Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 78: Voko Ri Tsala eKhumbini

Dyondzo 78: Voko Ri Tsala eKhumbini
Voko ri tsala ekhumbini

Xana ku endleka yini laha? Vanhu va le nkhubyeni lowukulu. Hosi ya Babilona a yi rhambe vanhu vo tala va xiyimo xa le henhla. A va tirhisa swinwelo swa nsuku ni swa silivhere ni swibya leswi tekiweke etempeleni ya Yehovha eYerusalema. Kambe, xikan’we-kan’we ku humelele rintiho ra munhu emoyeni ri sungula ku tsala ekhumbini. Hinkwavo va chuhile.

Belxatsara ni vaendzi vakwe

Belxatsara, ntukulu wa Nebukadnetsara hi yena a a ri hosi hi nkarhi wolowo. U huwelerile, a vitana tintlhari takwe. Hosi yi te: ‘Un’wana ni un’wana loyi a nga ta hlaya leswi swi tsariweke, a ndzi byela ni nhlamuselo ya swona, u ta nyikiwa tinyiko to tala naswona u ta kuma xikhundlha xa vunharhu hi ku tlakuka emfun’weni.’ Kambe ku hava ni un’we wa tintlhari leti la koteke ku hlaya marito lama tsariweke ekhumbini kumbe ku vula nhlamuselo ya wona.

Mana wa hosi u twe huwa kutani a nghena eholweni leyikulu yo dyela eka yona. U fike a byela hosi a ku: ‘U nga chavi. Ku ni munhu emfun’weni wa wena loyi a tivaka swikwembu swo kwetsima. Loko kokwa wa wena Nebukadnetsara a ha ri hosi u n’wi endle ndhuna ya tintlhari hinkwato. Vito rakwe i Daniyele. N’wi vitaneni, kutani u ta mi byela nhlamuselo ya kona.’

Hiloko Daniyele a tisiwa hi nomu lowu. Endzhaku ko ala tinyiko leti a a nyikiwa tona, Daniyele u sungule hi ku hlamusela leswaku ha yini Yehovha a tekele Nebukadnetsara kokwa wa Belxatsara vuhosi. Daniyele u te: ‘A a tikukumuxa. Kutani Yehovha u n’wi xupurile.’

Daniyele u byele Belxatsara a ku: ‘Kambe wena u tiva hinkwaswo leswi n’wi humeleleke, hambiswiritano, wa ha tikukumuxa ku fana na Nebukadnetsara. U tise swinwelo ni swibya leswi humaka etempeleni ya Yehovha, kutani u nwela eka swona. U dzunise swikwembu leswi endliweke hi ntsandza ni ribye, naswona a wu n’wi xiximanga Mutumbuluxi wa wena Lonkulu. Hi yona mhaka leyi Xikwembu xi rhumeleke voko ri ta tsala marito lawa.

Daniyele u te: ‘Hi leswi leswi tsariweke, MENE, MENE, TEKELE na PARISINI.

‘MENE swi vula leswaku Xikwembu xi hlaye masiku ya mfumo wa wena naswona wu fike emakumu. TEKELE swi vula leswaku u kariwile eswikalweni kutani u kumiwe u nga ri munhu lonene. PARISINI swi vula leswaku mfumo wa wena wu nyikiwe Vameda ni Vaperesiya.’

Loko Daniyele a ha vulavula, Vameda ni Vaperesiya a va sungule ku hlasela Babilona. Va teke muti kutani va dlaya Belxatsara. Marito lama tsariweke ekhumbini ma hetiseke hi vusiku byebyo! Kambe, xana a ku ta humelela yini hi Vaisrayele hi nkarhi wolowo? Hi ta swi vona, kambe a hi sunguleni hi ku vona leswi humeleleke eka Daniyele.

Daniyele 5:1-31.



Swivutiso

  • Xana ku humelele yini loko hosi ya le Babilona yi ri ni nkhuvo lowukulu naswona yi ri karhi yi tirhisa swinwelo ni minkambana leyi tekiweke etempeleni ya Yehovha eYerusalema?
  • Xana Belxatsara u te yini eka vavanuna wa yena vo tlhariha, kambe i yini leswi va tsandzekeke ku swi endla?
  • Xana mana wa hosi u n’wi byele ku endla yini?
  • Hi ku ya hi leswi Daniyele a swi byelaka hosi, ha yini Xikwembu xi rhumele voko leswaku ri tsala ekhumbini?
  • Xana Daniyele u ma hlamusele njhani marito lama nga ekhumbini?
  • Ku humelele yini loko Daniyele a ha vulavula?

Swivutiso swo engetela

  • Hlaya Daniyele 5:1-31.

    Hlamusela ku hambana exikarhi ka ku chava Xikwembu ni ku chava loku Belxatsara a veke na kona loko a vona voko ri tsala ekhumbini.

    Xana Daniyele u xi kombise njhani xivindzi loko a vulavula na Belxatsara ni vavanuna va yena?

    Xana Daniyele ndzima 5 yi byi kandziyisa njhani vuhosi bya vuako hinkwabyo bya Yehovha?