Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 86: Vavanuna Lava Kongomisiweke Hi Nyeleti

Dyondzo 86: Vavanuna Lava Kongomisiweke Hi Nyeleti
Vangoma va tinyeleti

Xana wa yi vona nyeleti leyo vangama leyi un’wana wa vavanuna lava a yi kombetelaka? Nyeleti leyi yi humelele loko va suka eYerusalema. Vavanuna lava va huma eVuxeni naswona i vangoma va tinyeleti. Va kholwa leswaku nyeleti leyi yi va kongomisa eka munhu un’wana wa nkoka.

Loko vavanuna lava va fika eYerusalema, va vutise va ku: ‘U kwihi n’wana la faneleke ku va hosi ya Vayuda?’ “Vayuda” i vito rin’wana leri vulaka Vaisrayele. Vavanuna lava va te: ‘Hi vone nyeleti ya n’wana loyi ro sungula loko ha ha ri eVuxeni kutani hi tele ku ta n’wi gandzela.’

Loko Heroda loyi a a ri hosi eYerusalema a twa mhaka leyi, u karihe ngopfu. A a nga lavi leswaku hosi yin’wana yi n’wi tekela vuhosi. Hiloko Heroda a vitana vaprista lavakulu kutani a va vutisa a ku: ‘Xana hosi leyi tshembisiweke yi ta velekeriwa kwihi?’ Va hlamule va ku: ‘Bibele yi vula leswaku u ta tswaleriwa eBetlehema.’

Hiloko Heroda a vitana vavanuna lava humaka eVuxeni kutani a ku: ‘Fambani mi ya lava n’wana wa kona. Loko mi n’wi kuma, mi ndzi tivisa. Na mina ndzi lava ku ya n’wi gandzela.’ Kambe, entiyisweni Heroda a a lava ku kuma n’wana yoloye leswaku a n’wi dlaya!

Kutani nyeleti ya kona yi kongomise vavanuna lava eBetlehema naswona yi yime endhawini leyi n’wana loyi a a ri eka yona. Loko vavanuna lava va nghena endlwini, va kume Mariya swin’we ni ricece, ku nga Yesu. Va humese tinyiko va ti nyika Yesu. Kambe, endzhaku ka sweswo Yehovha u lemukise vavanuna lava enorhweni leswaku va nga tlheleli eka Heroda. Hiloko va tlhelela eka rikwavo hi ndlela yin’wana.

Loko Heroda a twa leswaku vavanuna lava humaka eVuxeni va tlhelele ekaya, u hlundzuke ngopfu. Hiloko a lerisa leswaku vafana hinkwavo lava nga ni malembe mambirhi ku ya ehansi lava nge Betlehema, va dlayiwa. Kambe, Yehovha u lemukise Yosefa ka ha ri emahlweni hi norho naswona Yosefa u rhurhile swin’we ni ndyangu wakwe va ya aEgipta. Hi ku famba ka nkarhi, loko Yosefa a twa leswaku Heroda u file, u teke Mariya na Yesu va muka eNazareta. Hi kona laha Yesu a kuleleke kona.

Xana u ehleketa leswaku i mani a endleke leswaku ku humelela nyeleti leyintshwa? Tsundzuka leswaku vavanuna lava va ye eYerusalema endzhaku ka loko va vone nyeleti. Sathana Diyavulosi a a lava ku dlaya N’wana wa Xikwembu naswona a a swi tiva leswaku Hosi Heroda wa le Yerusalema u ta ringeta ku n’wi dlaya. Hikwalaho, Sathana hi yena la endleke leswaku ku humelela nyeleti liya.

Matewu 2:1-23; Mikiya 5:2.



Swivutiso

  • I vamani vavanuna lava nga exifanisweni, naswona ha yini un’wana wa vona a kombetela nyeleti leyi hatimaka?
  • Hosi Heroda a a hlundzukisiwe hi yini, naswona u endle yini?
  • Xana nyeleti leyi hatimaka yi va kongomise kwihi vavanuna lava, kambe ha yini va tlhelele etikweni ra ka vona hi ndlela yin’wana?
  • Hi xihi xileriso lexi Heroda a xi nyikelaka, naswona ha yini?
  • Xana Yehovha u byele Yosefa leswaku a endla yini?
  • I mani la endleke leswaku nyeleti leyintshwa yi vangama, naswona ha yini?

Xivutiso xo engetela

  • Hlaya Matewu 2:1-23.

    Xana Yesu a a ri ni malembe mangani naswona a a tshama kwihi loko vangoma va tinyeleti va n’wi endzela?