Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 49: Dyambu Ri Yima

Dyondzo 49: Dyambu Ri Yima

Vona Yoxuwa. U vulavule a ku: ‘Dyambu, yima!’ Kutani dyambu ra yima. Ri yime exikarhi ka matilo siku hinkwaro. I Yehovha loyi a endleke leswaku ri yima! Kambe a hi voneni leswaku ha yini Yoxuwa a a lava leswaku dyambu ri yima.

Dyambu

Loko tihosi leto homboloka etikweni ra Kanana ti sungule ku lwa ni Vagibiyoni, Vagibiyoni va rhumele wanuna un’wana leswaku a ya kombela mpfuno eka Yoxuwa. U te: ‘Tana hi ku hatlisa! Hi ponise! Tihosi hinkwato leti tshamaka endhawini ya le tintshaveni ti tile ku ta lwa ni malandza ya wena.’

Hiloko Yoxuwa ni vavanuna va yena hinkwavo va nyimpi va famba. Va fambe vusiku hinkwabyo. Loko va fika eGibiyoni, masocha ya tihosi ta ntlhanu ma chuhile kutani ma sungula ku baleka. Hiloko Yehovha a nisa xihangu lexikulu, naswona ma tele masocha lama dlayiweke hi xihangu ku tlula lama dlayiweke hi vavanuna va Yoxuwa va nyimpi.

Yoxuwa

Yoxuwa se a a swi vona leswaku dyambu ri le kusuhi ni ku pela. A ku ta va munyama naswona masocha yo tala ya tihosi leto biha ta ntlhanu a ma ta baleka. Hi yona mhaka leyi Yoxuwa a khongeleke eka Yehovha a ku: ‘Dyambu, yima!’ Kutani loko dyambu ri yimile, Vaisrayele va kote ku hlula enyimpini.

A ku ri ni tihosi to tala eKanana leti a ti venga vanhu va Xikwembu. Yoxuwa ni vuthu rakwe va hete malembe ya tsevu ku hlula tihosi ta 31 etikweni rero. Loko se va ti hlurile, Yoxuwa u endle leswaku tinyimba leti a ti nga si kuma ndzhaka ti averiwa ndhawu ya tona etikweni ra Kanana.

Ku hundze malembe yo tala, kutani Yoxuwa a fa a ri ni malembe ya 110. Loko yena ni vanghana vakwe va ha hanya, vanhu a va yingisa Yehovha. Kambe loko vanhu volavo lavanene va fa, vanhu va sungule ku endla swilo swo biha, va wela ekhombyeni. Hakunene enkarhini wolowo a va lava mpfuno wa Xikwembu.

Yoxuwa 10:6-15; 12:7-24; 14:1-5; Vaavanyisi 2:8-13.



Swivutiso

  • Exifanisweni lexi, xana Yoxuwa u ri yini, naswona ha yini?
  • Xana Yehovha u n’wi pfune njhani Yoxuwa ni vavanuna va yena va nyimpi?
  • I tingani tihosi leti hluriweke hi Yoxuwa leti a ti ri valala vakwe, naswona swi teke nkarhi wo tanihi kwihi?
  • Ha yini Yoxuwa a ave tiko ra Kanana?
  • Xana Yoxuwa u fe a ri ni malembe mangani, naswona endzhaku ka sweswo vanhu va endle yini?

Swivutiso swo engetela

  • Hlaya Yoxuwa 10:6-15.

    Hi ku tiva leswaku Yehovha u yimisele Vaisrayele dyambu ni n’weti, hi wihi ntshembo lowu hi vaka na wona namuntlha?

  • Hlaya Yoxuwa 12:7-24.

    Kahle-kahle i mani la hluleke tihosi ta 31 eKanana, naswona ha yini mhaka leyi yi ri ya nkoka eka hina namuntlha?

  • Hlaya Yoxuwa 14:1-5.

    Xana tiko ri aviwe njhani exikarhi ka tinyimba ta Israyele, naswona mhaka leyi yi kombisa yini malunghana ni ndzhaka ya le Paradeyisini?

  • Hlaya Yoxuwa 2:8-13.

    Ku fana na Yoxuwa eIsrayele, i vamani namuntlha va jamelaneke ni vagwinehi?