Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 50: Vavasati Vambirhi Lava Nga Ni Xivindzi

Dyondzo 50: Vavasati Vambirhi Lava Nga Ni Xivindzi

Loko Vaisrayele va ri ekhombyeni, va kombele mpfuno eka Yehovha. Yehovha u hlamule xirilo xa vona hi ku va nyika varhangeri vo tlhariha leswaku va va pfuna. Bibele yi vula leswaku varhangeri lava a ku ri vaavanyisi. Yoxuwa a a ri muavanyisi wo sungula, naswona vaavanyisi van’wana lava n’wi landzeleke i Otiniyele, Ehudi na Xamugari. Kambe vanhu van’wana vambirhi lava pfuneke Vaisrayele i vavasati lava vuriwaka Debora na Yayele.

Debora a vulavula na Baraka

Debora a a ri muprofeta. Yehovha a a n’wi nyika rungula ra timhaka ta nkarhi lowu taka, kutani yena a a byela vanhu leswi Yehovha a swi vuleke. Hi hala tlhelo Debora a a ri muavanyisi. A a tshama ehansi ka murhi wun’wana wa ncindzu exintshabyanini, naswona vanhu a va ya eka yena va ya lava ku pfuniwa hi swiphiqo swa vona.

Enkarhini wolowo hosi ya Vakanana a ku ri Yabini. A a ri ni makalichi ya nyimpi ya 900. Vuthu rakwe a ri ri ni matimba lerova Vaisrayele vo tala a va boheka ku va mahlonga ya Yabini. Murhangeri-nkulu wa vuthu ra Yabini a ku ri Sisera.

Siku rin’wana Debora u byele Muavanyisi Baraka a ku: ‘Yehovha u te: “Teka vavanuna va 10 000 kutani mi ya eNtshaveni ya Taboro. Kwalaho ndzi ta ku tisela Sisera. Naswona ndzi ta ku endla leswaku u n’wi hlula yena ni vuthu rakwe.”’

Baraka u byele Debora a ku: ‘Ndzi ta famba loko na wena wo famba na mina.’ Debora u fambe na yena, kambe u byele Baraka a ku: ‘A wu nge dzunisiwi hi ku hlula enyimpini, hikuva Yehovha u ta nyiketa Sisera evokweni ra wansati.’ Naswona swi ve tano.

Baraka u rhelele eNtshaveni ya Taboro a ya hlangana ni masocha ya Sisera. Hiloko Yehovha a vanga ndhambi kutani masocha yo tala ya valala ma nwela ematini. Kambe Sisera u chike ekalichini a tsutsuma.

Baraka, Yayele na Sisera

Endzhakunyana Sisera u fike etendeni ra Yayele. U n’wi nghenisile kutani a n’wi nyika ntswamba. Sweswo swi endle leswaku a khudzehela, ku nga ri kungani a a etlele. Hiloko Yayele a teka mhingu ya tende a yi belela enhlokweni ya wanuna loyi wo biha. Endzhakunyana loko Baraka a fika, u n’wi kombe ntsumbu wa Sisera! Kutani wa swi vona leswaku leswi Debora a swi vuleke swi ve ntiyiso.

Eku heteleleni Hosi Yabini na yena u dlayiwile, naswona Vaisrayele va tlhele va va ni ku rhula swa xinkarhana.

Vaavanyisi 2:14-22; 4:1-24; 5:1-31.



Swivutiso

  • Vaavanyisi a ku ri vamani, naswona a ku ri vamani mavito ya van’wana va vona?
  • Hi rihi lunghelo ro hlawuleka leri Debora a a ri na rona, naswona a ri katsa yini?
  • Loko Vaisrayele va xungetiwa hi Hosi Yabini ni murhangeri wa vuthu rakwe, ku nga Sisera, hi rihi rungula leri humaka eka Yehovha leri Debora a ri byeleke Muavanyisi Baraka, naswona i mani loyi Debora a nga te u ta hlula?
  • Xana Yayele u swi kombise njhani leswaku i wansati la nga ni xivindzi?
  • Ku humelele yini endzhaku ka ku fa ka Hosi Yabini?

Swivutiso swo engetela

  • Hlaya Vaavanyisi 2:14-22.

    Xana Vaisrayele va endle yini leswi endleke leswaku Yehovha a va hlundzukela, naswona hi nga dyondza yini eka leswi?

  • Hlaya Vaavanyisi 4:1-24.

    Hi yihi dyondzo leyi vavasati va Vakreste namuntlha va nga yi kumaka malunghana ni ripfumelo ni xivindzi leswi kombisiweke hi Debora na Yayele?

  • Hlaya Vaavanyisi 5:1-31.

    Xana risimu ra ku hlula ra Baraka na Debora ri nga tirhisiwa njhani tanihi xikhongelo malunghana ni nyimpi leyi taka ya Har-Magedoni?