Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 101: Yesu A Dlayiwa

Dyondzo 101: Yesu A Dlayiwa

Languta nchumu wo vava lowu humeleleke! Yesu u dlayiwile. Va n’wi belele emhandzini. Swipikiri swi beleriwe emavokweni ni le milengeni yakwe. Ha yini munhu a endle nchumu wo tani eka Yesu?

Yesu a ri karhi a fa

Hileswi vanhu van’wana a va venga Yesu. Xana wa va tiva vanhu va kona? Un’wana wa vona i ntsumi leyo homboloka, ku nga Sathana Diyavulosi. Hi yena la endleke leswaku Adamu na Evha va nga n’wi yingisi Yehovha. Nakambe Sathana hi yena la endleke leswaku valala va Yesu va endla vugevenga lebyi byo chavisa swonghasi.

Hambiloko Yesu a nga si beleriwa emhandzini leyi, valala vakwe va n’wi khome hi tihanyi. Xana wa ha tsundzuka loko va ya entangeni wa Getsemani va ya n’wi khoma? Xana a ku ri vamani valala volavo? Ina, a ku ri varhangeri va vukhongeri. Kutani, a hi voneni leswi humeleleke endzhaku ka sweswo.

Loko varhangeri va vukhongeri va khoma Yesu, vaapostola vakwe va balekile. Va siye Yesu a khomiwe hi valala vakwe hikuva a va chuhile. Kambe muapostola Petro na Yohane a va nga balekelanga ekule. Va va sale ndzhaku ku vona leswi nga ta humelela eka Yesu.

Vaprista va yise Yesu eka nkulukumba la vuriwaka Anasi, loyi a a ri muprista lonkulu. Ntshungu a wu tshamanga ngopfu kwalaho. Nakambe va yise Yesu endlwini ya Kayafasi, loyi a a ri muprista lonkulu hi nkarhi wolowo. Varhangeri vo tala va vukhongeri va hlengeletane endlwini ya yena.

Va n’wi konanise endlwini yoleyo ya Kayafasi. Ku tisiwe vanhu leswaku va ta vula mavunwa hi Yesu. Varhangeri hinkwavo va vukhongeri va te: ‘Yesu u fanele ku dlayiwa.’ Kutani va n’wi tshwutelele exikandzeni va tlhela va n’wi bukutela hi swibakele.

Loko swilo leswi hinkwaswo swi humelela, Petro a a yime ehandle ka xivava. A ku titimela vusiku byebyo kutani vanhu a va tshivele ndzilo. Loko va ri karhi va orha ndzilo, hiloko nhwanyana la nga nandza a languta Petro kutani a ku: ‘Wanuna loyi na yena a a ri na Yesu.’

Petro u te: ‘A swi tano nikatsongo!’

Vanhu va vule kanharhu leswaku Petro a a ri na Yesu. Kambe, nkarhi wun’wana ni wun’wana Petro u kanetile. Loko Petro a vula sweswo ra vunharhu, Yesu u hundzulukile a n’wi languta. Petro u tisorile swinene hi ku va a hembile kutani u humele handle a ya rila.

Loko ri ri karhi ri xa hi Ravuntlhanu nimixo, vaprista va yise Yesu endhawini leyikulu leyi a va hlangana eka yona, ku nga holo ya Sanedri. Kwalaho va fike va vulavula hi leswi va nga ta n’wi endla swona. Va n’wi yise eka Pontiyo Pilato, la nga mufumi wa muganga wa Yudiya.

Vaprista va byele Pilato va ku: ‘Wanuna loyi u hombolokile. U fanele a dlayiwa.’ Endzhaku ko vutisa Yesu swivutiso, Pilato u te: ‘A ndzi n’wi voni nandzu.’ Hiloko Pilato a rhumela Yesu eka Heroda Antipasi. Heroda a a ri mufumi wa le Galeliya kambe a a tshama eYerusalema. Heroda na yena a nga n’wi vonanga nandzu Yesu, kutani u n’wi tlherisele eka Pilato.

