Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 68: Ku Pfuxiwa Ka Vafana Vambirhi

Dyondzo 68: Ku Pfuxiwa Ka Vafana Vambirhi

Loko wo fa, xana mana wa wena a nga titwa njhani loko wo pfuxiwa? A nga tsaka swinene! Xana munhu la feke a nga tlhela a hanya? Xana swi tshame swi humelela?

Languta wanuna loyi laha, wansati loyi ni xifanyetana lexi. Wanuna loyi i muprofeta Eliya. Wansati loyi i noni ya le mutini wa Sarepta, kasi xifanyetana lexi i n’wana wa yena. Siku rin’wana mufana loyi u vabyile. U vabye swinene kukondza a fa. Eliya u byele wansati loyi a ku: ‘Tisa mufana loyi eka mina.’

Eliya a ri ni noni ni n’wana wa yona la pfuxiweke

Eliya u teke n’wana la feke a ya na yena ekamareni ra le henhla a fika a n’wi etlerisa emubedweni. Kutani a khongela a ku: ‘Oho Yehovha, pfuxa mufana loyi.’ Hiloko mufana loyi a sungula ku hefemula! Kutani Eliya a teka mufana loyi a ya na yena ekamareni ra le hansi kutani a ku eka wansati loyi: ‘Vona, n’wana wa wena wa hanya!’ Hi yona mhaka leyi manana loyi a tsakeke ngopfu.

Muprofeta un’wana wa Yehovha i Elixa. I mupfuni wa Eliya. Kambe hi ku famba ka nkarhi Yehovha u tirhise Elixa ku endla masingita. Siku rin’wana Elixa u ye emutini wa Xunemi, laha wansati un’wana a n’wi amukeleke hi malwandla. Endzhakunyana wansati loyi u kume n’wana wa mufana.

Siku rin’wana loko n’wana se a kurile, u fambile a ya tirha ni tata wakwe emasin’wini. Xikan’we-kan’we mufana u rilile a ku: ‘Nhloko ya mina ya pandza!’ Endzhaku ka loko va n’wi yise ekaya, u file. Mana wakwe u ve ni gome swinene! Hi ku hatlisa u fambile a ya vitana Elixa.

Loko Elixa a fika, u nghene ekamareni leri a ku ri ni n’wana la feke. U khongele eka Yehovha, kutani a pavalala ehenhla ka n’wana. Endzhakunyana miri wa mufana wu sungule ku kufumela, kutani a entshemula ka nkombo. Mana wakwe u tsake ngopfu loko a nghena kutani a kuma n’wana wakwe a hanya!

Vanhu vo tala ngopfu va file. Sweswo swi endle leswaku vandyangu ni vanghana va va ni gome swinene. A hi na wona matimba yo pfuxa lava feke. Kambe Yehovha u na wona. Hi ku famba ka nkarhi hi ta dyondza hi ndlela leyi a nga ta va pfuxa ha yona vanhu va timiliyoni lava feke.

1 Tihosi 17:8-24; 2 Tihosi 4:8-37.


Swivutiso

  • I vamani vanhu lavanharhu laha xifanisweni, naswona ku humelela yini eka xifanyetana lexi?
  • Xana Eliya u khongele a ku yini malunghana ni xifanyetana lexi, naswona i yini leswi humeleleke endzhaku ka sweswo?
  • I mani vito ra mupfuni wa Eliya?
  • Ha yini Elixa a vitaniwe ekaya ra wansati wa le Xunemi?
  • Xana Elixa u endle yini, naswona ku humelela yini hi n’wana la feke?
  • I matimba ya njhani lawa Yehovha a nga na wona, hilaha ma kombisiweke hakona hi ku tirhisa Eliya na Elixa?

Swivutiso swo engetela

  • Hlaya 1 Tihosi 17:8-24.

    Xana ku yingisa ka Eliya swin’we ni ripfumelo rakwe swi ringiwe njhani?

    Ha yini ripfumelo ra noni ya le Sarepta a ri hlamarisa?

    Xana ntokoto wa noni ya le Sarepta wu swi kombise njhani leswaku marito ya Yesu lama rhekhodiweke eka Matewu 10:41, 42 i ntiyiso?

  • Hlaya 2 Tihosi 4:8-37.

    Xana wansati wa le Xunemi u hi dyondzisa yini malunghana ni malwandla?

    Xana hi tihi tindlela leti hi nga kombisaka musa ha tona eka malandza ya Xikwembu namuntlha?

DYONDZA SWO TALA

SWITOLOVETO SWA TIMHAKA TA BIBELE

Yimela Vukhongeri Bya Ntiyiso

U nga xi kombisa njhani xivindzi evuton’wini bya wena loko swi ta emhakeni ya vukhongeri?