Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 56: Sawulo—Hosi Yo Sungula eIsrayele

Dyondzo 56: Sawulo—Hosi Yo Sungula eIsrayele
Samuwele a tota Sawulo leswaku a va hosi

Vona Samuwele, hi luya a chelaka mafurha enhlokweni ya wanuna loyi. Khale a va endla tano eka munhu ku kombisa leswaku munhu u hlawuriwile leswaku a va hosi. Yehovha u byele Samuwele ku chela mafurha enhlokweni ya Sawulo. I mafurha yo hlawuleka lama nun’hwelaka kahle.

Sawulo a a nga ehleketi leswaku wa faneleka ku va hosi. U byele Samuwele a ku: ‘Ndzi wa nyimba ya Benjamini, nyimba leyitsongo eka hinkwato eIsrayele. Ha yini u vula leswaku ndzi ta va hosi?’ Yehovha u rhandza Sawulo hikuva a a nga tikurisi kumbe ku titeka a ri wa nkoka. Hi yona mhaka leyi A n’wi hlawuleke leswaku a va hosi.

Kambe Sawulo a a nga ri xisiwana kumbe munhu wa xiyimo xa le hansi. A a huma endyangwini lowu fuweke, a a ri mbhurhi naswona a lehile. A a va tlula hi 30 wa tisentimitara hi ku leha hinkwavo eIsrayele! Nakambe Sawulo i xitsutsumi naswona u ni matimba swinene. Vanhu a va tsakile hileswi Yehovha a hlawuleke Sawulo leswaku a va hosi. Hinkwavo va huwelele va ku: ‘Hosi a yi hanye!’

Valala va Vaisrayele a va ri ni matimba ngopfu hi nkarhi wolowo. A va ha karhata Vaisrayele swinene. Endzhakunyana ka loko Sawulo a endliwe hosi, Vaamone va tile va ta lwa na vona. Kamba Sawulo u hlengelete vuthu lerikulu, kutani a hlula Vaamone. Sweswo swi tsakise vanhu leswi Sawulo a a ri hosi.

Loko malembe ma ri karhi ma famba, Sawulo u rhangele Vaisrayele eku hluleni ka valala va vona vo tala. Naswona Sawulo u ni n’wana la nga nhenha la vuriwaka Yonathani. Yonathani u pfune Vaisrayele ku hlula etinyimpini to tala. Vafilisita a va ha ri valala lavakulu va Vaisrayele. Siku rin’wana Vafilisita vo tala va tile va ta lwa ni Vaisrayele.

Samuwele u byele Sawulo leswaku a rindza kukondza a vuya leswaku a ta endlela Yehovha magandzelo kumbe nyiko. Kambe Samuwele u hlwele ku fika. Sawulo a a chava leswaku Vafilisita va ta sungula nyimpi, hiloko a endla gandzelo hi yexe. Loko Samuwele a fika, u byele Sawulo leswaku a nga yingisanga. Samuwele u te: ‘Yehovha u ta hlawula munhu un’wana leswaku a va hosi ya Israyele.’

Hi ku famba ka nkarhi Sawulo u tlhele a nga yingisi. Kutani Samuwele a ku eka yena: ‘Swa antswa ku yingisa Yehovha ku tlula ku n’wi endlela magandzelo hi nyimpfu yo nona. Leswi u nga n’wi yingisangiki Yehovha, Yehovha u ta endla leswaku u nga ha vi hosi ya Israyele.’

Hi nga dyondza dyondzo leyinene emhakeni leyi. Yi hi kombisa leswaku i swa nkoka swinene ku yingisa Yehovha minkarhi hinkwayo. Yi tlhela yi kombisa leswaku munhu lonene, hilaha Sawulo a a ri hakona eku sunguleni, a nga cinca a va wo homboloka. A hi swi lavi ku va lavo homboloka, a swi tano ke?

1 Samuwele tindzima 9 ku ya fika eka 11; 13:5-14; 14:47-52; 15:1-35; 2 Samuwele 1:23.



Swivutiso

  • Xana Samuwele u endla yini exifanisweni lexi, naswona ha yini?
  • Ha yini Yehovha a rhandze Sawulo, naswona a a ri munhu wa njhani?
  • I mani vito ra n’wana wa Sawulo, naswona n’wana yoloye u endle yini?
  • Ha yini Sawulo a endle magandzelo ematshan’weni yo rindza Samuwele leswaku a ta ma endla?
  • Hi nga dyondza yini emhakeni ya Sawulo?

Swivutiso swo engetela

  • Hlaya 1 Samuwele 9:15-21 na 10:17-27.

    Xana langutelo ra Sawulo ra ku titsongahata ri n’wi pfune njhani leswaku a papalata ku hatlisela ku teka goza loko vanhu vo karhi va vulavula ku biha ha yena?

  • Hlaya 1 Samuwele 13:5-14.

    Hi xihi xidyoho lexi Sawulo a xi endleke eGiligala?

  • Hlaya 1 Samuwele 15:1-35.

    Hi xihi xidyoho lexikulu lexi Sawulo a xi endleke malunghana na Agaga, hosi ya Amaleke?

    Xana Sawulo u ringete ku tiyimelela ni ku veka van’wana nandzu hi ndlela yihi?

    Hi xihi xitsundzuxo lexi hi faneleke ku xi yingisa namuntlha loko hi nyikiwa ndzayo?