Pilato a a lava ku ntshunxa Yesu. Kambe valala va Yesu a va lava leswaku ku ntshunxiwa mubohiwa un’wana ematshan’weni ya yena. Wanuna wa kona a a ri xigevenga lexi vuriwaka Barabasi. A ku ri ni nhlikanhi loko Pilato a humesela Yesu ehandle. U byele vanhu a ku: ‘Vonani! Hosi ya n’wina!’ Kambe vaprista lavakulu va huwelele va ku: ‘N’wi suse! N’wi dlaye! N’wi dlaye!’ Hiloko Pilato a ntshunxa Barabasi kutani va teka Yesu a ya dlayiwa.

Hi Ravuntlhanu nindzhenga Yesu u beleriwe emhandzini. A wu nge swi voni laha xifanisweni kambe ku ni swigevenga leswi beleriweke ematlhelo ka Yesu. Loko Yesu a ri kusuhi ni ku fa, xin’wana xa swigevenga xi n’wi byele xi ku: ‘U ndzi tsundzuka loko u fika emfun’weni wa wena.’ Kutani Yesu u hlamule a ku: ‘Ndza ku tshembisa leswaku u ta va na mina eParadeyisini.’

Xana xexo a ku nga ri xitshembiso lexi tsakisaka? Xana wa yi tiva paradeyisi leyi Yesu a a vulavula ha yona? Xana a yi ri kwihi paradeyisi leyi endliweke hi Xikwembu eku sunguleni? Ina, a yi ri emisaveni. Naswona loko Yesu a fuma tanihi hosi etilweni, u ta pfuxa wanuna loyi leswaku a ta tsaka eParadeyisini leyintshwa emisaveni. Xana a swi hi tsakisi sweswo?

Matewu 26:57-75; 27:1-50; Luka 22:54-71; 23:1-49; Yohane 18:12-40; 19:1-30.



Swivutiso

  • I mani loyi a nga ni vutihlamuleri lebyikulu eka rifu ra Yesu?
  • Xana vaapostola va endle yini loko Yesu a khomiwa hi varhangeri va vukhongeri?
  • Ku humelele yini endlwini ya Kayafasi, muprista lonkulu?
  • Ha yini Petro a humile a ya rila?
  • Loko Yesu a tlhelele eka Pilato, xana vaprista lavakulu va huwelele va ku yini?
  • Ku humelele yini hi Yesu hi Ravuntlhanu nindzhenga, naswona u n’wi tshembise yini mudyohi loyi a a vambiwe emhandzini etlhelo ka yena?
  • Xana Paradeyisi leyi Yesu a a vulavula ha yona yi le kwihi?

Swivutiso swo engetela

  • Hlaya Matewu 26:57-75.

    Xana swirho swa huvo-nkulu ya Vayuda swi kombise njhani leswaku a swi bihe timbilu?

  • Hlaya Matewu 27:1-50.

    Ha yini hi nga vulaka leswaku ku tisola ka Yudasi a ku nga ri ka xiviri?

  • Hlaya Luka 22:54-71.

    Hi yihi dyondzo leyi hi nga yi dyondzaka emhakeni ya Petro ya ku landzula Yesu hi vusiku lebyi a xengiweke ni ku khomiwa ha byona?

  • Hlaya Luka 23:1-49.

    Yesu u angule njhani eka vuhomboloki lebyi va n’wi endleke byona, naswona hi nga dyondza yini emhakeni leyi?

  • Hlaya Yohane 18:12-40.

    I yini lexi kombisaka leswaku hambileswi Petro a a ngheniwe hi moya wa ku chava vanhu swa xinkarhana, endzhaku u hlule xiyimo xo tano ivi a va muapostola wo hlawuleka?

  • Hlaya Yohane 19:1-30.

    Hi rihi langutelo leri ringaniseriweke hi swilo leswi vonakaka leri Yesu a a ri na rona?

    Xana marito lawa Yesu a ma vuleke loko a fa ma kombise njhani leswaku u seketele vuhosi bya Yehovha?

DYONDZA SWO TALA

Tiva Yohane 3:16 Hi Nhloko

Dyondza leswi Yohane 3:16 yi vulaka swona kutani u tirhisa leswi u swi dyondzeke loko u ya ensin’wini.