Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 55: Xifanyetana Xi Tirhela Xikwembu

Dyondzo 55: Xifanyetana Xi Tirhela Xikwembu

Xifanyetana lexi a hi ku saseka ka xona! Vito ra xona i Samuwele. Naswona wanuna loyi a tlhandlekeke voko rakwe enhlokweni ya Samuwele i muprista lonkulu wa le Israyele, Eli. Lavan’wana i tata wa Samuwele ku nga Elkana ni mana wakwe, Hana, va tise Samuwele eka Eli.

Samuwele a hlangana ni muprista lonkulu Eli

Samuwele u ni kwalomu ka malembe ya mune kumbe ya ntlhanu. Kambe u ta tshama na Eli laha tabernakeleni ya Yehovha swin’we ni vaprista van’wana. Ha yini Elkana na Hana va nyikele hi n’wana wa vona lontsongo, ku nga Samuwele, leswaku a tirhela Yehovha etabernakeleni? A hi voneni.

Emalembeni ma nga ri mangani lama hundzeke, Hana a a karhatekile swinene. Xivangelo xa kona hileswi a a nga tswali kasi a a swi navela hi mbilu hinkwayo ku va ni n’wana. Kutani siku rin’wana loko Hana a ye etabernakeleni ya Yehovha, u khongele a ku: ‘Oho, Yehovha, u nga ndzi rivali! Loko wo ndzi nyika n’wana wa mufana, ndzi tshembisa leswaku ndzi ta n’wi nyika wena leswaku a ku tirhela vutomi byakwe hinkwabyo.’

Yehovha u hlamule xikhongelo xa Hana kutani endzhaku ka tin’hweti, u kume Samuwele. Hana a a xi rhandza swinene xifanyetana xakwe, naswona u sungule ku xi dyondzisa hi ta Yehovha xa ha ri xitsongo. U byele nuna wakwe a ku: ‘Hi ku hatlisa loko ndzi lumula Samuwele, ndzi ta n’wi yisa etabernakeleni leswaku a ya tirhela Yehovha kwalaho.’

Laha xifanisweni hi vona Hana na Elkana va nyikela ha yena. Naswona leswi Samuwele a dyondzisiweke kahle hi vatswari va yena, u tsakile leswi a nga ta tirhela Yehovha laha tendeni ra Yehovha. Lembe ni lembe Hana na Elkana a va ta eku gandzeleni etendeni leri ro hlawuleka ni ku endzela xifanyetana xa vona. Naswona lembe ni lembe Hana a a tisela Samuwele mabaji lama nga riki na mavoko lawa a n’wi rhungeleke wona.

Loko nkarhi wu ri karhi wu famba, Samuwele u hambete a tirhela Yehovha etabernakeleni naswona a a rhandziwa hi Yehovha xikan’we ni hi vanhu. Kambe vana va Eli loyi a a ri muprista lonkulu, ku nga Hofini na Finiyasi, a va hombolokile. A va endla swilo swo tala leswo biha naswona a a va hambukisa vanhu van’wana eka Yehovha. Eli a a fanele a va tshikise ku va vaprista kambe a nga va tshikisanga.

Samuwele lontsongo a nga pfumelanga leswaku swilo swo biha leswi humelelaka etabernakeleni swi n’wi tshikisa ku tirhela Yehovha. Kambe leswi vanhu lava a va rhandza Yehovha hakunene a va nga talanga, se a ku hundze nkarhi wo leha Yehovha a nga si vulavula ni vanhu. Loko Samuwele a kurilenyana, ku humelele leswi landzelaka:

Samuwele a a etlele etabernakeleni loko rito ri n’wi pfuxa. U hlamule a ku: ‘Hi mina loyi.’ U pfukile a tsutsumela eka Eli kutani a ku: ‘Hi mina loyi hikuva u ndzi vitanile.’

