

Endzhaku ka sweswo, Yesu u tlherile kutani a ya hlangana ni vavanuna van’wana lava veke valandzeri kumbe vadyondzisiwa vakwe vo sungula. Mavito man’wana ya vona i Andriya, Petro (loyi nakambe a vuriwaka Simoni), Filipi na Nataniyele (loyi nakambe a vuriwaka Bartolomi). Yesu ni vadyondzisiwa lava lavantshwa va suke va kongoma emugangeni wa Galeliya. Loko va ri eGaleliya va fike va wisa eximutanini xa ka va Nataniyele lexi vuriwaka Kana. Kwalaho Yesu u ye enkhubyeni lowukulu wa vukati kutani a endla singita rakwe ro sungula. Xana wa ri tiva singita ra kona? U hundzule mati ma va vhinyo.

Matewu 3:13-17; 4:1-11; 13:55; Marka 6:3; Yohane 1:29-51; 2:1-12.



Swivutiso

  • Xana i vamani vavanuna vambirhi lava nga laha xifanisweni?
  • Xana munhu u khuvuriwa njhani?
  • Xana Yohane hi ntolovelo a a khuvula vamani?
  • Hi xihi xivangelo xo hlawuleka lexi endleke leswaku Yesu a kombela leswaku Yohane a n’wi khuvula?
  • Xana Xikwembu xi swi kombise njhani leswaku xi tsakile hileswi Yesu a khuvuriweke?
  • Xana ku humelele yini loko Yesu a ri swakwe masiku ya 40?
  • I vamani van’wana va valandzeri kumbe vadyondzisiwa va Yesu vo sungula, naswona hi rihi singita ra yena ro sungula?

Swivutiso swo engetela

  • Hlaya Matewu 3:13-17.

    Hi wihi ntila lowu Yesu a wu vekeleke vadyondzisiwa vakwe malunghana ni ku khuvuriwa?

  • Hlaya Matewu 4:1-11.

    Xana ku tirhisa ka Yesu Matsalwa hi vutlhari swi hi khutaza njhani leswaku hi dyondza Bibele nkarhi ni nkarhi?

  • Hlaya Yohane 1:29-51.

    Xana Yohane Mukhuvuri a a va kongomisa eka mani vadyondzisiwa vakwe, naswona hi nga n’wi tekelela njhani namuntlha?

  • Hlaya Yohane 2:1-12.

    Xana singita ra Yesu ro sungula ri swi kombisa njhani leswaku Yehovha a nga ma tsoni swilo leswinene malandza Yakwe?