Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 52: Gidiyoni Ni Vavanuna Vakwe Va 300

Dyondzo 52: Gidiyoni Ni Vavanuna Vakwe Va 300

Xana wa swi vona leswi a swi humelela laha? Hinkwavo lava a ku ri vavanuna va nyimpi eIsrayele. Vavanuna lava korhameke va nwa mati. Muavanyisi Gidiyoni hi yena la yimeke ekusuhi na vona. A a languta ndlela leyi va nwaka mati ha yona.

Ti langute kahle tindlela to hambana-hambana leti vavanuna lava a va nwa mati ha tona. Van’wana a va korhamele kunene ematini. Kambe un’wana a a ka mati hi voko ra xinene leswaku a ta vona leswi humelelaka etlhelo ka yena. Sweswo a swi ri swa nkoka hikuva Yehovha a a byele Gidiyoni leswaku a hlawula vavanuna lava nwaka mati va ri karhi va rhala-rhala. Xikwembu xi vule leswaku lavan’wana hinkwavo va fanele ku tlheriseriwa ekaya. A hi voneni leswaku ha yini.

Vaisrayele a va nghene ekhombyeni lerikulu nakambe. Xivangelo xa kona hileswi a va nga n’wi yingisanga Yehovha. Vamidiyani a va va hlurile naswona a va va xanisa. Kutani Vaisrayele va kombele mpfuno eka Yehovha, xisweswo Yehovha u yingise swirilo swa vona.

Yehovha u byele Gidiyoni leswaku a hlengeleta vuthu ra nyimpi, kutani Gidiyoni u hlengelete vavanuna va nyimpi va 32 000. Kambe Vaisrayele a va ta lwa ni vuthu ra vavanuna va 135 000. Hambiswiritano, Yehovha u byele Gidiyoni a ku: ‘U ni vavanuna vo tala ngopfu.’ Ha yini Yehovha a vule sweswo?

Hikuva loko Vaisrayele a va lo hlula enyimpini, a va ta ehleketa leswaku va hlule hi matimba ya vona. A va ta ehleketa leswaku a swi nga bohi leswaku Yehovha a va pfuna leswaku va hlula. Kutani Yehovha u byele Gidiyoni a ku: ‘Byela vavanuna hinkwavo lava chavaka leswaku va tlhelela ekaya.’ Loko Gidiyoni a va byela, vavanuna vakwe va nyimpi va 22 000 va tlhelele ekaya. Sweswo swi endle leswaku a sala ni vavanuna va 10 000 lava nga ta lwa ni masocha ya 135 000.

Gidiyoni a ringa vavanuna vakwe

Kambe yingisa! Yehovha u ri: ‘Wa ha ri ni vavanuna vo tala.’ Kutani u byele Gidiyoni leswaku a byela vavanuna va ya nwa mati enambyeni nileswaku a tlherisa hinkwavo lava korhameleke ematini loko va nwa. Yehovha u tshembise a ku: ‘Ndzi ta endla leswaku u hlula hi vavanuna va 300 lava nweke mati va ri karhi va languta hala ni hala.’

Nkarhi wa nyimpi wu fikile. Gidiyoni u ave vavanuna vakwe va 300 hi mintlawa yinharhu. U nyike wanuna un’wana ni un’wana nanga ni khuwana leri nga ni rivoni endzeni ka rona. Loko se ku ri exikarhi ka vusiku, hinkwavo va hlengeletane va rhendzela nxaxa wa valala va vona. Kutani hi nkarhi wolowo va be tinanga va tlhela va faya makhuwana ya vona kutani va huwelela va ku: ‘Tlhari ra Yehovha ni ra Gidiyoni!’ Loko valala va vona va pfuka, a va pfilunganyekile naswona va chuhile. Hiloko hinkwavo va sungula ku tsutsuma, kutani Vaisrayele va hlula enyimpini.

Vaavanyisi tindzima 6 ku ya eka 8.



Swivutiso

  • Vaisrayele va nghene ekhombyeni lerikulu hi ndlela yihi naswona ha yini?
  • Ha yini Yehovha a byele Gidiyoni leswaku u ni vavanuna vo tala swinene evuthwini ra yena?
  • Xana ku sale vavanuna vangani endzhaku ka loko Gidiyoni a byele vavanuna lava chavaka leswaku va tlhelela ekaya?
  • Hi ku tirhisa xifaniso lexi, hlamusela ndlela leyi Yehovha a ri hunguteke ha yona vuthu ra Gidiyoni ri va vavanuna va 300 ntsena.
  • Xana Gidiyoni u va hlele njhani vavanuna va yena va 300, naswona Vaisrayele va hlule njhani enyimpini?

Swivutiso swo engetela

  • Hlaya Vaavanyisi 6:36-40.

    Xana Gidiyoni u endle yini leswaku a tiyiseka hi ku rhandza ka Yehovha?

    Xana namuntlha hi nga ku tiva njhani ku rhandza ka Yehovha?

  • Hlaya Vaavanyisi 7:1-25.

    Hi dyondza yini eka vavanuna va 300 lava tshameke va xalamukile ku hambana ni lava kombiseke ku nga khathali?

    Hilaha vavanuna va 300 va dyondzeke hakona hi ku languta Gidiyoni, xana hina hi nga dyondza njhani hi ku languta Gidiyoni Lonkulu, Yesu Kreste?

    Xana Vaavanyisi 7:21 yi hi pfuna njhani leswaku hi eneriseka hi ku tirha kun’wana ni kun’wana laha hi averiweke kona enhlengeletanweni ya Yehovha?

  • Hlaya Vaavanyisi 8:1-3.

    Loko swi ta emhakeni ya ku lulamisa swiphiqo ni makwerhu wa xinuna kumbe wa xisati, xana hi nga dyondza yini eka ndlela leyi Gidiyoni a lulamiseke mholovo ha yona ni Vaefrayimi?