Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 69: Xinhwanyatana Xi Pfuna Nhenha

Dyondzo 69: Xinhwanyatana Xi Pfuna Nhenha

Xana wa swi tiva leswaku xinhwanyatana lexi xi ri yini? A xi byela wansati loyi hi ta Elixa muprofeta wa Yehovha, ni hi ta swilo swo hlamarisa leswi Yehovha a n’wi pfuneke ku swi endla. Wansati loyi a a nga n’wi tivi Yehovha hikuva a hi Muisrayele. A hi voneni leswaku ha yini xinhwanyatana lexi xi ri endlwini ya wansati loyi.

Wansati loyi a a ri Musiriya. Nuna wa yena i Namani, ndhuna ya vuthu ra Siriya. Vasiriya a va tise xinhwanyatana lexi xa Muisrayele evuhlongeni leswaku xi ta va nandza wa nkata Namani.

Nsati wa Namani ni nandza wakwe wa xisati

Namani a a ri ni vuvabyi byo chavisa bya nhlokonho. Vuvabyi lebyi byi nga ha endla leswaku nyama ya munhu yi wa. Kutani xinhwanyatana lexi xi byele nkata Namani xi ku: ‘Ndzi navela onge hosi yanga yi nga ya eka muprofeta wa Yehovha eIsrayele. A a ta yi hanyisa eka nhlokonho yakwe.’ Endzhakunyana hiloko va byela nuna wa wansati loyi.

Namani a a swi lava hi mbilu yakwe hinkwayo ku hanyisiwa; kutani u ye eIsrayele. Loko a fika kwalaho, u ye endlwini ya Elixa. Elixa u rhume nandza wakwe ku byela Namani leswaku a ya hlamba eNambyeni wa Yordani ka nkombo. Sweswo swi hlundzukise Namani swinene kutani a ku: ‘Milambu ya laha ndzi humaka kona yi yi tlula ekule milambu hinkwayo ya le Israyele!’ Endzhaku ko vula sweswo, Namani u suke a famba.

Kambe un’wana wa malandza ya yena u n’wi byele a ku: ‘Nkulukumba, loko Elixa a a ku byele ku endla nchumu wo nonon’hwa, a wu ta wu endla. Kutani, ha yini u nga hlambi hilaha a vuleke hakona?’ Namani u yingise nandza wakwe kutani a ya hlamba eNambyeni wa Yordani ka nkombo. Loko a hlamba, nyama yakwe yi tlhele yi tiya naswona a hola!

Namani u tsake ngopfu. U tlhelele eka Elixa, a ku eka yena: ‘Sweswi ndza swi tiva leswaku Xikwembu lexi nga eIsrayele hi xona Xikwembu xa ntiyiso emisaveni hinkwayo. Xisweswo, ndzi kombela u teka nyiko leyi.’ Kambe Elixa u hlamule a ku: ‘E-e, a ndzi nge yi teki.’ Elixa u swi vonile leswaku a swi ta va swi hoxile ku teka nyiko ya kona, hikuva i Yehovha a hanyiseke Namani. Kambe Gehazi nandza wa Elixa a a tilavela nyiko yoleyo.

Kutani Gehazi u endle leswi. Endzhaku ka loko Namani a fambile, Gehazi u tsutsumile a n’wi landza. Gehazi u fike a ku: ‘Elixa u te ndzi ta ku byela leswaku u kombela tin’wana ta tinyiko teto leswaku a ta ti nyika vanghana lava n’wi endzeleke.’ Lawa a ku ri mavunwa. Kambe Namani a a nga swi tivi leswaku wo hemba; kutani u nyike Gehazi tin’wana ta tinyiko teto.

Loko Gehazi a fika ekaya, Elixa u swi tivile leswi a swi endleke. Yehovha u n’wi byerile. Kutani u te: ‘Leswi u endleke swilo leswi swo biha, nhlokonho ya Namani yi ta ta eka wena.’ Xikan’we-kan’we, hiloko yi n’wi khoma!

Xana hi dyondza yini eka leswi? Xo sungula, hi fanele ku fana ni xinhwanyatana lexiya hi byela vanhu hi Yehovha. Hi nga vuyeriwa. Xa vumbirhi, a hi fanelanga hi tikurisa hilaha Namani a tikuriseke hakona eku sunguleni, kambe hi fanele ku yingisa malandza ya Xikwembu. Xa vunharhu, a hi fanelanga hi hemba ku fana na Gehazi. Xana a hi nge dyondzi swo tala hi ku hlaya Bibele?

2 Tihosi 5:1-27.



Swivutiso

  • Exifanisweni lexi, xana xinhwanyatana lexi xi n’wi byela yini wansati loyi?
  • I mani wansati la nga exifanisweni lexi, naswona xinhwanyatana lexi xi endla yini endlwini ya wansati loyi?
  • Xana Elixa u lerise nandza wakwe leswaku a ku yini eka Namani, naswona ha yini Namani a hlundzukile?
  • Xana ku humelele yini loko Namani a yingisa nandza wakwe?
  • Ha yini Elixa a ale nyiko ya Namani, kambe Gehazi u endle yini?
  • Ku humelele yini hi Gehazi, naswona hi nga dyondza yini emhakeni leyi?

Swivutiso swo engetela

  • Hlaya 2 Tihosi 5:1-27.

    Xana xikombiso lexi vekiweke hi xinhwanyatana xa Muisrayele xi nga va khutaza njhani vantshwa namuntlha?

    Ha yini swi ri swinene ku tshama hi ri karhi hi tsundzuka xikombiso xa Namani loko hi kuma ndzayo ya Matsalwa?

    Hi dyondza yini eka xikombiso xa Elixa ni lexiya xa Gehazi?

DYONDZA SWO TALA

Yehovha U Ta Ku Pfuna Leswaku U Nga Chavi Ku Vulavula Hi Yena

I yini lexi nga ku pfunaka leswaku u nga chavi ku byela van’wana hi Yehovha?

Ku Hanyisiwa Ka Munhu Wa Nhlokonho!

Dyondza eka leswi Namani a a fanele a swi endla leswaku a kota ku hanyisiwa eka vuvabyi bya nhlokonho.

Gehazi A Vulavula Mavunwa

Hi wahi mavunwa lama Gehazi a ma vulavuleke? Printa xifaniso lexi, hlanganisa mathosi kutani u dyondza eka rungula ra Bibele.”