Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 58: Davhida Na Goliyadi

Dyondzo 58: Davhida Na Goliyadi

Vafilisita va tlhele va ta va ta lwa ni Vaisrayele. Vamakwavo wa Davhida vanharhu a va ri evuthwini ra Sawulo hi nkarhi wolowo. Hiloko siku rin’wana Yese a byela Davhida a ku: ‘Teka mavele ni xinkwa u yisela vamakwenu. Famba u ya va pfuxela.’

Goliyadi

Loko Davhida a fika enxaxeni wa nyimpi, u tsutsumele laha nyimpi a yi hisa kona leswaku a ya lava vamakwavo. Goliyadi, nhenha ya Mufilisita a yi huma emixaxeni ku ta rhukana Vaisrayele. A a hamba a endla tano nimixo ni madyambu man’wana ni man’wana ku ringana masiku ya 40. A a huwelela a ku: ‘Hlawulani un’wana wa vavanuna va n’wina a ta lwa na mina. Loko o hlula naswona a ndzi dlaya, hi ta va malandza ya n’wina. Kambe loko ndzo n’wi hlula kutani ndzi n’wi dlaya, mi ta va malandza ya hina. Hlawulani munhu la nga ta lwa na mina.’

Davhida u vutise masocha man’wana a ku: ‘Xana loyi a nga ta dlaya Mufilisita loyi a ntshunxa Vaisrayele eka ndzhukano lowu u ta kuma yini?’

Hiloko socha ri ku: ‘Sawulo u ta nyika munhu yoloye rifuwo ro tala. Naswona u ta n’wi nyika n’wana wakwe wa nhwanyana a va nsati wa yena.’

Kambe Vaisrayele hinkwavo a va chava Goliyadi hikuva a a ri nkulu swinene. A a lehe kwalomu ka timitara tinharhu naswona a a ri ni socha rin’wana leri n’wi rhwalelaka xitlhangu.

Masocha man’wana ma fambile ma ya byela Hosi Sawulo leswaku Davhida u lava ku lwa na Goliyadi. Kambe Sawulo u byele Davhida a ku: ‘U nga ka u nga lwi ni Mufilisita yoloye. Wena wa ha ri mufana, kambe yena u ve socha vutomi byakwe hinkwabyo.’ Davhida u hlamule a ku: ‘Ndzi dlaye bere ni nghala leswi a swi teke tinyimpfu ta tatana. Kutani Mufilisita loyi u ta fana ni xin’wana xa swona. Yehovha u ta ndzi pfuna.’ Kutani Sawulo a ku: ‘Famba, onge Yehovha a nga va na wena.’

Davhida u rhelele hi xinambyana kutani a rholela maribye ya ntlhanu yo tswulungeka a ma hoxa enkwameni wakwe. Kutani a teka xipelupelu xakwe a famba ku ya hlangana ni nhenha leyi. Loko Goliyadi a n’wi vona, u hlamale ngopfu. A a anakanya leswaku swi ta olova ku dlaya Davhida.

Davhida a hoxa ribye

Goliyadi u te: ‘Tana la, ndzi ta nyika tinyenyana ta tilo ni swiharhi swa nhova nyama ya wena leswaku swi yi dya.’ Kambe Davhida u te: ‘U ta eka mina hi banga, fumu ni tlhari, kambe mina ndzi ta eka wena hi vito ra Yehovha. Namuntlha Yehovha u ta ku nyiketa emavokweni ya mina kutani ndzi ta ku dlaya.’

Hiloko Davhida a tsutsumela eka Goliyadi. A humesa ribye enkwameni wa yena, a ri hoxa exipelupelwini xakwe kutani a ri hoxa hi matimba ya yena hinkwawo. Ribye ri haha ri ya ba nhloko ya Goliyadi kutani a wela ehansi a fa! Loko Vafilisita va vona leswaku nhenha ya vona yi wile, hinkwavo va jika va baleka. Vaisrayele va va hlongorisa kutani va hlula.

1 Samuwele 17:1-54.



Swivutiso

  • Goliyadi u tlhontlhe vuthu ra Vaisrayele hi ndlela yihi?
  • Xana Goliyadi a ri tanihi kwihi, naswona Hosi Sawulo u n’wi tshembise yini munhu loyi a a ta dlaya Goliyadi?
  • Xana Davhida u te yini loko Sawulo a n’wi byela leswaku a nga ka a nga lwi na Goliyadi hikuva Davhida i xifanyetana?
  • Xana Davhida u swi kombise njhani leswaku u tshemba Yehovha loko a hlamula Goliyadi?
  • Hilaha u nga swi vonaka hakona laha xifanisweni, xana Davhida u tirhise yini ku dlaya Goliyadi, naswona Vafilisita va endle yini endzhaku ka sweswo?

Swivutiso swo engetela

  • Hlaya 1 Samuwele 17:1-54.

    I yini lexi a xi endla leswaku Davhida a va ni xivindzi naswona hi nga xi tekelela njhani xivindzi xa yena?

    Ku hambana na Goliyadi, ha yini Vakreste va fanele va papalata moya wa ku phikizana loko va tlanga mintlango kumbe va ri eku tihungaseni?

    Marito ya Davhida ma swi kombisa njhani leswaku a a ri ni ntshembo wa leswaku Xikwembu xi ta n’wi seketela?

    Ematshan’weni yo hlamusela ntsena mphikizano lowu a wu ri kona exikarhi ka mavuthu mambirhi lama kanetanaka, xana mhaka leyi yi swi kombisa njhani leswaku nyimpi a yi ri exikarhi ka swikwembu swa mavunwa ni Xikwembu xa ntiyiso, Yehovha?

    Xana masalela lama totiweke ma xi tekelela njhani xikombiso xa Davhida xa ku tshemba Yehovha?

DYONDZA SWO TALA

Davhida A A Nga Chavi

Hlaya rungula leri ro tsakisa ra Bibele u dyondza leswaku ha yini Davhida a a nga chavi.