Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 81: Ku Tshemba Mpfuno Wa Xikwembu

Dyondzo 81: Ku Tshemba Mpfuno Wa Xikwembu

Vanhu va magidi va teke riendzo va suka eBabilona va ya eYerusalema. Kambe loko va fika eYerusalema, va lo kuma marhumbi ntsena. A ku nga ri na vanhu. Vaisrayele a va fanele va pfuxelela swilo hinkwaswo.

Nchumu wo sungula lowu va wu akeke a ku ri alitari. Leyi i ndhawu leyi a va endlela Yehovha eka yona magandzelo kumbe tinyiko. Endzhaku ka tin’hweti ti nga ri tingani, Vaisrayele va sungule ku aka tempele. Kambe valala va vona lava a va tshama ekusuhi ni kwalaho a va nga swi lavi leswaku Vaisrayele va aka tempele. Kutani va ringete ku va chavisa leswaku va nga yi aki. Eku heteleleni, valala lava va endle leswaku hosi leyintshwa ya Peresiya yi veka nawu wo va tshikisa ntirho wo aka.

Ku hundze malembe yo tala. Ku hundze malembe ya 17 Vaisrayele va vuyile eBabilona. Yehovha u rhume vaprofeta vakwe, ku nga Hagayi na Zakariya leswaku va byela vanhu leswaku va sungula ku aka. Vanhu a va tshemba leswaku Xikwembu xi ta va pfuna, kutani va va yingisile vaprofeta volavo. Va sungule ku aka nakambe, hambileswi nawu a wu vula leswaku a va fanelanga va aka.

Kutani Tatenayi ndhuna-nkulu ya le Peresiya u tile a ta vutisa Vaisrayele leswaku va wu kuma kwihi mpfumelelo wo aka tempele. Vaisrayele va n’wi byele leswaku loko va ha ri eBabilona, Hosi Korexe u va byele a ku: ‘Sweswi, yanani eYerusalema mi ya aka tempele ya Yehovha, Xikwembu xa n’wina.’

Tatenayi u rhumele papila eBabilona, a vutisa loko Korexe, loyi se a a file, a swi vurile sweswo hakunene. Ku nga ri kungani hosi leyintshwa ya Peresiya yi hlamurile. Yi vule leswaku Korexe u swi vurile hakunene. Hiloko hosi yi ku: ‘Tshikani Vaisrayele va aka tempele ya Xikwembu xa vona. Naswona ndzi mi lerisa leswaku mi va pfuna.’ Endzhaku ka malembe ya kwalomu ka mune tempele a yi herile, naswona Vaisrayele a va tsakile swinene.

Se a ku hundze malembe ya kwalomu ka 48 tempele yi akiwile. Vanhu va le Yerusalema na vona se a va ri swisiwana, naswona muti ni tempele ya Xikwembu a swi nga ha sasekanga ngopfu. Muisrayele la vuriwaka Ezra loyi a ha ri eBabilona u twe leswaku tempele ya Xikwembu yi lava ku lunghisiwa. Xana wa swi tiva leswaku u endle yini?

Ezra u fambile a ya eka Atazekiseki, hosi ya Peresiya, kutani hosi leyi leyinene yi nyike Ezra tinyiko to tala leswaku a tlhelela na tona eYerusalema. Ezra u kombele Vaisrayele lava a va ri eBabilona leswaku va n’wi pfuna ku rhwala tinyiko leti va ya na tona eYerusalema. Vanhu va kwalomu ka 6 000 va vule leswaku va ta famba na yena. A va ri na silivhere ni nsuku wo tala ni swilo swin’wana swa risima leswi a va fanele va famba na swona.

Ezra a a karhatekile hikuva a ku ri ni vanhu vo homboloka endleleni. Kumbexana vanhu va kona a va ta va tekela silivhere ni nsuku wa vona, kutani va va dlaya. Kutani Ezra u hlengelete vanhu, hilaha u swi vonaka hakona laha xifanisweni. Kutani va khongela eka Yehovha leswaku a va sirhelela eriendzweni ra vona ro leha ro tlhelela eYerusalema.

Ezra a ri ni vanhu va ri ku khongeleni

Yehovha u va sirhelerile. Naswona va fike va hlayisekile eYerusalema endzhaku ko famba tin’hweti ta mune. Xana leswi a swi kombisi swona leswaku Yehovha a nga va sirhelela lava vekaka ntshembo wa vona eka yena leswaku a va pfuna?

Ezra tindzima 2 ku ya eka 8.



Swivutiso

  • I vanhu vangani lava fambeke riendzo ro leha ku suka eBabilona ku ya eYerusalema, kambe va kume yini loko va fika?
  • I yini lexi Vaisrayele va sunguleke ku xi aka loko va fika, kambe valala va vona va endle yini?
  • Xana Hagayi na Zakariya a ku ri vamani, naswona va te yini eka vanhu?
  • Hikwalaho ka yini Tatenayi a rhumele papila eBabilona, naswona nhlamulo ya kona a yi ku yini?
  • Xana Ezra u endle yini loko a twa hi ta xilaveko xo pfuxeta tempele ya Xikwembu?
  • Xana Ezra u khongelela yini laha xifanisweni, xana xikhongelo xakwe xi hlamuriwe njhani, naswona hi dyondza yini emhakeni leyi?

Swivutiso swo engetela

  • Hlaya Ezra 3:1-13.

    Loko ho tikuma hi ri endhawini leyi ku nga riki na vandlha ra vanhu va Xikwembu, i yini leswi hi faneleke ku hambeta hi swi endla?

  • Hlaya Ezra 4:1-7.

    Hi xihi xikombiso lexi Zerubabele a xi vekeleke vanhu va Yehovha malunghana ni ku pfanganisa vupfumeri?

  • Hlaya Ezra 5:1-5, 17 na 6:1-22.

    Ha yini vakaneti va tsandzekile ku sivela ntirho wo aka tempele?

    Xana xiendlo xa vavanuna lava kuleke va Vayuda xi va khutaza njhani vakulu va Vakreste leswaku va lava nkongomiso wa Yehovha loko va langutane ni vakaneti?

  • Hlaya Ezra 8:21-23, 28-36.

    Loko hi nga si sungula ku endla xiendlo xo karhi, i xikombiso xihi xa Ezra lexi swi nga vaka swinene leswaku hi xi tekelela?