Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 54: Wanuna Wa Matimba Lamakulu Ngopfu

Dyondzo 54: Wanuna Wa Matimba Lamakulu Ngopfu

Xana wa ri tiva vito ra wanuna wa matimba lamakulu ngopfu la tshameke a hanya? I muavanyisi la vuriwaka Samsoni. Yehovha hi yena a nyikeke Samsoni matimba. Hambiloko Samsoni a nga si velekiwa, Yehovha u byele mana wakwe a ku: ‘Ku nga ri khale u ta veleka n’wana wa jaha. Yena u ta rhangela eku poniseni Vaisrayele eka Vafilisita.’

Samsoni a dlaya nghala

Vafilisita a va ri vanhu vo homboloka lava a va tshama eKanana. A va ri ni vavanuna vo tala va nyimpi, naswona a va xanisa Vaisrayele swinene. Siku rin’wana loko Samsoni a ri karhi a ya laha ku tshamaka Vafilisita, ku humelele nghala leyikulu yi bonga, yi n’wi landza. Kambe Samsoni u dlaye nghala ya kona hi mavoko. U tlhele a dlaya madzana-dzana ya Vafilisita vo homboloka.

Endzhakunyana Samsoni u rhandzane ni wansati un’wana la vuriwaka Delila. Varhangeri va Vafilisita va tshembise leswaku ha un’we wa vona u ta nyika Delila swiphemu swa 1 100 swa silivhere loko o va byela leswaku Samsoni u ma kuma kwihi matimba lamakulu swonghasi. Delila a a lava mali yoleyo. A a nga tshembekanga eka Samsoni, kumbe eka vanhu va Xikwembu. Kutani u hambete a vutisa Samsoni leswaku u ma kuma kwihi matimba wolawo.

Delila na Samsoni

Eku heteleleni, Delila u endle leswaku Samsoni a n’wi byela leswaku u ma kuma kwihi matimba yakwe. Samsoni u te: ‘A ndzi si tshama ndzi tsemetiwa misisi. Ku sukela loko ndzi tswariwile, Xikwembu xi ndzi hlawule leswaku ndzi va nandza wa xona wo hlawuleka la vuriwaka Munaziri. Loko ndzo tsemiwa misisi, matimba ya mina ma ta hela.’

Kutani loko Delila a twe sweswo, u etlerise Samsoni emindzhumbini yakwe. Hiloko a vitana munhu un’wana leswaku a tsemeta misisi yakwe. Loko Samsoni a pfuka, a a hele matimba. Hiloko Vafilisita va ta va ta n’wi khoma. Va n’wi xokole mahlo hamambirhi kutani va n’wi endla hlonga ra vona.

Samsoni a wisa tiphuphu

Siku rin’wana Vafilisita a va ri ni nkhuvo lowukulu wo gandzela xikwembu xa vona Dagoni, hiloko va humesa Samsoni ekhotsweni leswaku va ta endla xihlekiso ha yena. Hi nkarhi wolowo, misisi ya Samsoni se a yi kurile. Samsoni u byele xifanyetana lexi n’wi khomeke hi voko a ku: ‘Ndzi kombela u ndzi khomisa tiphuphu leti khomeke muako lowu.’ Kutani Samsoni u khongele eka Yehovha a kombela matimba, kutani a khoma tiphuphu teto. U huwelele a ku: ‘A ndzi fe ni Vafilisita.’ A ku ri ni Vafilisita va 3 000 enkhubyeni wolowo, naswona loko Samsoni a susumeta tiphuphu, yindlu yi sungule ku hirimuka kutani yi dlaya vanhu volavo hinkwavo lavo biha.

Vaavanyisi tindzima 13 ku ya eka 16.



Swivutiso

  • I mani vito ra wanuna wa matimba lamakulu la tshameke a hanya, naswona i mani loyi a n’wi nyikeke matimba?
  • Xana Samsoni u tshame a yi endla yini nghala leyikulu, hilaha u swi vonaka hakona laha xifanisweni?
  • Hi xihi xihundla lexi Samsoni a xi byeleke Delila exifanisweni lexi, naswona sweswo swi va pfune njhani Vafilisita ku n’wi khoma?
  • Xana Samsoni u va dlaye njhani Vafilisita va 3 000 lava a va ri valala hi siku leri a feke ha rona?

Swivutiso swo engetela

  • Hlaya Vaavanyisi 13:1-14.

    Xana Manowa ni nsati wakwe va va vekele njhani vatswari xikombiso lexinene eku dyondziseni ka vana va vona?

  • Hlaya Vaavanyisi 14:5-9 na 15:9-16.

    Xana mhaka ya Samsoni ya ku dlaya nghala, ku tsema mapindza lamantshwa lawa a a bohiwe ha wona ni ku tirhisa rihlaya ra mbhongolo ya xinuna ku dlaya vanhu va 1 000, yi ku kombisa njhani ku tirha ka moya lowo kwetsima wa Yehovha?

    Xana moya lowo kwetsima wu hi pfuna njhani namuntlha?

  • Hlaya Vaavanyisi 16:18-31.

    Xana Samsoni xi n’wi khumbe njhani xinakulobye xo biha, naswona hi nga dyondza yini eka leswi?

DYONDZA SWO TALA

Khadi Ra Bibele Ra Samsoni

Kuma leswaku i yini lexi endleke Samsoni a va ni matimba.