Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 85: Yesu A Velekiwa eXivaleni

Dyondzo 85: Yesu A Velekiwa eXivaleni

Xana wa swi tiva leswaku ricece leri i mani? Ina, i Yesu. Wa ha ku velekiwa exivaleni. Xivala hi laha swifuwo swi pfaleriwaka kona. Mariya u late Yesu exidyelweni, ku nga ndhawu leyi ku vekiwaka eka yona swakudya swa timbhongolo ni swifuwo swin’wana. Kambe, ha yini Mariya na Yosefa va ri endhawini leyi ni swifuwo? Leyi a hi yona ndhawu leyi n’wana a nga velekeriwaka eka yona, a hi swona ke?

Ina, a hi yona. Kambe hi leyi mhaka leyi va tiseke laha: Mufumi wa le Rhoma, Khezari Awugusto, u veke nawu wa leswaku un’wana ni un’wana a tlhelela lomu a tswaleriweke kona leswaku a ya tsarisa vito rakwe. Ina, Yosefa u tswaleriwe laha Betlehema. Kambe loko yena na Mariya va fika, a ku nga ha ri na kamara leri nga riki na munhu. Kutani a va fanele va ya laha ku nga ni swifuwo. Hi siku lero Mariya u veleke Yesu! Kambe u hanye kahle, hilaha u swi vonaka hakona laha.

Yosefa, Mariya ni n’wana Yesu

Xana wa va vona varisi lava teke ku ta vona Yesu? A va ri enhoveni nivusiku va ri karhi va khathalela tinyimpfu ta vona, hiloko ku vonakala lokukulu ku va rhendzela. A ku ri ntsumi! Varisi a va chuhe ngopfu. Kambe ntsumi yi va byele yi ku: ‘Mi nga chavi! Ndzi mi khomele mahungu lamanene. Namuntlha ku velekiwe Kreste Hosi eBetlehema. U ta ponisa vanhu! Mi ta n’wi kuma a phutseriwe hi tinguvu naswona a latiwe exidyelweni.’ Hi nkarhinyana wolowo tintsumi to tala ti tile kutani ti sungula ku dzunisa Xikwembu. Hi ku hatlisa varisi volavo va tsutsumele ku ya vona Yesu, kutani va n’wi kumile.

Xana wa swi tiva leswaku ha yini Yesu a ri wa nkoka? Xana wa swi tiva leswaku i mani hakunene? Tsundzuka leswaku edyondzweni yo sungula ya buku leyi hi byeriwe hi ta N’wana wa Xikwembu wa mativula. N’wana loyi u tirhe na Yehovha eku tumbuluxeni ka matilo ni misava swin’we ni swilo hinkwaswo. Hakunene, hi yena Yesu yoloye!

Ina, Yehovha u teke vutomi bya N’wana wa yena etilweni kutani a byi nghenisa endzeni ka Mariya. Hiloko ricece ri sungula ku kula endzeni ka yena hilaha tincece tin’wana ti kulaka hakona endzeni ka vamana wa tona. Kambe ricece leri a ku ri N’wana wa Xikwembu. Eku heteleleni, Yesu u velekeriwe laha xivaleni, eBetlehema. Xana se wa swi vona leswaku ha yini tintsumi a ti tsake ngopfu loko ti byela vanhu leswaku Yesu u velekiwile?

Luka 2:1-20.



Swivutiso

  • I mani n’wana la nga exifanisweni lexi, naswona Mariya u n’wi late kwihi?
  • Ha yini Yesu a velekeriwe exivaleni ni swiharhi?
  • Exifanisweni lexi, i vamani vavanuna lava nghenaka exivaleni, naswona ntsumi yi va byele yini?
  • Ha yini Yesu a a hlawulekile?
  • Ha yini Yesu a nga vitaniwaka N’wana wa Xikwembu?

Swivutiso swo engetela

  • Hlaya Luka 2:1-20.

    Xana Khezari Awugusto u endle yini eku hetisiseni ka vuprofeta bya ku velekiwa ka Yesu?

    Xana munhu a nga katseka njhani eka lava ku vulavuriwaka ha vona tanihi “vanhu lava amukelekaka”?

    Loko varisi volavo va Vayuda lava titsongahataka a va ri ni xivangelo xo tsakela ku velekiwa ka Muponisi, xana hi xihi xivangelo lexikulu xa ku tsaka lexi malandza ya Xikwembu ma nga na xona namuntlha?

DYONDZA SWO TALA

SWIVUTISO LESWI HLAMURIWAKA HI BIBELE

Yesu U Velekiwe Rini?

Kuma leswaku ha yini Khisimusi yi tlangeriwa hi December 25.