Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 59: Lexi Endlaka Davhida A Boheka Ku Baleka

Dyondzo 59: Lexi Endlaka Davhida A Boheka Ku Baleka

Endzhaku ka loko Davhida a dlaye Goliyadi, Abinere ndhuna ya nyimpi ya Israyele u n’wi yise eka Sawulo. Sawulo a a n’wi tsakela swinene Davhida. A n’wi veka ndhuna ya nyimpi a tlhela a n’wi teka a tshama na yena endlwini ya hosi.

Endzhakunyana, loko vuthu ri vuya eku lweni ni Vafilisita, vavasati a va yimbelela va ku: ‘Sawulo u dlaye magidi, kambe Davhida u dlaye makume ya magidi.’ Sweswo swi endle leswaku Sawulo a va ni mavondzo, hikuva Davhida a a dzunisiwa ku tlula yena. Kambe Yonathani n’wana Sawulo a a nga ri na mavondzo. A a rhandza Davhida swinene, na Davhida a a rhandza Yonathani. Kutani lavambirhi va twanana leswaku va ta va vanghana hi masiku.

Hosi Sawulo a hoxa tlhari

Davhida a a ri ni vuswikoti byo tlanga haripa, naswona Sawulo a a tsakela tinsimu leti a a ti tlanga. Kambe siku rin’wana mavondzo ya Sawulo ma n’wi vangele ku endla nchumu wo biha. Loko Davhida a ri karhi a tlanga haripa, Sawulo u teke tlhari rakwe a ri hoxa, a ku: ‘Ndzi ta tlhava Davhida ndzi n’wi patsa ni khumbi!’ Kambe Davhida a vhika, tlhari ri n’wi hupa. Endzhakunyana Sawulo a tlhela a hupa Davhida hi tlhari. Kutani Davhida a swi vona leswaku u fanele ku xiya-xiya.

Xana wa xi tsundzuka xitshembiso lexi Sawulo a xi endleke? U vule leswaku munhu loyi a nga ta dlaya Goliyadi u ta n’wi nyika n’wana wa yena wa nhwanyana a va nsati wakwe. Eku heteleleni Sawulo u byele Davhida leswaku a nga teka n’wana wakwe Mikala, kambe u fanele ku rhanga a dlaya valala va yena va Vafilisita va 100. Anakanya hi sweswo! Sawulo a a anakanya leswaku Vafilisita va ta dlaya Davhida. Kambe a va n’wi dlayanga, kutani Sawulo a nyika Davhida n’wana wakwe a va nsati wa yena.

Siku rin’wana Sawulo a byela Yonathani ni malandza yakwe hinkwawo leswaku u lava ku dlaya Davhida. Kambe Yonathani a ku eka tata wakwe: ‘U nga n’wi dlayi Davhida. A nga si tshama a ku dyohela ha nchumu. Kambe, hinkwaswo leswi a swi endleke swi ku pfune swinene. U veke vutomi byakwe ekhombyeni loko a dlaya Goliyadi, naswona loko u swi vona a wu tsakile.’

Davhida a vhika tlhari

Sawulo u yingise n’wana wa yena, naswona a tshembisa leswaku a nge n’wi dlayi Davhida. Davhida u vuyisiwile kutani a tirhela Sawulo endlwini yakwe ku fana ni le ku sunguleni. Hambiswiritano, siku rin’wana loko Davhida a ri karhi a tlanga haripa, Sawulo u tlhele a hoxa Davhida hi tlhari. Davhida u vhikile, tlhari ri tlhava khumbi. Leswi a swi endleka ra vunharhu! Hiloko Davhida a swi vona leswaku a fanele ku baleka!

Vusiku byebyo Davhida u ye endlwini yakwe. Kambe Sawulo a rhumela vavanuna leswaku va ya n’wi dlaya. Mikala a a swi tiva leswaku tata wakwe a a kunguhata ku endla yini. Kutani a byela nuna wakwe a ku: ‘Loko u nga baleki namuntlha, mundzuku u ta va u ri ntsumbu.’ Hi vusiku byebyo Mikala a pfuna Davhida ku huma hi fasitere a baleka. Ku hele malembe ya kwalomu ka nkombo Davhida a boheka ku tumbela etindhawini to hambana-hambana leswaku Sawulo a nga n’wi kumi.

1 Samuwele 18:1-30; 19:1-18.



Swivutiso

  • Ha yini Sawulo a a ri ni mavondzo eka Davhida, kambe n’wana wa yena Yonathani a a hambane njhani na yena?
  • Ku humelele yini siku rin’wana loko Davhida a ri karhi a tlangela Sawulo haripa?
  • Sawulo u vule leswaku Davhida u fanele ku endla yini loko a nga si teka n’wana wakwe Mikala a va nsati wakwe, naswona ha yini Sawulo a vula leswi?
  • Loko Davhida a tlangela Sawulo haripa, i yini lexi humeleleke ra vunharhu, hilaha xifaniso xi swi kombisaka hakona?
  • Xana Mikala u byi ponise njhani vutomi bya Davhida, naswona Davhida a a fanele a endla yini ku ringana malembe ya nkombo?

Swivutiso swo engetela

  • Hlaya 1 Samuwele 18:1-30.

    Ndlela leyikulu leyi Yonathani a a rhandza Davhida ha yona yi ri fanekisela njhani rirhandzu leri nga kona exikarhi ka “tinyimpfu tin’wana” ni “ntlhambinyana”?

    Leswi Yonathani a a ta va mudyandzhaka wa Sawulo hi ku ya hi nawu, xana 1 Samuwele 18:4 yi swi kombisa njhani leswaku Yonathani u titsongahatele loyi a hlawuriweke ku va hosi?

    Xana xikombiso xa Sawulo xi swi kombisa njhani leswaku mavondzo ma nga yisa eka xidyoho lexikulu, naswona swi hi lemukisa yini leswi?

  • Hlaya 1 Samuwele 19:1-17.

    Xana Yonathani u veke vutomi bya yena ekhombyeni hi ndlela yihi loko a vulavula na Sawulo?

DYONDZA SWO TALA

Davhida A A Tshembe Xikwembu

Davhida u endle swihoxo leswikulu evuton’wini bya yena a tlhela a langutana ni mintlhontlho yo tala kambe a nga tshikanga ku tirhela Xikwembu. Xikombiso xa yena lexinene xi nga ku pfuna leswaku u tshama u tshembekile.