Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 57: Xikwembu Xi Hlawula Davhida

Dyondzo 57: Xikwembu Xi Hlawula Davhida
Davhida a ponisa xinyimpfana

Xana wa swi vona leswi endlekeke? Jaha leri ri ponise xinyimpfana lexi eka bere. Bere leyi yi fike yi teka xinyimpfana lexi naswona a yi ya eku xi dyeni. Kambe jaha leri ri hlongorise bere kutani ri ponisa xinyimpfana lexi enon’wini wa yona. Loko bere yi ku ya lwa, jaha leri ri yi be ri yi dlaya! Ri tshame ri ponisa nyimpfu eka nghala. Kunene jaha leri ri ni xivindzi! Xana wa ri tiva jaha leri?

Jaha leri i Davhida. A a tshama edorobeni ra Betlehema. Kokwa wakwe a ku ri Obede, n’wana wa Rhuti na Bowasi. Xana wa ha va tsundzuka? Naswona tata wa Davhida i Yese. Davhida u risa tinyimpfu ta tata wakwe. Davhida u velekiwe endzhaku ka malembe ya 10 Yehovha a hlawule Sawulo leswaku a va hosi.

Ku fike nkarhi lowu Yehovha a byeleke Samuwele a ku: ‘Teka mafurha yo hlawuleka u ya endlwini ya Yese eBetlehema. Ndzi hlawule un’wana wa vana va yena leswaku a va hosi.’ Loko Samuwele a vona Eliyabu n’wana lonkulu wa Yese, u te: ‘Hakunene loyi hi yena loyi Yehovha a n’wi hlawuleke.’ Kambe Yehovha a ku eka yena: ‘U nga languti ku leha ni ku saseka kakwe. A ndzi hlawulanga yena leswaku a va hosi.’

Hiloko Yese a vitana n’wana wa yena Abinadaba a n’wi tisa eka Samuwele. Kambe Samuwele a ku: ‘E-e, Yehovha a nga n’wi hlawulanga na yena.’ Endzhaku, Yese a tisa n’wana wakwe Xamaha. Samuwele a ku: ‘E-e, Yehovha a nga n’wi hlawulanga na yena.’ Yese u tisa vana vakwe va majaha va nkombo eka Samuwele, kambe hinkwavo Yehovha a nga va hlawulanga. Samuwele u vutisile a ku: ‘Xana va helerile vafana lava?’

Yese u te: ‘Ku ni ndzisana ya vona. Kambe u ye eku riseni ka tinyimpfu.’ Loko Davhida a tisiwile, Samuwele a vona leswaku jaha leri i mbhurhi. Yehovha u te: ‘Loyi hi yena. N’wi chele hi mafurha.’ Kutani Samuwele a endla tano. Nkarhi wa ta lowu Davhida a nga ta va hosi ya Israyele.

1 Samuwele 17:34, 35; 16:1-13.



Swivutiso

  • I mani vito ra mufana loyi a nga laha xifanisweni, naswona hi swi tiva njhani leswaku u ni xivindzi?
  • Xana Davhida a a tshama kwihi, naswona i mani vito ra tata wakwe ni ra kokwa wakwe?
  • Ha yini Yehovha a byele Samuwele leswaku a ya endlwini ya Yese eBetlehema?
  • Xana ku humelele yini loko Yese a tisa vana vakwe va nkombo eka Samuwele?
  • Loko ku tisiwa Davhida, xana Yehovha u n’wi byele yini Samuwele?

Swivutiso swo engetela

  • Hlaya 1 Samuwele 17:34, 35.

    Xana swiendlakalo leswi swi swi kandziyisa njhani leswaku Davhida a a ri ni xivindzi naswona a a titshege hi Yehovha?

  • Hlaya 1 Samuwele 16:1-14.

    Xana marito ya Yehovha lama nga eka 1 Samuwele 16:7 ma hi pfuna njhani leswaku hi nga hlawuli vanhu hi ku ya hi leswi va langutekisaka xiswona?

    Xikombiso xa Sawulo xi swi kombisa njhani leswaku loko Yehovha a susa moya wa yena lowo kwetsima emunhwini, xivandla xa wona xi nga siva hi moya wo biha, kumbe ku navela ka ku endla vudyoho?

DYONDZA SWO TALA

MAKHADI YA VANHU VA LE BIBELENI

Khadi Ra Bibele Ra Davhida

U nga ha va u tiva xitori xa Davhida na Goliyadi kambe ku ni swo tala leswi u nga swi dyondzaka hi Davhida.