Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 82: Mordekayi Na Estere

Dyondzo 82: Mordekayi Na Estere

A hi tlheleleni endzhakunyana loko Ezra a nga si ya eYerusalema. Mordekayi na Estere a va ri Vaisrayele va xiyimo xa le henhla emfun’weni wa Peresiya. Estere a a ri nkosikazi naswona muzala wakwe Mordekayi a a ri xandla xa hosi. A hi voneni leswaku leswi swi tise ku yini.

Vatswari va Estere va fe a ha ri ntsongo swinene, kutani u kurisiwe hi Mordekayi. Ahasuwerusi hosi ya Peresiya a a ri ni yindlu ya vuhosi emutini wa Xuxani naswona Mordekayi a a ri un’wana wa malandza yakwe. Siku rin’wana Vhaxiti nsati wa hosi a nga yi yingisanga, hiloko hosi yi tihlawulela nsati lontshwa la nga ta va nkosikazi. Xana wa n’wi tiva wansati loyi yi n’wi hlawuleke? Ina, i Estere wo saseka.

Hamani a hlundzukela Mordekayi

Xana wa n’wi tiva wanuna loyi a tikukumuxaka loyi vanhu va n’wi nkhinsamelaka? I Hamani. I wanuna la xiximekaka ngopfu ePeresiya. Hamani u lava leswaku Mordekayi, loyi u n’wi vonaka a tshame laha leswaku na yena a n’wi nkhinsamela. Kambe Mordekayi a a nga ta swi endla sweswo. U vona swi nga fanelanga ku nkhinsamela munhu wo homboloka hi ndlela leyi. Sweswo swi n’wi hlundzukise ngopfu Hamani. Kutani u endle leswi landzelaka.

Hamani u hembele Vaisrayele ehosini. U te: ‘I vanhu vo biha lava nga wu yingisiki nawu wa wena. Va fanele va dlayiwa.’ Ahasuwerusi a nga swi tivi leswaku nsati wakwe Estere i Muisrayele. Kutani u yingise leswi vuriweke hi Hamani, hiloko a veka nawu leswaku hi siku ro karhi Vaisrayele hinkwavo va fanele va dlayiwa.

Loko Mordekayi a twa nawu wa kona, u karhateke ngopfu. U rhumele rito eka Estere, a ku: ‘U fanele u byela hosi, naswona u yi kombela leswaku yi hi ponisa.’ A swi nga pfumeleriwi ePeresiya ku ya vona hosi handle ka loko u vitaniwile. Kambe Estere u nghene a nga vitaniwanga. Hosi yi n’wi tlakusele nhonga ya yona ya nsuku, leswi vulaka leswaku a nga fanelanga a dlawa. Estere u rhambe hosi na Hamani enkhubyeni lowukulu wa swakudya. Kwalaho hosi yi vutise Estere leswaku u lava yi n’wi endlela yini. Estere u vule leswaku u ta yi byela loko yona na Hamani vo tlhela va ta enkhubyeni wun’wana wa swakudya hi siku leri tlhandlamaka.

Enkhubyeni wolowo Estere u byele hosi a ku: ‘Mina ni vanhu va ka hina hi ta dlawa.’ Sweswo swi hlundzukise hosi. Hiloko yi vutisa yi ku: ‘I mani la nga ni xivindzi xo endla nchumu wo biha hi ndlela yoleyo?’

Estere a ku: ‘Munhu wa kona, la nga nala, i Hamani loyi wo homboloka!’

Nkosikazi Estere a hehla Hamani

Hiloko hosi yi hlundzuka ngopfu. Yi lerise leswaku Hamani a dlawa. Endzhaku ka sweswo hosi yi veke Mordekayi a va xandla xa yona. Hiloko Mordekayi a endla leswaku ku vekiwa nawu lowuntshwa lowu nga ta pfumelela Vaisrayele ku tilwela hi siku leri a va fanele va dlawa ha rona. Leswi Mordekayi se a a ri munhu wa xiyimo xa le henhla, vanhu vo tala va pfune Vaisrayele naswona va ponile eka valala va vona.

Buku ya Bibele ya Estere.



Swivutiso

  • Xana Mordekayi na Estere a ku ri vamani?
  • Hikwalaho ka yini Hosi Ahasuwerusi a a lava nsati lontshwa, naswona u hlawule mani?
  • Hamani a ku ri mani, naswona u hlundzukisiwe hi yini?
  • Hi wihi nawu lowu vekiweke, naswona Estere u endle yini endzhaku ko kuma rungula leri humaka eka Mordekayi?
  • Ku endleke yini hi Hamani, naswona ku endleke yini hi Mordekayi?
  • Xana Vaisrayele va sirheleriwe njhani eka valala va vona?

Swivutiso swo engetela

  • Hlaya Estere 2:12-18.

    Xana Estere u wu kombise njhani nkoka wa ku hlakulela “moya wo rhula ni wo olova”?

  • Hlaya Estere 4:1-17.

    Ku fana nileswi Estere a a nyikiwe lunghelo ro seketela vugandzeri bya ntiyiso, xana hi rihi lunghelo leri hi nyikiweke rona namuntlha ro kombisa ku tinyiketela ni ku tshembeka ka hina eka Yehovha?

  • Hlaya Estere 7:1-6.

    Xana vanhu va Xikwembu vo tala namuntlha va tihoxe ekhombyeni ro xanisiwa ku fana na Estere hi ndlela yihi?

DYONDZA SWO TALA

Khadi Ra Bibele Ra Estere

Xana xivindzi xa Estere xi byi ponise njhani vutomi? Kopa khadi leri ra Bibele naswona u dyondza eka xikombiso xa yena.