Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 51: Rhuti Na Nawomi

Dyondzo 51: Rhuti Na Nawomi

EBibeleni u ta kuma buku leyi vitaniwaka Rhuti. Yi vulavula hi ndyangu lowu hanyeke eminkarhini leyi Vaisrayele a va ri ni vaavanyisi. Rhuti a a ri nhwanyana la humaka etikweni ra Mowabu; a a nga weli eka rixaka ra Xikwembu ra Vaisrayele. Kambe loko Rhuti a dyondze hi ta Yehovha, Xikwembu xa ntiyiso, u sungule ku n’wi rhandza swinene. Nawomi i mukhegula la pfuneke Rhuti leswaku a dyondza hi Yehovha.

Nawomi i wansati wa Muisrayele. Yena ni nuna wakwe swin’we ni vana vakwe vambirhi va majaha va rhurhele etikweni ra Mowabu enkarhini lowu a ku nga ri na swakudya eIsrayele. Kutani siku rin’wana nuna wa Nawomi u file. Endzhakunyana majaha ya Nawomi ma teke vanhwanyana va Mowabu ku nga Rhuti na Orpa. Kambe endzhaku ka khume ra malembe, majaha ya Nawomi ma file. Nawomi ni vanhwanyana lavaya vambirhi va twe ku vava ngopfu! Xana Nawomi a a ta endla yini enkarhini wolowo?

Siku rin’wana Nawomi u endle xiboho xo teka riendzo ro leha a tlhelela ekaya laha ku nga ni vanhu va ka vona. Rhuti na Orpa a va lava ku tshama na yena, kutani va fambe na yena. Kambe endzhaku ka loko va fambe mpfhukanyana, Nawomi u hundzuluke a va languta kutani a ku: ‘Tlhelelani ekaya mi ya tshama ni vamana wa n’wina.’

Nawomi u va ntswontswile kutani a va lela. Va sungule ku rila hikuva a va n’wi rhandza swinene Nawomi. Va te: ‘E-e! Hi ta famba na wena eka vanhu va ka n’wina.’ Kambe Nawomi u hlamule a ku: ‘Tlhelani, vana vanga. Swi ta antswa loko mi ri ekaya.’ Hiloko Orpa a nghena endleleni a tlhelela ekaya. Kambe Rhuti a nga tlhelanga.

Nawomi u hundzulukele eka yena kutani a ku: ‘Orpa u fambile. Na wena muka na yena.’ Kambe Rhuti u hlamule a ku: ‘U nga ndzi kombeli leswaku ndzi ku tshika! Ndzi tshike ndzi famba na wena. Laha u yaka kona, ndzi ta ya kona, naswona laha u tshamaka kona, ndzi ta tshama kona. Vanhu va wena va ta va vanhu va mina, Xikwembu xa wena xi ta va Xikwembu xa mina. Laha u nga ta fela kona, ndzi ta fela kona, hi kona laha ndzi nga ta lahliwa kona.’ Loko Rhuti a heta ku vula marito lawa, Nawomi a nga ha ringetanga ku n’wi tlherisa.

Eku heteleleni vavasati lavambirhi va fike eIsrayele. Kwalaho va kume ndhawu yo tshama. Rhuti u sungule ku tirha emasin’wini, hikuva a ku ri nkarhi wo tshovela maxalana. Wanuna la vuriwaka Bowasi u n’wi pfumelerile leswaku a tshovela emasin’wini ya yena. Xana wa n’wi tiva mana wa Bowasi? A ku ri Rahava wa le mutini wa Yeriko.

Siku rin’wana Bowasi u byele Rhuti a ku: ‘Ndzi twe hinkwato hi ta wena, ni tintswalo leti u tikombiseke Nawomi. Ndza yi tiva ndlela leyi u sukeleke tata wa wena ni mana wa wena swin’we ni tiko ra ka n’wina ha yona u ya evanhwini lava a wu nga va tivi. Onge Yehovha a nga ku katekisa!’

Rhuti u hlamule a ku: ‘Hakunene u ndzi kombe tintswalo hosi yanga. U ndzi chavelerile hi ndlela leyinene leyi u vulavuleke na mina ha yona.’ Bowasi a a n’wi rhandza ngopfu Rhuti, naswona a swi tekanga nkarhi wo leha va nga si tekana. Mawaku ndlela leyi swi n’wi tsakiseke ha yona Nawomi! Kambe Nawomi u tsakisiwe ngopfu hiloko Rhuti na Bowasi va kuma n’wana wa vona wa mativula, la thyiweke vito ra Obede. Hi ku famba ka nkarhi Obede u ve kokwa wa Davhida, loyi hi nga ta dyondza swo tala hi yena

Rhuti na Nawomi

Buku ya Bibele ya Rhuti.



Swivutiso

  • Swi tise ku yini leswaku Nawomi a tikuma a ri etikweni ra Mowabu?
  • Xana Rhuti na Orpa i vamani?
  • Xana Rhuti na Orpa va te yini loko Nawomi a va byela leswaku va tlhelela eka vanhu va ka vona?
  • Bowasi a a ri mani, naswona u n’wi pfune njhani Rhuti na Nawomi?
  • I mani vito ra n’wana wa Bowasi na Rhuti, naswona ha yini hi fanele hi n’wi tsundzuka?

Swivutiso swo engetela

  • Hlaya Rhuti 1:1-17.

    Hi wahi marito lama kombisaka rirhandzu ra ntiyiso lawa Rhuti a ma vuleke?

    Xana langutelo ra Rhuti ri ri kombisa njhani langutelo leri “tinyimpfu tin’wana” ti nga na rona hi vatotiwa lava nga emisaveni namuntlha?

  • Hlaya Rhuti 2:1-23.

    Xana Rhuti u va vekela njhani xikombiso lexinene vanhwanyana va namuntlha?

  • Hlaya Rhuti 3:5-13.

    Xana Bowasi u ku langute njhani ku tiyimisela ka Rhuti ku tekana na yena ematshan’weni yo tekiwa hi jaha ro karhi?

    Langutelo ra Rhuti ri hi dyondzisa yini malunghana ni rirhandzu ra ntiyiso?

  • Hlaya Rhuti 4:7-17.

    Xana vavanuna lava nga Vakreste va nga n’wi tekelela njhani Bowasi namuntlha?

DYONDZA SWO TALA

TIMHAKA TA BIBELE LETI NGA NI SWIFANISO

Rhuti I Munghana Wo Tshembeka

Hambileswi a nga ri Muisrayele ku tshembeka kakwe swi endle leswaku a rhandziwa hi Yehovha naswona swi n’wi tisele mikateko.