Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 87: Yesu A Ha Ri Ntsongo eTempeleni

Dyondzo 87: Yesu A Ha Ri Ntsongo eTempeleni

Languta xifanyatana lexi vulavulaka ni vakulukumba lava. I vadyondzisi etempeleni ya Xikwembu ya le Yerusalema. Naswona xifanyatana lexi i Yesu. Se a a kurilenyana. Hi nkarhi lowu a a ri ni malembe ya 12.

Vadyondzisi a va hlamale ngopfu hileswi Yesu a a tiva swo tala hi Xikwembu ni hi swilo leswi tsariweke eBibeleni. Kambe ha yini Yosefa na Mariya va nga ri kona laha? Va kwihi? A hi kambisiseni.

Yesu loko a ha ri ntsongo a ri karhi a vulavula ni vadyondzisi

Lembe ni lembe Yosefa a a tisa ndyangu wakwe eYerusalema ku ta tlangela nkhuvo wo hlawuleka lowu vuriwaka Paseka. A ku ri riendzo ro leha swinene ku suka eNazareta ku ya eYerusalema. A ku ri hava munhu loyi a a ri ni movha naswona switimela a swi nga ri kona. Vanhu vo tala a va famba hi milenge naswona a swi va teka masiku manharhu ku ya fika eYerusalema.

Hi nkarhi wolowo Yosefa a a ri ni ndyangu lowukulu. Naswona a ku ri ni tindzisana ta Yesu ta vafana ni vanhwanyana leti a a fanele a ti khathalela. Kutani lembe rero Yosefa na Mariya a va fambe ni vana va vona eriendzweni ro leha va muka eNazareta. A va anakanya leswaku Yesu u le xikarhi ka lava va fambaka na vona. Kambe loko va fika va yima kun’wana loko dyambu ri pela, Yesu a a nga ri kona kwalaho. Va sungule ku n’wi lava eka maxaka ni vanghana, kambe a va n’wi kumanga! Hiloko va tlhelela eYerusalema va ya n’wi lava kona.

Eku heteleleni va kume Yesu laha a ri ni vadyondzisi lava. A a va yingiserile ni ku va vutisa swivutiso. Kutani vanhu hinkwavo a va hlamele ndlela leyi Yesu a a tlharihe ha yona. Kambe Mariya u n’wi vutise a ku: ‘N’wananga, ha yini u hi endle leswi? Mina na tata wa wena a hi ri karhi hi vilela hi ri eku ku laveni.’

Yesu u hlamule a ku: ‘A mi ndzi lavela yini? Xana a mi swi tivi leswaku ndzi fanele ku va endlwini ya Tatana?’

Ina, Yesu a a rhandza ku va endhawini leyi a nga ta dyondza hi ta Xikwembu eka yona. Xana a hi yona ndlela leyi na hina hi faneleke ku titwa ha yona? Le kaya eNazareta, Yesu a a ya eminhlanganweni ya vugandzeri vhiki ni vhiki. Leswi a a yingisela minkarhi hinkwayo, u dyondze swilo swo tala eBibeleni. A hi tekeleleni Yesu kutani hi landzela xikombiso xakwe.

Luka 2:41-52; Matewu 13:53-56.



Swivutiso

  • Xana Yesu a a ri ni malembe mangani laha xifanisweni, naswona a a ri kwihi?
  • Xana Yosefa ni ndyangu wakwe a va endla yini lembe ni lembe?
  • Endzhaku ka siku rin’we loko va ri eriendzweni ro tlhelela ekaya, ha yini Yosefa na Mariya va tlhelele eYerusalema?
  • Xana Yosefa na Mariya va n’wi kume kwihi Yesu, naswona ha yini vanhu lava a va ri kwalaho va hlamarile?
  • Xana Yesu u te yini eka mana wakwe, Mariya?
  • Xana hi nga fana njhani na Yesu eku dyondzeni hi Xikwembu?

Swivutiso swo engetela

  • Hlaya Luka 2:41-52.

    Hambileswi Nawu a wu boha vavanuna ntsena leswaku va va kona eka nkhuvo wa lembe ni lembe, xana hi xihi xikombiso lexinene lexi Yosefa na Mariya va xi vekeleke vatswari namuntlha?

    Xana Yesu u vekele vantshwa va namuntlha xikombiso lexinene hi ndlela yihi emhakeni ya ku titsongahata eka vatswari va vona?

  • Hlaya Matewu 13:53-56.

    Hi vahi vamakwavo wa Yesu va mune lava boxiweke eBibeleni, naswona vambirhi eka vona va tirhisiwe njhani evandlheni ra Vukreste?