Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 76: Yerusalema Yi Lovisiwa

Dyondzo 76: Yerusalema Yi Lovisiwa

Ku hundze malembe yo tlula khume Hosi Nebukadnetsara a yise tintlhari hinkwato ta le Israyele eBabilona. Vona leswi humeleleke sweswi! Yerusalema yi hisiwile. Vaisrayele lava poneke va yisiwe evuhlongeni eBabilona.

Tsundzuka, leswi hi leswi vaprofeta va Yehovha va vuleke leswaku swi ta humelela loko vanhu va nga hundzuki etindleleni ta vona to homboloka. Kambe Vaisrayele a va va yingisanga vaprofeta. Va hambete va gandzela swikwembu swa mavunwa ematshan’weni ya Yehovha. Xisweswo vanhu volavo a va fanele va xupuriwa. Ha swi tiva leswi hikuva muprofeta wa Xikwembu Hezekiya u hi byela hi swilo swo biha leswi Vaisrayele a va swi endla.

Xana wa n’wi tiva Hezekiya? Hi un’wana wa majaha lama Hosi Nebukadnetsara a ma yiseke eBabilona eka malembe ya khume lama hundzeke, Yerusalema ri nga si lovisiwa. Daniyele ni vanghana va yena vanharhu, Xadraka, Mixaka na Abedinigo, na vona a va yisiwe eBabilona hi nkarhi wolowo.

Loko Hezekiya a ha ri eBabilona, Yehovha u n’wi kombe swilo swo biha leswi endlekaka etempeleni ya le Yerusalema. Yehovha u n’wi kombe swona hi xivono. Hezekiya a ha ri eBabilona, kambe Yehovha u n’wi kombe hinkwaswo leswi a swi endleka etempeleni. Leswi Hezekiya a swi voneke a swi chavisa!

Yehovha u byele Hezekiya a ku: ‘Vona swilo leswi nyenyetsaka leswi vanhu lava va swi endlaka etempeleni. Vona makhumbi ma tele hi swifaniso swa tinyoka ni swiharhi. Vona Vaisrayele va le ku swi gandzeleni!’ Hezekiya a a swi vona swilo leswi, kutani u tsale leswi a swi endleka.

Vakhotsiwa va huma eYerusalema

Yehovha u vutise Hezekiya a ku: ‘Xana wa swi vona leswi varhangeri va Vaisrayele va swi endlaka exihundleni?’ Ina, na yena a a swi vona. Ku ni vavanuna va 70, naswona hinkwavo a va gandzela swikwembu swa mavunwa. A va ku: ‘Yehovha a nga hi voni. U siye tiko leri.’

Kutani Yehovha u kombe Hezekiya vavasati van’wana lava nga enyangweni ya tempele ya le n’walungwini. A va tshame kwalaho va gandzela Tamuzi xikwembu xa mavunwa. Nakambe vona vavanuna lavaya va nga enyangweni ya le tempeleni ya Yehovha! Vavanuna volavo a va ri kwalomu ka 25. Hezekiya a a va vona. A va nkhinsame va languta evuxeni va gandzela dyambu!

Yehovha u te: ‘Vanhu lava a va ndzi xiximi. A va endli swilo swo homboloka ntsena kambe va swi endla etempeleni ya mina!’ Kutani Yehovha u tshembise a ku: ‘Ndzi ta va hlundzukela ngopfu. A ndzi nge va tweli vusiwana loko va lovisiwa.’

Endzhaku ka malembe manharhu Yehovha a kombe Hezekiya swilo leswi, Vaisrayele va pfukele Hosi Nebukadnetsara. Kutani u lwe na vona. Endzhaku ka lembe ni hafu Vababilona va nghene eYerusalema va hisa muti hinkwawo. Ku dlayiwe vanhu vo tala naswona van’wana va yisiwe evuhlongeni eBabilona.

Ha yini Yehovha a pfumelele khombo ro tano ri wela Vaisrayele? Ina, hikuva a va n’wi yingisanga Yehovha naswona a va yi yingisanga milawu ya yena. Leswi swi hi kombisa leswaku i swa nkoka ku endla leswi Xikwembu xi swi vulaka nkarhi hinkwawo.

Eku sunguleni ku pfumeleriwe vanhu va nga ri vangani leswaku va tshama etikweni ra Israyele. Hosi Nebukadnetsara u veke Muyuda la vuriwaka Gedaliya leswaku a va mulawuri wa vanhu lava. Kambe Vaisrayele van’wana va dlaye Gedaliya. Hi nkarhi wolowo vanhu a va chava leswaku Vababilona va ta ta va ta va lovisa hinkwavo hikwalaho ka nchumu lowu wo biha lowu humeleleke. Xisweswo va sindzise Yeremiya leswaku a baleka na vona va ya Egipta.

Leswi swi endle leswaku tiko ra Israyele ri sala ri nga ri na munhu. Ku hele malembe ya 70 ku nga tshami munhu etikweni rero. A ku lo cowe! Kambe Yehovha a a tshembise leswaku u ta vuyisa vanhu va yena etikweni rero endzhaku ka malembe ya 70. Hi nkarhi wolowo, xana a ku humelela yini eka vanhu va Xikwembu etikweni ra Babilona laha va yisiweke kona? A hi voneni.

2 Tihosi 25:1-26; Yeremiya 29:10; Hezekiya 1:1-3; 8:1-18.



Swivutiso

  • I yini leswi humelelaka hi muti wa Yerusalema swin’we ni Vaisrayele lava nga exifanisweni lexi?
  • I mani Ezekiyele, naswona hi swihi swilo leswi chavisaka leswi Yehovha a n’wi kombeke swona?
  • Leswi Vaisrayele va nga n’wi xiximiki Yehovha, xana u va tshembisa yini?
  • Xana Hosi Nebukadnetsara u endla yini endzhaku ka loko Vaisrayele va n’wi xandzukerile?
  • Ha yini Yehovha a pfumelele ndzoviso lowu wo chavisa wu wela Vaisrayele?
  • Swi endlekise ku yini leswaku tiko ra Israyele ri sala ri ri hava vanhu, naswona swi ve tano nkarhi wo tanihi kwihi?

Swivutiso swo engetela

  • Hlaya 2 Tihosi 25:1-26.

    Sedekiyasi a a ri mani, ku humelele yini ha yena, naswona mhaka leyi yi byi hetisisa njhani vuprofeta bya Bibele?

    I mani loyi Yehovha a n’wi voneke nandzu malunghana ni swilo hinkwaswo swo biha leswi Vaisrayele va swi endleke?

  • Hlaya Ezekiyele 8:1-18.

    Xana Vujagana byi va tekelele njhani Vaisrayele lava a va gandzela dyambu?