Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 72: Xikwembu Xi Pfuna Hosi Hezekiya

Dyondzo 72: Xikwembu Xi Pfuna Hosi Hezekiya

Xana wa swi tiva leswaku ha yini wanuna loyi a khongela eka Yehovha? Ha yini a veke mapapila lawa emahlweni ka alitari ya Yehovha? Wanuna loyi i Hezekiya. I hosi ya mfumo wa le dzongeni wa tinyimba timbirhi eIsrayele. Naswona u le khombyeni lerikulu. Ha yini?

Hosi Hezekiya a ri eku khongeleni

Hikuva mavuthu ya Vaasiriya ma lovise mfumo wa le n’walungwini wa tinyimba ta khume. Yehovha u va tshikile va wu lovisa hikuva vanhu volavo a va homboloke ngopfu. Sweswi mavuthu ya Vaasiriya ma lava ku lwa ni mfumo wa tinyimba timbirhi.

Hosi ya le Asiriya ya ha ku rhumela mapapila eka Hosi Hezekiya. Lawa i mapapila lawa Hezekiya a ma vekeke emahlweni ka Xikwembu. Mapapila lawa a ma sandza Yehovha ni ku byela Hezekiya leswaku a tshika ku lwa. Hi yona mhaka leyi Hezekiya a khongeleke a ku: ‘Oho Yehovha, hi ponise eka hosi ya Asiriya. Xisweswo matiko hinkwawo ma ta swi tiva leswaku hi wena Xikwembu u ri wexe.’ Xana Yehovha a a ta n’wi yingisa Hezekiya?

Hezekiya i hosi leyinene. A nga fani ni tihosi to biha ta mfumo wa tinyimba ta khume ta Israyele, kumbe tata wakwe wo biha Hosi Akazi. Hezekiya a a yingisa milawu ya Yehovha hinkwayo. Xisweswo loko Hezekiya a heta ku khongela, muprofeta Esaya u n’wi rhumele rungula leri humaka eka Yehovha: ‘Hosi ya Asiriya a yi nge ngheni eYerusalema. Ku hava ni socha ni rin’we ra yona leri nga ta tshinela. A va nge wu copi nseve ni wun’we emutini.’

Languta xifaniso lexi nga eka tluka leri. Xana wa ma tiva masocha lawa lama feke? I Vaasiriya. Yehovha u rhumele ntsumi ya yena, kutani yi dlaye masocha ya Vaasiriya ya 185 000 hi vusiku byin’we. Kutani hosi ya Vaasiriya yi lan’wile yi tlhelela ekaya.

Masocha ya Vaasiriya lama feke

Mfumo wa tinyimba timbirhi wu ponile, naswona vanhu va ve ni ku rhula ku ringana nkarhinyana. Kambe endzhaku ka ku fa ka Hezekiya, n’wana wakwe Manase u ve hosi. Manase ni n’wana wakwe Amoni la fumeke endzhaku ka yena, havumbirhi va ve tihosi to biha. Nakambe tiko ri funengetiwe hi vugevenga ni tinyimpi. Endzhaku ka loko Hosi Amoni a dlayiwe hi malandza yakwe, n’wana wakwe Yosiya u ve hosi ya mfumo wa tinyimba timbirhi.

2 Tihosi 18:1-36; 19:1-37; 21:1-25.



Swivutiso

  • I mani wanuna loyi a nga exifanisweni, naswona ha yini a ri ekhombyeni lerikulu?
  • I mapapila ya yini lawa Hezekiya a ma vekeke emahlweni ka Xikwembu, naswona Hezekiya u khongelela yini?
  • Xana Hezekiya i hosi ya njhani, naswona hi rihi rungula leri Yehovha a ri rhumeleke eka yena hi ku tirhisa muprofeta Esaya?
  • Xana ntsumi ya Yehovha yi va endle yini Vaasiriya, hilaha swi kombisiweke hakona exifanisweni?
  • Hambileswi mfumo wa tinyimba timbirhi a wu ri ni ku rhula swa xinkarhana, xana ku humelele yini endzhaku ka ku fa ka Hezekiya?

Swivutiso swo engetela

  • Hlaya 2 Tihosi 18:1-36.

    Xana Rabuxake lowa muvulavuleri wa Vaasiriya u ringete njhani ku tsanisa ripfumelo ra Vaisrayele?

    Xana Timbhoni ta Yehovha ti xi landzela njhani xikombiso xa Hezekiya loko ti tirhisana ni vakaneti?

  • Hlaya 2 Tihosi 19:1-37.

    Xana vanhu va Yehovha namuntlha va n’wi tekelela njhani Hezekiya eminkarhini ya maxangu?

    Hi tihi tinyimpi tinharhu leti Hosi Senakeribi a ti hluleke, naswona hi ku ya hi vuprofeta u fanekisela mani?

  • Hlaya 2 Tihosi 21:1-6, 16.

    Ha yini ku nga vuriwaka leswaku Manase a a ri un’wana wa tihosi to homboloka swinene leti tshameke ti fuma eYerusalema?