Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 100: Yesu eNtangeni

Dyondzo 100: Yesu eNtangeni

Endzhaku ko suka ekamareni ra xithezi xa le henhla, Yesu ni vaapostola vakwe va ye entangeni wa Getsemani. Va tshame va ya ko tala endhawini leyi. Loko va fika, Yesu u va byele leswaku va tshama va xalamukile naswona va khongela. Hiloko a famba a ya ekulenyana kutani a nkhinsama, a khongela.

Endzhakunyana Yesu u tlhelele laha a ku ri ni vaapostola vakwe. Xana u ehleketa leswaku a va endla yini? A va etlele! Yesu u va byele kanharhu leswaku va fanele va tshama va xalamukile, kambe nkarhi wun’wana ni wun’wana loko a vuya, a a kuma va etlele. Yesu u vule leswi loko a vuya ro hetelela: ‘Xana mi nga etlerisa ku yini enkarhini lowu? Nkarhi wu fikile wa leswaku ndzi nyiketiwa eka valala va mina.’

Enkarhini wolowo hiloko ku twakala huwa leyikulu ya ntshungu. Waswivo! A ku ta vavanuna lava a va tamele mabanga ni swigombo! Naswona a va khome timboni leswaku ti va voningela. Loko va tshinela, hiloko un’wana a suka entshungwini kutani a kongoma eka Yesu. Wa n’wi ntswontswa, hilaha u swi vonaka hakona laha. Wanuna loyi i Yudasi Iskariyota! Ha yini a ntswontswa Yesu?

Yudasi a xenga Yesu

Yesu u vutise a ku: ‘Yudasi, xana u ndzi xenga hi ku ndzi ntswontswa?’ Ina, ku ntswontswa a ku ri xikombiso xo karhi. A ku endla leswaku vavanuna lava nga na Yudasi va tiva Yesu loyi va n’wi lavaka. Hiloko valala va Yesu va ya eka yena leswaku va n’wi khoma. Kambe Petro a a nga ta va pfumelela va teka Yesu a nga lwanga. U hlomule banga leri a a ri na rona kutani a hlasela wanuna loyi a a ri ekusuhi na yena. Hiloko banga ri hupa nhloko ya wanuna loyi kutani ri n’wi tsema ndleve ya xinene. Kambe Yesu u khumbe ndleve ya wanuna loyi kutani a n’wi tshungula.

Yesu u byele Petro a ku: ‘Tlherisela banga ra wena endhawini ya rona. Xana a wu ehleketi leswaku ndzi nga kombela Tatana a rhumela magidi ya tintsumi leswaku ti ndzi ponisa?’ Ina, a nga ti rhumela! Kambe Yesu a nga kombelanga eka Xikwembu leswaku xi n’wi rhumela tintsumi, hikuva a a swi tiva leswaku nkarhi a wu fikile wa leswaku valala va yena va n’wi teka. Hiloko a va tshika va n’wi teka. A hi voneni leswi humeleleke Yesu enkarhini wolowo.

Matewu 26:36-56; Luka 22:39-53; Yohane 18:1-12.



Swivutiso

  • Xana Yesu ni vaapostola vakwe va ye kwihi endzhaku ka loko va sukile ekamareni ra le henhla, naswona u va byele leswaku va endla yini?
  • Xana Yesu u kume yini loko a tlhelela laha a ku ri ni vaapostola, naswona leswi swi humelele kangani?
  • I vamani lava nghenaka entangeni, naswona Yudasi Iskariyota u endla yini, hilaha xifaniso xi kombisaka hakona?
  • Ha yini Yudasi a ntswontswe Yesu, naswona Petro u endle yini?
  • Xana Yesu u te yini eka Petro, naswona ha yini Yesu a nga kombelanga Xikwembu leswaku xi rhumela tintsumi?

Swivutiso swo engetela

  • Hlaya Matewu 26:36-56.

    Xana ndlela leyi Yesu a nyikeke vadyondzisiwa vakwe ndzayo ha yona i xikombiso lexinene eka vakulu lava nga Vakreste namuntlha hi ndlela yihi?

    Xana Yesu u ku languta njhani ku tirhisela munhu un’wana matlhari?

  • Hlaya Luka 22:39-53.

    Loko ntsumi yi humelela eka Yesu entangeni wa Getsemani leswaku yi n’wi tiyisa, xana leswi a swi kombisa leswaku Yesu a a tsekatseka eripfumelweni? Hlamusela.

  • Hlaya Yohane 18:1-12.

    Xana Yesu u va sirhelele njhani vadyondzisiwa vakwe eka vakaneti, naswona hi nga dyondza yini eka xikombiso lexi?