Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 62: Khombo eNdlwini Ya Davhida

Dyondzo 62: Khombo eNdlwini Ya Davhida

Loko Davhida a sungula ku fuma eYerusalema, Yehovha u endle leswaku vuthu ra yena ri hlula valala vakwe vo tala. Yehovha u tshembise Vaisrayele leswaku u ta va nyika tiko ra Kanana. Kutani, hi ku pfuniwa hi Yehovha, va kume matiko hinkwawo lawa va tshembisiweke wona.

Davhida a a ri mufumi lonene. A a rhandza Yehovha. Nchumu wo sungula lowu a wu endleke endzhaku ko hlula Yerusalema a ku ri ku tisa areka ya ntwanano kwalaho. Naswona a a lava ku aka tempele leyi a nga ta yi veka eka yona.

Loko Davhida a kurile, u endle xihoxo lexikulu. Davhida a a swi tiva leswaku swi hoxile ku teka xilo xa munhu un’wana. Kambe siku rin’wana ni madyambu loko a ri elwangwini ra yindlu yakwe, u langute ehansi kutani a vona wansati wo saseka swinene. Vito rakwe i Bati-xeba, naswona nuna wakwe i Uriya, un’wana wa masocha ya yena.

Davhida a a lava Bati-xeba swinene lerova u lerise leswaku a tisiwa exigodlhweni xakwe. Nuna wakwe a a ri enyimpini. Kutani Davhida a etlela na yena naswona endzhaku a kuma leswaku u tikile. Davhida a a karhatekile swinene kutani u rhumele rito eka Yowabu ndhuna ya nyimpi leswaku a veka Uriya laha nyimpi yi hisaka kona leswaku a ta dlayiwa. Loko Uriya a file, Davhida u teke Bati-xeba.

Yehovha u hlundzukele Davhida. Kutani u rhumele nandza wakwe Natani leswaku a ya n’wi byela hi xidyoho xa yena. Wa n’wi vona Natani lahaya a ri karhi a vulavula na Davhida. Davhida wa tisola hileswi a swi endleke, kutani Yehovha a nga n’wi dlayi. Kambe Yehovha u te: ‘Hikwalaho ka leswi u endleke swilo leswi swo biha, u ta va ni makhombo yo tala endlwini ya wena.’ Kunene Davhida u ve ni makhombo yo tala!

Natani a vulavula na Davhida

Xo sungula, n’wana wa Bati-xeba u file. Kutani Aminoni mativula ya Davhida u kume Tamari a ri yexe kutani a etlela na yena hi nkani. Absalomu n’wana wa Davhida a a hlundzuke swinene lerova u dlaye Aminoni. Endzhaku Absalomu u tsakeriwe hi vanhu vo tala, kutani a tiendla hosi. Eku heteleleni Davhida u hlule Absalomu, kutani a dlayiwa. Ina, Davhida u langutane ni makhombo yo tala.

Hi nkarhi wolowo, Bati-xeba u veleke n’wana la n’wi thyeke vito ra Solomoni. Loko Davhida a kurile naswona a vabya, n’wana wa yena Adoniya u ringete ku tiendla hosi. Hiloko Davhida a byela muprista la vuriwaka Sadoki leswaku a chela mafurha enhlokweni ya Solomoni ku kombisa leswaku hi yena a nga ta va hosi. Endzhakunyana Davhida u file a ri ni malembe ya 70. U fume malembe ya 40, kambe endzhaku ka yena Solomoni u ve hosi ya Israyele.

2 Samuwele 11:1-27; 12:1-18; 1 Tihosi 1:1-48.



Swivutiso

  • Hi ku pfuniwa hi Yehovha, ku endleke yini hi tiko ra Kanana?
  • I yini lexi humeleleke madyambu man’wana loko Davhida a ri elwangwini ra yindlu yakwe?
  • Ha yini Yehovha a hlundzukele Davhida swinene?
  • Exifanisweni lexi, i mani loyi Yehovha a n’wi rhumeke ku ya byela Davhida swidyoho swa yena, naswona wanuna loyi u vule leswaku Davhida u ta humeleriwa hi yini?
  • Hi wahi makhombo lama weleke Davhida?
  • I mani loyi a veke hosi ya Israyele endzhaku ka Davhida?

Swivutiso swo engetela

  • Hlaya 2 Samuwele 11:1-27.

    Xana ku tshama hi khomekile entirhweni wa Yehovha swi hi sirhelela njhani?

    Davhida u nghene njhani exidyohweni, naswona leswi swi ma lemukisa yini malandza ya Yehovha namuntlha?

  • Hlaya 2 Samuwele 12:1-18.

    Hi yihi dyondzo leyi vakulu ni vatswari va nga yi dyondzaka eka ndlela leyi Natani a yeke eka Davhida ha yona loko a ya n’wi nyika ndzayo?

    Ha yini Yehovha a kombise Davhida tintswalo?