Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 67: Yehoxafati A Tshemba Yehovha

Dyondzo 67: Yehoxafati A Tshemba Yehovha

Xana wa va tiva vavanuna lava nileswaku va endla yini? A va ya enyimpini, naswona lava nga emahlweni a va ri karhi va yimbelela. Kambe u nga ha vutisa: ‘Ha yini lava yimbelelaka a va nga ri na matlhari yo lwa ha wona?’ A hi voneni.

Vaisrayele va macha va ya eku lweni

Yehoxafati a a ri hosi ya mfumo wa tinyimba timbirhi ta Israyele. U hanye enkarhini wa Hosi Akabu na Yezabele va mfumo wa tinyimba ta khume wa le n’walungwini. Kambe Yehoxafati a a ri hosi leyinene, ni tata wakwe Asa a a ri hosi leyinene. Ku hundze malembe yo tala vanhu va mfumo wa tinyimba timbirhi ta le dzongeni va hanya kahle.

Kambe sweswi ku humelele swin’wana leswi chaviseke vanhu. Varhumiwa va byele Yehoxafati va ku: ‘Vuthu lerikulu leri humaka etikweni ra Mowabu, ra Amone ni le ndhawini ya Tintshava ya Seyiri ri le ku teni leswaku ri ta ku hlasela.’ Vaisrayele vo tala va hlengeletane eYerusalema leswaku va ya kombela mpfuno eka Yehovha. Va ye etempeleni, kwalaho Yehoxafati u fike a khongela a ku: ‘Oho Yehovha Xikwembu xa hina, a hi swi tivi leswi hi faneleke hi swi endla. A hi na matimba emahlweni ka vuthu leri lerikulu. Hi kombela mpfuno eka wena.’

Yehovha u yingisile, kutani u lerise un’wana wa malandza ya yena leswaku a byela vanhu a ku: ‘Nyimpi a hi ya n’wina, kambe i ya Xikwembu. A mi nge lwi. Langutani, mi vona ndlela leyi Yehovha a nga ta mi ponisa ha yona.’

Xisweswo hi siku leri landzelaka Yehoxafati u byele vanhu a ku: ‘Tshembani Yehovha!’ Kutani u veke vayimbeleri emahlweni ka masocha, va famba va ri karhi va yimbelelela Yehovha swidzuniso. Xana wa swi tiva leswaku ku humelele yini loko va fika ekusuhi ni laha nyimpi a yi lweriwa kona? Yehovha u endle leswaku masocha ya valala ma lwa hi xiwona. Loko Vaisrayele va fika va kume leswaku masocha hinkwawo ya valala ma file!

Xana Yehoxafati a a nga tlharihanga leswi a tshembeke Yehovha? Na hina hi ta tlhariha loko hi tshemba Yena.

1 Tihosi 22:41-53; 2 Tikronika 20:1-30.


Swivutiso

  • Xana Yehoxafati a a ri mani, naswona u hanye enkarhini wihi?
  • Ha yini Vaisrayele va chuhile, naswona xana vo tala eka vona va endle yini?
  • Xana Yehovha u xi hlamurise ku yini xikhongelo xa Yehoxafati?
  • I yini leswi Yehovha a endleke leswaku swi humelela loko nyimpi yi nga si sungula?
  • Hi yihi dyondzo leyi hi yi kumaka emhakeni ya Yehoxafati?

Swivutiso swo engetela

  • Hlaya 2 Tikronika 20:1-30.

    Xana Yehoxafati u swi kombise njhani leswi malandza yo tshembeka ya Xikwembu ma faneleke ma swi endla loko ma langutane ni swiyimo leswi xungetaka?

    Tanihi leswi minkarhi hinkwayo Yehovha a a tirhisa ndlela yo karhi leswaku a vulavurisana ni vanhu va yena, hi yihi ndlela leyi a yi tirhisaka namuntlha?

    Loko Xikwembu xi lwa “nyimpi ya siku lerikulu ra Xikwembu xa Matimba Hinkwawo,” xana xiyimo xa hina xi ta fana njhani ni lexiya xa Yehoxafati?

    Xana maphayona ni varhumiwa va hoxa xandla hi ndlela yihi entirhweni wo chumayela wa misava hinkwayo namuntlha tanihi leswi ma tekelelaka Valevhi?