Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 77: Va Arile Ku Nkhinsama

Dyondzo 77: Va Arile Ku Nkhinsama

Xana wa ti tsundzuka timhaka ta majaha lawa manharhu? I vanghana va Daniyele lava aleke ku dya swakudya leswi nga riki swinene eka vona. Vababilona a va va vitana Xadraka, Mixaka na Abedinigo. Kambe va langute sweswi. Ha yini va ale ku nkhinsamela xifaniso lexi lexikulu ku fana ni vanhu lavan’wana hinkwavo? A hi voneni.

Xana wa ha yi tsundzuka milawu leyi Yehovha a yi tsaleke hi yexe leyi vuriwaka Swileriso swa Khume? Xo sungula xa swileriso leswi xi ri: ‘U nga tshuki u gandzela swikwembu swin’wana handle ka mina.’ Majaha lawa ma wu yingisile nawu lowu, hambileswi a swi nga olovi ku endla tano.

Nebukadnetsara, hosi ya le Babilona u vitane vanhu vo tala lava xiximekaka leswaku va ta nkhinsamela xifaniso lexi a xi endleke. Wa ha ku heta ku byela vanhu hinkwavo a ku: ‘Loko mi twa mpfumawulo wa tinanga, tiharipa ni mixaka hinkwayo ya swichayachayana swa vuyimbeleri, mi fanele mi wela ehansi, mi gandzela xifaniso lexi xa nsuku. Kutani loyi a nga ta ka a nga weli ehansi a xi gandzela, hi nkarhi wolowo u ta hoxiwa ekheleni ra ndzilo lowu pfurhaka.’

Loko Nebukadnetsara a kuma leswaku Xadraka, Mixaka na Abedinigo a va xi gandzelanga, u hlundzuke ngopfu. U lerise leswaku va tisiwa eka yena. U tlhele a va nyika nkarhi wun’wana leswaku va xi gandzela. Kambe majaha lawa a ma tshemba Yehovha. Ma byele Nebukadnetsara ma ku: ‘Xikwembu xa hina lexi hi xi tirhelaka xa swi kota ku hi ponisa. Kambe, hambiloko xi nga hi ponisi, a hi nge xi nkhinsameli xifaniso xa wena xa nsuku.’

Xadraka, Mixaka na Abedinigo

Loko Nebukadnetsara a twa sweswo, u lo nyanya ku hlundzuka. A ku ri ni khele ra ndzilo ekusuhi, hiloko a lerisa a ku: ‘Hlanganyetani khele ra ndzilo leswaku ri hisa hilaha ku phindhiweke ka nkombo eka ku hisa ka rona loku tolovelekeke!’ Kutani u byele vavanuna va matimba swinene evuthwini rakwe leswaku va boha Xadraka, Mixaka na Abedinigo, kutani va va hoxa ekheleni ra ndzilo. Khele rero a ri hisa ngopfu lerova vavanuna volavo va matimba va dlayiwe hi malangavi ya ndzilo. Kambe ku humelele yini hi majaha manharhu lawa va ma hoxeke kwalaho?

Loko hosi yi languta ekheleni, yi chave ngopfu. Yi vutise yi ku: ‘Xana a hi bohanga vavanuna vanharhu hi va hoxa ekheleni ra ndzilo lowu pfurhaka?’

Malandza yakwe ma hlamule ma ku: ‘Ina, a va ri vanharhu.’

Hiloko yi ku: ‘Kambe ndzi vona vavanuna va mune va famba-famba exikarhi ka ndzilo. A va bohiwanga naswona ndzilo a wu va hisi. Naswona lowa vumune u languteka ku fana ni xikwembu.’ Kutani hosi yi tshinela enyangweni wa khele ra ndzilo kutani yi huwelela yi ku: ‘Xadraka! Mixaka! Abedinigo! Humani mi ta laha, n’wina malandza ya Xikwembu Lexi nge Henhla-henhla!’

Kutani loko va huma, un’wana ni un’wana u swi vonile leswaku a va tshwanga. Hiloko hosi yi ku: ‘A ku dzunisiwe Xikwembu xa Xadraka, Mixaka na Abedinigo! Xi rhumele ntsumi ya xona kutani xi va ponisa hikuva va arile ku tirhela ni ku gandzela xikwembu xin’wana handle ka Xikwembu xa vona.’

Hakunene lexi i xikombiso lexinene xa ku tshembeka eka Yehovha lexi hi faneleke hi xi tekelela!

Eksoda 20:3; Daniyele 3:1-30.



Swivutiso

  • Hi xihi xileriso lexi Nebukadnetsara, hosi ya Babilona, a xi nyikeke vanhu?
  • Ha yini vanghana va Daniyele vanharhu va nga xi nkhinsameli xifaniso xa nsuku?
  • Loko Nebukadnetsara a nyike Vaheveru vanharhu nkarhi wun’wana wo nkhinsama, xana va swi kombise njhani leswaku va tshemba Yehovha?
  • Xana Nebukadnetsara u byele vavanuna va yena leswaku va va endla yini Xadraka, Mixaka na Abedinigo?
  • Xana Nebukadnetsara u vone yini loko a languta ekheleni ra ndzilo?
  • Ha yini hosi yi dzunise Xikwembu xa Xadraka, Mixaka na Abedinigo, naswona hi xihi xikombiso lexi va hi vekelaka xona?

Swivutiso swo engetela

  • Hlaya Daniyele 3:1-30.

    Hi rihi langutelo leri kombisiweke hi vantshwa vanharhu va Vaheveru leri malandza hinkwawo ya Xikwembu ma faneleke ma ri tekelela loko ma ringiwa ku tshembeka ka wona?

    Hi yihi dyondzo ya nkoka leyi Yehovha Xikwembu a yi dyondziseke Nebukadnetsara?

DYONDZA SWO TALA

Ku Ponisiwa eKheleni Ra Ndzilo!

Dyondza leswaku ha yini swi ri swa nkoka ku yimelela leswi u kholwaka eka swona.