Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 79: Daniyele U Le Kheleni Ra Tinghala

Dyondzo 79: Daniyele U Le Kheleni Ra Tinghala

Manano! Swi vonaka onge Daniyele u le khombyeni lerikulu. Kambe tinghala a ti n’wi vavisi! Xana wa swi tiva leswaku ha yini? I mani la hoxeke Daniyele laha ku nga ni tinghala leti? A hi voneni.

Hi nkarhi wolowo Dariyosi a a ri hosi ya le Babilona. A a rhandza Daniyele swinene hikuva Daniyele a a ri ni tintswalo naswona a a tlharihile swinene. Dariyosi u hlawule Daniyele leswaku a va ndhuna leyikulu emfun’weni wa yena. Sweswo swi endle leswaku vavanuna lavan’wana va va ni mavondzo eka Daniyele, kutani va endle leswi landzelaka.

Dariyosi

Va ye eka Dariyosi va fika va ku: ‘Hi twananile, Wena hosi, leswaku u veka nawu lowu vulaka leswaku ku ringana masiku ya 30 ku hava munhu la faneleke a khongela xikwembu xin’wana kumbe eka munhu un’wana, hinkwavo va fanele va khongela eka wena, Wena hosi. Loko un’wana a nga yingisi, u fanele ku hoxiwa ekheleni ra tinghala.’ Dariyosi a a nga swi tivi leswaku ha yini vavanuna lava va lava leswaku ku vekiwa nawu lowu. Kambe a a ehleketa leswaku i swinene, hiloko a tsala nawu wolowo. Kutani nawu a wu nga ha ta cinciwa.

Loko Daniyele a twa hi ta nawu lowu, u mukile a fika a khongela, ku fana ni masiku man’wana. Vavanuna lava vo homboloka a va swi tiva leswaku Daniyele a nge tshiki ku khongela eka Yehovha. A va tsakile hikuva a swi vonaka onge makungu ya vona yo dlaya Daniyele a ma ta humelela.

Loko Hosi Dariyosi a twa leswaku ha yini vavanuna lava va veke nawu lowu, u tisole ngopfu. Kambe a a nga ta wu cinca nawu wa kona, kutani a a fanele a lerisa leswaku Daniyele a hoxiwa ekheleni ra tinghala. Kambe hosi yi byele Daniyele yi ku: ‘Ndza tshemba leswaku Xikwembu xa wena lexi u xi tirhelaka, xi ta ku ponisa.’

Dariyosi a a hlundzuke ngopfu lerova a nga etlelanga vusiku byebyo. Hi siku leri landzelaka u tsutsumele ekheleni ra tinghala. Wa n’wi vona lahaya. U huwelele a ku: ‘Daniyele, nandza wa Xikwembu lexi hanyaka! Xana Xikwembu lexi u xi tirhelaka xi swi kotile ku ku ponisa etinghaleni?’

Daniyele ekheleni ra tinghala

Daniyele u hlamule a ku: ‘Xikwembu xi rhumele ntsumi ya xona, kutani yi pfale milomu ya tinghala leswaku ti nga ndzi vavisi.’

Hosi a yi tsake ngopfu. Kutani yi lerise leswaku Daniyele a humesiwa ekheleni. Kutani yi lerisa leswaku vavanuna lavo homboloka lava a va lava ku dlaya Daniyele va hoxiwa ekheleni ra tinghala. Va te va nga si fika ni le hansi ka khele, tinghala ti va khoma ti va pfotlosa marhambu hinkwawo.

Hiloko Hosi Dariyosi a tsalela vanhu hinkwavo va mfumo wa yena a ku: ‘Ndzi lerisa leswaku un’wana ni un’wana u fanele a xixima Xikwembu xa Daniyele. Xi endle masingita lamakulu. Xi ponise Daniyele leswaku a nga dyiwi hi tinghala.’ Hiloko Hosi Dariyosi a tsalela vanhu hinkwavo va mfumo wa yena a ku: ‘Ndzi lerisa leswaku un’wana ni un’wana u fanele a xixima Xikwembu xa Daniyele. Xi endle masingita lamakulu. Xi ponise Daniyele leswaku a nga dyiwi hi tinghala.’

Daniyele 6:1-28.



Swivutiso

  • Dariyosi a a ri mani, naswona a a n’wi languta njhani Daniyele?
  • Xana vavanuna van’wana va mavondzo va hlohlotele Dariyosi ku endla yini?
  • Xana Daniyele u endle yini loko a twa hi ta nawu lowuntshwa?
  • Ha yini Dariyosi a a hlundzuke ngopfu lerova a tsandzeka ni ku etlela, naswona u endle yini eka mixo lowu landzelaka?
  • Xana Daniyele u n’wi hlamule njhani Dariyosi?
  • Ku humelele yini hi vavanuna vo homboloka lava ringeteke ku dlaya Daniyele, naswona Dariyosi u va tsalele yini vanhu hinkwavo va le mfun’weni wa yena?

Swivutiso swo engetela

  • Hlaya Daniyele 6:1-28.

    Xana ku khirhiwa ka Daniyele ku hi tsundzuxa yini leswi vakaneti va swi endleke loko va ringeta ku sivela ntirho wa Timbhoni ta Yehovha eminkarhini ya manguva lawa?

    Xana malandza ya Xikwembu namuntlha ma nga n’wi tekelela njhani Daniyele hi ku tshama ma tiveke ehansi ka “valawuri lava tlakukeke”?

    Hi nga xi tekelela njhani xikombiso xa Daniyele hi ku tirhela Yehovha “nkarhi hinkwawo”?

DYONDZA SWO TALA

MAKHADI YA VANHU VA LE BIBELENI

Khadi Ra Bibele Ra Daniyele

Ha yini Daniyele a hoxiwe ekheleni ra tinghala? Kopa khadi leri ra Bibele naswona u dyondza leswi engetelekeke hi Daniyele.