Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 65: Mfumo Wu Avana

Dyondzo 65: Mfumo Wu Avana

Xana wa swi tiva leswaku hikwalaho ka yini wanuna loyi a handzula nguvu ya yena yi va swiphemu-phemu? U byeriwe hi Yehovha leswaku a endla tano. Wanuna loyi i Ahiya, muprofeta wa Xikwembu. Xana wa swi tiva leswaku muprofeta i yini? I munhu loyi Xikwembu xi n’wi byelaka ka ha ri emahlweni leswi nga ta humelela.

Ahiya na Yerobuwamu

Laha Ahiya a a vulavula na Yerobuwamu. Yerobuwamu i wanuna loyi Solomoni a n’wi hlawuleke leswaku a langutela ntirho wakwe wo aka. Loko Ahiya a hlangana na Yerobuwamu laha ndleleni, Ahiya u endle nchumu wo hlamarisa. U hluvule nguvu leyintshwa leyi a a yi ambarile a yi handzula yi va swiphemu swa 12. Kutani a ku eka Yerobuwamu: ‘Titekele swiphemu swa 10.’ Xana wa swi tiva leswaku hikwalaho ka yini Ahiya a nyike Yerobuwamu swiphemu swa 10?

Ahiya u vule leswaku Yehovha u ta tekela Solomoni vuhosi. U vule leswaku Yehovha u ta nyika Yerobuwamu tinyimba ta 10. Leswi vulaka leswaku ku ta sala tinyimba timbirhi ntsena leti nga ta fuma hi Rehobuwama n’wana Solomoni.

Loko Solomoni a twe leswi Ahiya a swi byeleke Yerobuwamu, u hlundzuke swinene. Kutani u ringete ku dlaya Yerobuwamu. Kambe Yerobuwamu u balekele Egipta. Endzhakunyana hiloko Solomoni a fa. U fume 40 wa malembe, naswona n’wana wakwe Rehobuwama u ve hosi endzhaku ka yena. Loko Yerobuwamu a ri aEgipta u twe leswaku Solomoni u file, u tlhelele eIsrayele.

Rehobuwama a a nga ri hosi leyinene. A a khome vanhu hi tihanyi ku tlula tata wakwe Solomoni. Yerobuwamu ni vakulukumba van’wana va ye eka Hosi Rehobuwama va ya n’wi kombela leswaku a khoma vanhu hi ndlela leyinene. Kambe Rehobuwama a nga yingisanga. Ematshan’weni ya sweswo, u ve ni tihanyi ku tlurisa. Kutani vanhu va endle Yerobuwamu a va hosi eka tinyimba ta 10, kambe Rehobuwama u fume tinyimba timbirhi, ya Benjamini ni ya Yuda.

Yerobuwamu a a nga swi lavi leswaku vanhu va yena va ya eYerusalema va ya gandzela etempeleni ya Yehovha. Hikwalaho u endle marhole mambirhi ya nsuku leswaku vanhu va tinyimba ta 10 va ma gandzela. Endzhakunyana tiko ri tale hi vugevenga ni tinyimpi.

Nakambe a ku ri ni xiphiqo ni le ka mfumo wa tinyimba timbirhi. Ku nga si hela ntlhanu wa malembe Rehobuwama a ri hosi, hosi ya Egipta yi hlasele Yerusalema. Yi teke rifuwo ro tala etempeleni ya Yehovha. Tempele yi tshame xinkarhana yi ri leswi a yi ri xiswona eku sunguleni.

1 Tihosi 11:26-43; 12:1-33; 14:21-31.



Swivutiso

  • I vamani mavito ya vavanuna vambirhi lava nga laha xifanisweni, naswona ntirho wa vona i yini?
  • Xana Ahiya u endle yini hi nguvu leyi a a yi ambarile, naswona xiendlo xexo a xi vula yini?
  • Solomoni u ringete ku n’wi endla yini Yerobuwamu?
  • Ha yini vanhu va endle Yerobuwamu hosi eka tinyimba ta khume?
  • Ha yini Yerobuwamu a endle marhole mambirhi ya nsuku, naswona tiko ri endla yini endzhaku ka sweswo?
  • Ku humelele yini hi mfumo wa tinyimba timbirhi swin’we ni tempele ya Yehovha eYerusalema?

Swivutiso swo engetela

  • Hlaya 1 Tihosi 11:26-43.

    Yerobuwamu a a ri munhu wa njhani, naswona Yehovha u n’wi tshembise yini loko a hlayisa milawu yakwe?

  • Hlaya 1 Tihosi 12:1-33.

    Vatswari ni vakulu va nga dyondza yini eka xikombiso xo biha xa Rehobuwama malunghana ni ku tirhisa vulawuri hi ndlela yo biha?

    Vantshwa namuntlha va fanele va lava nkongomiso lowu tshembekaka eka mani loko va endla swiboho leswikulu evuton’wini?

    I yini lexi susumeteleke Yerobuwamu ku endla tindhawu timbirhi to gandzelela marhole eka tona, naswona sweswo swi kombise njhani leswaku a a nga n’wi tshembi Yehovha?

    I mani loyi a vangeleke mfumo wa tinyimba ta khume leswaku wu xandzukela vugandzeri bya ntiyiso?