Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 84: Ntsumi Yi Endzela Mariya

Dyondzo 84: Ntsumi Yi Endzela Mariya

Wansati loyi wo saseka i Mariya. I Muisrayele la tshamaka emutini wa Nazareta. Xikwembu xa swi tiva leswaku i munhu lonene ngopfu. Hi yona mhaka leyi xi rhumeleke ntsumi ya xona Gabriyele leswaku yi ta vulavula na yena. Xana wa swi tiva leswaku Gabriyele u tele ku ta n’wi byela yini Mariya? A hi voneni.

Gabriyele u vule marito lawa eka yena: “Xewani, wena loyi a tsakeriweke swinene. Yehovha u na wena.” Mariya a a sungula ku vona munhu loyi. A a karhatekile, hikuva a a nga swi tivi leswaku u vula yini. Kambe hi ku hatlisa Gabriyele u n’wi khongoterile.

Mariya

U te: ‘U nga chavi, Mariya. Yehovha u ku tsakerile swinene. Hi yona mhaka leyi a lavaka ku ku endlela nchumu wo hlamarisa. U ta kuma n’wana ku nga ri khale. Kutani u ta n’wi thya vito ra Yesu.’

Gabriyele u ye emahlweni a hlamusela, a ku: ‘N’wana loyi u ta va lonkulu naswona u ta vuriwa N’wana wa Xikwembu lexi nge Henhla-henhla. Yehovha u ta n’wi endla hosi ku fana na Davhida. Kambe Yesu u ta va hosi hilaha ku nga heriki, naswona mfumo wakwe a wu nge vi na makumu!’

Mariya u vutise a ku: ‘Xana leswi swi ta endlekisa ku yini? A ndzi tekiwanga. A ndzi si tshama ndzi etlela ni wanuna, xisweswo ndzi nga n’wi kumisa ku yini n’wana?’

Gabriyele u hlamule a ku: ‘Matimba ya Xikwembu ma ta ta eka wena. Hikwalaho ka sweswo, n’wana wa kona u ta vuriwa N’wana wa Xikwembu.’ Hiloko a byela Mariya a ku: ‘Tsundzuka xaka ra wena Elizabeta. Vanhu a va vula leswaku a a dyuharile, a nge he kumi n’wana. Kambe ku nga ri khale u ta va ni n’wana. Kutani waswivo, a wu kona nchumu lowu nga tsandzaka Xikwembu.’

Hiloko Mariya a ku: ‘Ndzi hlonga ra xisati ra Yehovha! Onge swi nga endleka eka mina hi ku ya hi leswi u swi vuleke.’ Hiloko ntsumi yi famba.

Mariya u tsutsumile a endzela Elizabeta. Loko Elizabeta a twa rito ra Mariya, ricece leri a ri ri ekhwirini ra Elizabeta ri sungule ku tlula-tlula hikwalaho ko tsaka. Elizabeta u tale hi moya wa Xikwembu kutani u byele Mariya a ku: ‘U kateke hi ndlela yo hlawuleka exikarhi ka vavasati.’ Mariya u tshame na Elizabeta tin’hweti tinharhu, kutani a tlhelela ekaya eNazareta.

Se a ku ri nkarhi wa leswaku Mariya a tekiwa hi wanuna la vuriwaka Yosefa. Kambe loko Yosefa a twa leswaku Mariya u ta kuma n’wana, a a nga ha lavi ku n’wi teka. Hiloko ntsumi ya Xikwembu yi ku eka yena: ‘U nga chavi ku teka Mariya a va nsati wa wena. Hikuva n’wana yoloye u huma eka Xikwembu.’ Kutani Mariya na Yosefa va tekanile naswona va rindza leswaku Yesu a tswariwa.

Luka 1:26-56; Matewu 1:18-25.



Swivutiso

  • I mani wansati la nga laha xifanisweni?
  • Gabriyele u n’wi byele yini Mariya?
  • Xana Gabriyele u n’wi hlamusele njhani Mariya leswaku u ta kuma n’wana hambileswi a nga si tshamaka a hlangana ni wanuna?
  • Ku humelele yini loko Mariya a endzela xaka rakwe Elizabeta?
  • Xana Yosefa u ehlekete yini loko a twa leswaku Mariya u ta kuma n’wana, kambe ha yini a cince xiboho xakwe?

Swivutiso swo engetela

  • Hlaya Luka 1:26-56.

    Xana Luka 1:35 yi kombisa yini malunghana ni ku nga hetiseki kun’wana ni kun’wana loku vangiweke hi Adamu ekhwirini ra Mariya loko vutomi bya N’wana wa Xikwembu byi hundziseriwa eka yena byi suka exivandleni xa moya?

    Xana Yesu u xiximiwe njhani hambiloko a nga si velekiwa?

    Hi xihi xikombiso lexinene lexi Mariya a xi vekeleke Vakreste lava kumaka malunghelo yo hlawuleka ya ntirho namuntlha?

  • Hlaya Matewu 1:18-25.

    Hambileswi Yesu a nga thyiwangiki vito leri nge Emanuwele, xana ntirho lowu a wu endleke loko a ri munhu wa nyama wu yi hetisise njhani nhlamuselo ya rona?

DYONDZA SWO TALA

Khadi Ra Bibele Ra Mariya

Dyondza hi leswaku Mariya u n’wi yise kwihi Yesu loko a ri ni masiku ya 40. Printa khadi leri ra Bibele, u ri tsema ivi u ri hlayisa.

Mariya—“Waswivo! Hlonga Ra Xisati Ra Yehovha!”

Ndlela leyi Mariya a yi anguleke ha yona ntsumi Gabriyele yi kombisa yini malunghana ni ripfumelo rakwe? Hi tihi timfanelo tin’wana ta nkoka leti a ti kombiseke?