Kambe Eli u hlamule a ku: ‘A ndzi ku vitananga; tlhela u ya etlela.’ Hiloko Samuwele a tlhelela eku etleleni.

Hiloko a vitaniwa ra vumbirhi: ‘Samuwele!’ Kutani Samuwele a pfuka a tsutsumela eka Eli. U te: ‘Hi mina loyi hikuva u ndzi vitanile.’ Kambe Eli u hlamule a ku: ‘A ndzi ku vitananga n’wananga. Tlhela u ya etlela.’ Hiloko Samuwele a tlhelela eku etleleni.

Rito ri tlhele ri vitana ra vunharhu, ri ku: ‘Samuwele!’ Kutani Samuwele a tsutsumela eka Eli. A ku: ‘Hi mina loyi hikuva u ndzi vitanile.’ Hiloko Eli a swi vona leswaku i Yehovha a n’wi vitanaka. Hiloko a byela Samuwele a ku: ‘Tlhela u ya etlela, kutani loko a ku vitana nakambe, u fanele u ku: “Vulavula, Yehovha, nandza wa wena u yingisile.”’

Samuwele u hlamule tano loko Yehovha a n’wi vitana nakambe. Kutani Yehovha u byele Samuwele leswaku u ta xupula Eli ni vana vakwe. Endzhakunyana Hofini na Finiyasi va file enyimpini leyi a ku lwiwa ni Vafilisita, naswona loko Eli a twa leswi humeleleke u wele ehansi, a tshoveka nhamu kutani a fa na yena. Hikwalaho Yehovha a a tiyisile.

Samuwele u kurile kutani a va muavanyisi wo hetelela eIsrayele. Loko se a khalabyile, vanhu va n’wi kombele va ku: ‘Hlawula hosi leyi nga ta hi fuma.’ Samuwele a a nga swi lavi ku endla tano hikuva Yehovha a a ri hosi ya vona. Kambe Yehovha u n’wi byele leswaku a yingisa leswi vanhu va swi vulaka.

1 Samuwele 1:1-28; 2:11-36; 4:16-18; 8:4-9.



Swivutiso

  • I mani vito ra xifanyetana lexi nga laha xifanisweni naswona lavan’wana i vamani?
  • Xana Hana u khongele a ku yini loko a ri etabernakeleni ya Yehovha siku rin’wana, naswona Yehovha u n’wi hlamule njhani?
  • Xana Samuwele a a ri ni malembe mangani loko a tekiwa leswaku a ya tirha etendeni ra Yehovha, naswona mana wakwe a a n’wi endlela yini lembe ni lembe?
  • I vamani mavito ya vana va Eli, naswona i vanhu va njhani?
  • Xana Yehovha u n’wi vitane njhani Samuwele, naswona U n’wi byele yini?
  • Xana Samuwele u ve yini loko a kula, naswona ku endleke yini loko se a dyuharile?

Swivutiso swo engetela

  • Hlaya 1 Samuwele 1:1-28.

    Hi xihi xikombiso lexinene lexi Elkana a xi vekeleke tinhloko ta mindyangu malunghana ni ku rhangela evugandzerini bya ntiyiso?

    Hi dyondza yini eka xikombiso xa Hana xo langutana ni xiphiqo xo tika?

  • Hlaya 1 Samuwele 2:11-36.

    Xana Eli u va xixime njhani vana vakwe ku tlula Yehovha, naswona leswi swi nga tirha tanihi xitsundzuxo eka hina hi ndlela yihi?

  • Hlaya 1 Samuwele 4:16-18.

    Hi wahi makhombo ya mune lama humeleleke enyimpini, naswona ma n’wi khumbe njhani Eli?

  • Hlaya 1 Samuwele 8:4-9.

    Xana Vaisrayele va hlundzukise Yehovha swinene hi ndlela yihi, naswona hina namuntlha hi nga wu seketela njhani Mfumo wakwe hi ku tshembeka?