Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 64: Solomoni A Aka Tempele

Dyondzo 64: Solomoni A Aka Tempele

Loko Davhida a nga si fa, u nyike Solomoni pulani leyi humaka eka Xikwembu yo aka tempele ya Yehovha. Loko a ri ni malembe ya mune a ri karhi a fuma, Solomoni u sungule ku aka tempele naswona yi hele endzhaku ka malembe ya nkombo ni hafu. Vavanuna vo tala a va tirha ku aka tempele naswona muako wa kona wu hete mali yo tala ngopfu. Leswi swi vangiwe hi leswi a ku tirhisiwa nsuku ni silivhere yo tala.

Tempele a yi ri ni makamara mambirhi lamakulu, ku fana ni tabernakela. Kambe makamara ya kona a ma tlula ya tabernakela kambirhi hi vukulu. Solomoni a a veke areka ya ntwanano ekamareni ra le ndzeni ka tempele, naswona swilo swin’wana leswi a swi ri etabernakeleni swi vekiwe eka kamara lerin’wana.

Loko tempele yi herile, ku ve ni nkhuvo lowukulu. Solomoni u nkhinsame emahlweni ka tempele kutani a khongela, hilaha u n’wi vonaka hakona exifanisweni lexi. Solomoni u byele Yehovha a ku: ‘Tilo ra matilo a ri nge ku ringani, kasi tempele leyi i yitsongo ngopfu. Oho, Xikwembu xanga, ndzi kombela u yingisa swikhongelo swa vanhu va wena loko va khongela endhawini leyi.’

Hosi Solomoni a ri eku khongeleni

Loko Solomoni a heta ku khongela, ku xike ndzilo hi le tilweni. Wu hise switlhavelo swa swiharhi leswi a a swi endlile. Ku ve ni ku vonakala lokukulu loku humaka eka Yehovha etempeleni. Leswi a swi kombisa leswaku Yehovha a a yingisile, nileswaku u tsakisiwe hi tempele ni xikhongelo xa Solomoni. Endzhaku ka sweswo vanhu a va ta ya gandzela etempeleni ematshan’weni yo gandzela etabernakeleni.

Solomoni u fume hi vutlhari nkarhi wo leha, naswona vanhu a va tsakile. Kambe Solomoni u teke vasati vo tala ematikweni man’wana lava a va nga n’wi gandzeli Yehovha. Xana wa n’wi vona un’wana wa vona a gandzelaka xifaniso laha? Eku heteleleni vasati va Solomoni va endle leswaku a gandzela swikwembu swin’wana. Xana wa swi tiva leswaku ku humelele yini loko Solomoni a endla sweswo? A a nga ha khomi vanhu hi tintswalo. U ve ni tihanyi, kutani vanhu a va nga ha tsakanga.

Hosi Solomoni a ri eku gandzeleni ka xifaniso

Sweswo swi endle leswaku Yehovha a hlundzukela Solomoni, kutani a ku eka yena: ‘Ndzi ta susa mfumo eka wena ndzi wu nyika munhu un’wana. A ndzi nge swi endli emasikwini ya wena, kambe emasikwini ya n’wana wa wena. Kambe a ndzi nge teki vanhu hinkwavo eka mfumo wa n’wana wa wena.’ A hi voneni leswaku leswi swi endleke njhani.

1 Tikronika 28:9-21; 29:1-9; 1 Tihosi 5:1-18; 2 Tikronika 6:12-42; 7:1-5; 1 Tihosi 11:9-13.



Swivutiso

  • Solomoni swi n’wi tekele nkarhi wo tanihi kwihi ku heta ku aka tempele ya Yehovha, naswona ha yini swi dye mali yo tarisa xileswi?
  • Tempele a yi ri ni makamara mangani lamakulu, naswona i yini leswi vekiweke ekamareni ra le ndzeni?
  • Solomoni u vule yini exikhongelweni xa yena loko tempele yi herile?
  • Yehovha u swi kombise njhani leswaku xikhongelo xa Solomoni xi n’wi tsakisile?
  • Vavasati va Solomoni va n’wi kucetele ku endla yini, naswona ku humelele yini hi Solomoni?
  • Ha yini Yehovha a hlundzukele Solomoni, naswona Yehovha u n’wi byele yini?

Swivutiso swo engetela

  • Hlaya 1 Tikronika 28:9, 10.

    Hi ku ya hi marito ya Davhida lama tsariweke eka 1 Tikronika 28:9, 10, i yini leswi hi faneleke hi lwela ku swi endla evuton’wini bya hina bya siku ni siku?

  • Hlaya 2 Tikronika 6:12-21, 32-42.

    Solomoni u swi kombise njhani leswaku Xikwembu Lexi nge Henhla-henhla a xi nge tshami emuakweni lowu endliweke hi mavoko ya vanhu?

    Marito ya Solomoni lama kumekaka eka 2 Tikronika 6:32, 33 ma paluxa yini hi Yehovha?

  • Hlaya 2 Tikronika 7:1-5.

    Leswi vana va Israyele va susumetelekeke ku vula marito yo dzunisa Yehovha endzhaku ka loko va vone ku vangama ka yena, xana hina namuntlha hi fanele hi khumbeka njhani loko hi anakanyisisa hi mikateko leyi vanhu va Yehovha va yi kumaka?

  • Hlaya 1 Tihosi 11:9-13.

    Xana ndlela leyi Solomoni a hanyeke ha yona yi wu kombise njhani nkoka wa ku tshama hi tshembekile ku ya fika emakumu?