Nghena endzeni

Hundzela eka leswi nga endzeni

Timbhoni Ta Yehovha

Hlawula ririmi Xitsonga

Dyondzo 70: Yonasi Ni Nhlampfi Leyikulu

Dyondzo 70: Yonasi Ni Nhlampfi Leyikulu

Vona wanuna luya a nga ematini. U le khombyeni lerikulu, a hi swona ke? Nhlampfi liya yi lava ku n’wi mita! Xana wa n’wi tiva wanuna loyi? Vito ra yena i Yonasi. A hi voneni leswaku swi tise ku yini leswaku a va ekhombyeni lerikulu swonghasi.

Yonasi i muprofeta wa Yehovha. Endzhakunyana ka ku fa ka muprofeta Elixa, Yehovha u byele Yonasi a ku: ‘Yana emutini lowukulu wa Ninivha. Vubihi bya vanhu va kwalaho i byikulu ngopfu, naswona ndzi lava leswaku u vulavula na vona ha byona.’

Yonasi ni nhlampfi leyikulu

Kambe Yonasi a a nga swi lavi ku ya. Kutani u khandziye xikepe lexi yaka etlhelo leri hambaneke ni ra Ninivha. Yehovha a a nga tsakanga hileswi Yonasi a balekeke. Kutani U endle leswaku ku va ni xidzedze lexikulu. Xidzedze xa kona a xi ri xikulu ngopfu lerova xikepe a xi ri ekusuhi ni ku mbombomela. Vatluti a va chuhe ngopfu, kutani va kombela mpfuno eka swikwembu swa vona.

Eku heteleleni Yonasi a va byela a ku: ‘Ndzi gandzela Yehovha, Xikwembu lexi endleke tilo ni misava. Naswona ndzi le ndleleni yo baleka leswaku ndzi nga swi endli leswi Yehovha a ndzi rhumeke swona.’ Kutani vatluti va vutisa va ku: ‘Xana hi fanele hi ku endla yini leswaku xidzedze lexi xi miyela?’

Yonasi u te: ‘Ndzi lahleleni elwandle, kutani lwandle ri ta miyela.’ Vatluti a va nga swi lavi ku endla tano, kambe leswi xidzedze a xi ya xi nyanya ku biha, va hetelele va lahlele Yonasi ematini. Xikan’we-kan’we xidzedze xi miyela, lwandle ri tlhela ri rhula.

Loko Yonasi a ri karhi a nwela ematini, nhlampfi leyikulu yi n’wi mitile. Kambe a nga fanga. U tshame masiku manharhu ni vusiku byinharhu ekhwirini ra nhlampfi yoleyo. Yonasi u tisorile swinene hileswi a nga n’wi yingisangiki Yehovha naswona a nga yangiki eNinivha. Xana wa swi tiva leswaku u endle yini?

Yonasi u khongele eka Yehovha a kombela mpfuno. Kutani Yehovha u endle leswaku nhlampfi yi hlantela Yonasi emisaveni leyi omeke. Endzhaku ka sweswo Yonasi u ye eNinivha. Xana leswi a swi hi dyondzisi leswaku i swa nkoka njhani ku endla leswi Yehovha a vulaka leswaku hi swi endla?

Buku ya Bibele ya Yonasi.



Swivutiso

  • I mani Yonasi, naswona Yehovha u n’wi byele leswaku a endla yini?
  • Leswi a a nga swi lavi ku ya laha Yehovha a n’wi byeleke ku ya kona, xana Yonasi u endle yini?
  • Xana Yonasi u byele vatluti ku endla yini leswaku xidzedze xi ta miyela?
  • Hilaha u swi vonaka hakona exifanisweni, ku humelele yini loko Yonasi a mbombomela ematini?
  • Xana Yonasi u tshame nkarhi wo tanihi kwihi endzeni ka nhlampfi leyikulu, naswona u endle yini kwalaho?
  • Yonasi u ye kwihi endzhaku ko huma enhlampfini leyikulu, naswona hi dyondza yini eka leswi?

Swivutiso swo engetela

  • Hlaya Yonasi 1:1-17.

    Entiyisweni, Yonasi a a titwa njhani hi xiavelo xa yena xo chumayela vanhu va le Ninivha?

  • Hlaya Yonasi 2:1, 2, 10.

    Xana ntokoto wa Yonasi wu hi nyika ntshembo hi ndlela yihi leswaku Yehovha u ta swi hlamula swikhongelo swa hina?

  • Hlaya Yonasi 3:1-10.

    Hi xihi xikhutazo lexi hi xi kumaka hikwalaho ka leswi Yehovha a hambeteke a tirhisa Yonasi ku nga khathariseki leswi eku sunguleni a tsandzekeke ku hetisisa xiavelo xakwe?

    Xana ntokoto wa Yonasi eka Vaninivha wu hi dyondzisa yini malunghana ni ku avanyisa vanhu hi nga si vulavula na vona ensin’wini ya hina?