Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 75: Majaha Ya Mune eBabilona

Dyondzo 75: Majaha Ya Mune eBabilona

Hosi Nebukadnetsara u teke tintlharhi hinkwato ta le Israyele a ti yisa eBabilona. Endzhakunyana hosi yi hlawule majaha layo saseka ngopfu exikarhi ka tintlharhi teto. Man’wana ya wona a ku ri majaha ya mune lawa u ma vonaka laha. Un’wana wa vona i Daniyele, kasi lavan’wana vanharhu Vababilona va va thye leswaku i Xadraka, Mixaka na Abedinigo.

Nebukadnetsara a a kunguhata ku dyondzisa majaha lawa ku tirha endlwini yakwe ya vuhosi. Endzhaku ko ma letela malembe manharhu a a ta hlawula lama tlhariheke ngopfu leswaku ma n’wi pfuna ku tlhantlha swiphiqo. Hosi a yi lava leswaku majaha lawa ma va ni matimba ni rihanyo lerinene loko ma ri karhi ma leteriwa. Kutani yi lerise malandza ya yona leswaku ma va nyika swakudya leswi fuweke ni vhinyo swo fana ni leswi dyiwaka hi hosi ni ndyangu wa yona.

Daniyele, Xadraka, Mixaka na Abedinigo va ri karhi va hlamusela leswi va pfumelaka eka swona

Languta jaha leri va nge i Daniyele. Xana wa swi tiva leswaku u te yini eka Axipenazi mutirhi lonkulu wa Nebukadnetsara? Daniyele u n’wi byele leswaku a nga swi lavi ku dya swakudya leswo nona swa le tafuleni ra hosi. Axipenazi u karhatekile. U te: ‘Hosi yi lerise leswaku mi fanele ku dya ni ku nwa yini. Naswona loko mi nga languteki mi hanye kahle ku fana ni majaha man’wana, yi ta ndzi dlaya.’

Kutani Daniyele u ye eka murindzi la vekiweke hi Axipenazi leswaku a langutela yena ni vanghana vakwe vanharhu. U fike a ku eka yena: ‘Ndzi kombela u hi ringa ku ringana masiku ya khume. Hi nyike matsavu hi dya wona, hi nwa ni mati. Kutani u hi pimanisa ni majaha laman’wana lama dyaka swakudya swa hosi, u vona leswaku hi vahi lava nga ta languteka va hanye kahle.’

Murindzi u pfumerile ku endla tano. Endzhaku ka masiku ya khume, Daniyele ni vanghana va yena vanharhu a va languteka va hanye kahle ku tlula majaha laman’wana. Kutani murindzi u va tshike va ya emahlweni va dya matsavu ematshan’weni ya swakudya swa hosi.

Endzhaku ka malembe manharhu majaha hinkwawo ma yisiwe eka Nebukadnetsara. Loko hosi yi vulavule na vona hinkwavo, yi kume leswaku Daniyele ni vanghana vakwe vanharhu a va tlharihe ku tlula hinkwavo. Kutani yi va hlayisile leswaku va yi pfuna endlwini ya vuhosi. Naswona nkarhi hinkwawo loko hosi yi vutisa Daniyele, Xadraka, Mixaka na Abedinigo swivutiso kumbe mhaka yo tika leswaku va yi tlhantlha, a va yi tiva hilaha ku phindhekeke ka khume ku tlula vaprista kumbe vavanuna va yona vo tlhariha.

Daniyele 1:1-21.



Swivutiso

  • I vamani majaha ya mune lama nga laha xifanisweni, naswona ha yini ma ri eBabilona?
  • Hi wahi makungu lama Nebukadnetsara a nga na wona malunghana ni majaha lawa ya mune, naswona u ma lerise yini malandza yakwe?
  • Hi xihi xikombelo lexi Daniyele a xi endleke malunghana ni swakudya ni swakunwa swakwe swin’we ni swa vanghana va yena vanharhu?
  • Endzhaku ko dya matsavu ku ringana masiku ya khume, xana Daniyele ni vanghana va yena vanharhu a va hambane njhani ni majaha laman’wana?
  • Xana Daniyele ni vanghana vakwe vanharhu va fike njhani endlwini ya vuhosi, naswona a va tlula vaprista ni vavanuna vo tlhariha hi ndlela yihi?

Swivutiso swo engetela

  • Hlaya Daniyele 1:1-21.

    Hi wahi matshalatshala lama lavekaka loko hi lava ku hlula miringo ni ku tsana?

    Xana vantshwa namuntlha va nga ringeka kumbe ku tshikileleka hi tindlela tihi leswaku va tipeta eka leswi van’wana va swi tekaka ku ri “switshongo”?

    Xana rungula ra le Bibeleni ra vantshwa va mune va Vaheveru ri hi pfuna njhani malunghana ni tidyondzo ta misava?