Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 61: Davhida A Endliwa Hosi

Dyondzo 61: Davhida A Endliwa Hosi

Sawulo u tlhele a ringeta ku khoma Davhida. U teka masocha yakwe ya 3 000 a ya lava Davhida. Loko Davhida a swi twa, u rhume tinhlori ti ya lava laha Sawulo ni vavanuna lava a a ri na vona va goveke kona vusiku byebyo. Hiloko Davhida a vutisa vavanuna lava a a ri na vona a ku: ‘I mani la nga ta famba na mina enxaxeni wa Sawulo?’

Davhida a vitana Hosi Sawulo

Abixayi u hlamule a ku: ‘Hi mina.’ Abixayi i n’wana wa sesi wa Davhida, la vuriwaka Seruya. Loko Sawulo ni vavanuna vakwe va ha etlele, Davhida na Abixayi va nyandlamele va nghena enxaxeni. Va teke tlhari ra Sawulo ni gula ra yena ra mati, leswi a swi ri ekusuhi ni nhloko ya Sawulo. A ku na loyi a va voneke kumbe a va tweke tanihi leswi hinkwavo a va file hi vurhongo.

Hi luya Davhida na Abixayi. Va balekile, naswona va hlayisekile ehenhla ka xintshabyana. Davhida u huwelele ndhuna ya nyimpi ya Israyele, a ku: ‘Abinere, ha yini u nga sirheleli n’wini wa wena, ku nga hosi? Languta! Ri kwihi tlhari ra yona ni gula ra yona ra mati?’

Hiloko Sawulo a pfuka. U twe rito ra Davhida, kutani a vutisa a ku: ‘Xana hi wena Davhida?’ Xana wa va vona Sawulo na Abinere lahaya hansi?

Davhida a hlamula Sawulo a ku: ‘Ina, hosi yanga.’ Kutani Davhida a vutisa a ku: ‘Ha yini u lava ku ndzi khoma? Xana ndzi dyohe yini? Hi leri tlhari ra wena, Wee hosi. Rhuma un’wana wa vavanuna lava nga na wena a ta ri teka.’

Hosi Sawulo na Abinere

Sawulo u te: ‘Ndzi dyohile. Ndzi endle vuphukuphuku.’ Hiloko Davhida a tifambela, Sawulo na yena a tlhelela ekaya. Kambe Davhida a ku: ‘Siku rin’wana Sawulo u ta ndzi dlaya. Ndzi fanele ndzi balekela etikweni ra Vafilisita.’ Kutani a endla tano. Davhida u xise Vafilisita a endla onge se a a yima na vona.

Endzhakunyana Vafilisita va tlhandluke va ya lwa ni Vaisrayele. Sawulo na Yonathani va dlawa enyimpini ya kona. Leswi swi twise Davhida ku vava lokukulu, kutani u tsale risimu ro nandziha, a yimbelela a ku: ‘Ndzi karhatekile hikwalaho ka wena, makwerhu Yonathani. A ndzi ku rhandza ngopfu!’

Endzhaku ka sweswo Davhida u tlhelele eIsrayele emutini wa Hebroni. Ku ve ni nyimpi exikarhi ka vavanuna lava hlawuleke Ixi-boxeti n’wana Sawulo leswaku a va hosi ni lava a va lava leswaku Davhida a va hosi. Eku heteleleni lava hlawuleke Davhida va hlurile. Davhida a a ri ni malembe ya 30 loko a va hosi. U fume eHebroni ku ringana malembe ya nkombo ni hafu. Vana va yena van’wana a ku ri Aminoni, Absalomu na Adoniya.

Ku fike nkarhi lowu Davhida ni vavanuna lava a va ri na yena va fambeke va ya hlasela muti wo saseka wa Yerusalema. Yowabu n’wana un’wana wa Seruya sesi wa Davhida a a rhangela enyimpini yoleyo. Kutani Davhida u hakele Yowabu hi ku n’wi endla ndhuna ya nyimpi yakwe. Hiloko Davhida a sungula ku fuma emutini wa Yerusalema.

1 Samuwele 26:1-25; 27:1-7; 31:1-6; 2 Samuwele 1:26; 3:1-21; 5:1-10; 1 Tikronika 11:1-9.



Swivutiso

  • Xana Davhida na Abixayi va endle yini loko Sawulo a ha etlele enxaxeni wa yena?
  • I swivutiso swihi leswi Davhida a swi vutiseke Sawulo?
  • Davhida u ye kwihi loko a hambana na Sawulo?
  • I yini lexi twiseke Davhida ku vava swinene lerova a tsala risimu ro saseka?
  • Davhida a a ri ni malembe mangani loko a vekiwa ku va hosi eHebroni, naswona i vamani mavito ya vana va yena van’wana?
  • Xana Davhida u tlhele a va hosi kwihi?

Swivutiso swo engetela

  • Hlaya 1 Samuwele 26:1-25.

    Marito ya Davhida lama tsariweke eka 1 Samuwele 26:11 ma kombisa langutelo rihi malunghana ni nkongomiso wa Xikwembu?

    Loko hi endla matshalatshala yo kombisa tintswalo eka van’wana kambe va nga kombisi ku tlangela, xana marito ya Davhida lama kumekaka eka 1 Samuwele 26:23 ma nga hi pfuna njhani leswaku hi tshama hi ri ni langutelo lerinene?

  • Hlaya 2 Samuwele 1:26.

    Xana Vakreste namuntlha va nga ri hlakulela njhani “rirhandzu ro enta” leri Davhida na Yonathani a va ri na rona?

  • Hlaya 2 Samuwele 5:1-10.

    Xana Davhida u fume malembe mangani, naswona nkarhi wa ku fuma ka yena a wu avanyisiwe njhani?

    I mani la endleke leswaku Davhida a va munhu wo xiximeka, naswona leswi swi tirha njhani tanihi xitsundzuxo eka hina namuntlha?

DYONDZA SWO TALA

Davhida A A Nga Chavi

Hlaya rungula leri ro tsakisa ra Bibele u dyondza leswaku ha yini Davhida a a nga chavi.

Vaisrayele Va Kombele Ku Va Ni Hosi

Loko Vaisrayele va kombela ku va ni hosi, Yehovha u hlawule Sawulo. Ha yini Yehovha a sive Hosi Sawulo hi Davhida?