Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 48: Vagibiyoni Vo Tlhariha

Dyondzo 48: Vagibiyoni Vo Tlhariha

Miti yo tala ya le Kanana se a yi ti lunghiselele ku lwa na Israyele. A yi ehleketa leswaku yi nga hlula. Kambe vanhu va le mutini wa le kusuhi wa Gibiyoni a va nga swi vonisi sweswo. A va tshemba leswaku Xikwembu xi pfuna Vaisrayele, naswona a va nga swi lavi ku lwa ni Xikwembu. Xana wa swi tiva leswaku Vagibiyoni va endle yini?

Va endle xiboho xo tiendla onge va tshama etikweni ra le kule swinene. Kutani vavanuna van’wana va ambale tinguvu to hlakala ni maphaxani yo handzuka. Va rhwexa timbhongolo ta vona masaka yo boxeka, kutani va teka ni swinkwa swo oma. Hiloko va ya eka Yoxuwa kutani va ku: ‘Hi huma etikweni ra le kule, hikuva hi twile hi ta Xikwembu xa n’wina lexikulu, Yehovha. Hi twile hi ta hinkwaswo leswi a mi endleleke swona aEgipta. Hikwalaho vakulukumba va hina va hi byele leswaku hi longa swakudya hi tilunghiselela riendzo hi ta mi byela hi ku: “Hi malandza ya n’wina. Hi tshembiseni leswaku a mi nge lwi na hina.” Ma swi vona na n’wina leswaku swiambalo swa hina swi handzukerile hikwalaho ka leswi hi fambeke riendzo ro leha ni xinkwa xa hina i xa khale naswona se xi omile.’

Yoxuwa ni varhangeri lavan’wana va tshembe Vagibiyoni volavo. Kutani va endle ntwanano leswaku a va nge lwi na vona. Kambe endzhaku ka masiku manharhu va kume leswaku Vagibiyoni a va humi kule.

Yoxuwa u va vutise a ku: ‘Ha yini mi hi byele leswaku mi huma etikweni ra le kule?’

Vagibiyoni va hlamule va ku: ‘Hi endle tano hileswi hi byeriweke leswaku Yehovha Xikwembu xa n’wina u tshembise ku mi nyika tiko ra Kanana hinkwaro. Kutani a hi chava leswaku mi ta hi dlaya.’ Kambe Vaisrayele va hlayise xitshembiso xa vona naswona a va va dlayanga Vagibiyoni. Ematshan’weni ya sweswo, va va endle mahlonga ya vona.

Hosi ya le Yerusalema yi hlundzuke ngopfu hikwalaho ka leswi Vagibiyoni va endleke ku rhula ni Vaisrayele. Hiloko yi byela tihosi letin’wana ta mune yi ku: ‘Tanani mi ta ndzi pfuna ku hlasela Gibiyoni.’ Kutani tihosi leti ta ntlhanu ti endle tano. Xana Vagibiyoni a va tlharihile hi ku endla ku rhula na Israyele, tanihi leswi sweswo swi endleke leswaku tihosi leti ti va hlasela? Hi ta swi vona.

Yoxuwa 9:1-27; 10:1-5.

Yoxuwa ni Vagibiyoni


Swivutiso

  • Xana vanhu va le Gibiyoni a va hambane njhani ni Vakanana va le mitini ya le kusuhi?
  • Hilaha swi kombisiweke hakona exifanisweni lexi, xana Vagibiyoni va endle yini, naswona ha yini?
  • Xana Yoxuwa ni varhangeri va Vaisrayele va va tshembise yini Vagibiyoni, kambe i yini lexi va xi kumeke endzhaku ka masiku manharhu?
  • Xana ku humelele yini loko tihosi ta le mitini yin’wana ti twa leswaku Vagibiyoni va endle ku rhula ni Vaisrayele?

Swivutiso swo engetela

  • Hlaya Yoxuwa 9:1-27.

    Leswi Yehovha a a byele tiko ra Israyele leswaku ri “lovisa vaaki hinkwavo va tiko,” ku tsetseleriwa ka Vagibiyoni ku kombise timfanelo takwe tihi?

    Xana Yoxuwa u xi veke njhani xikombiso lexinene eka Vakreste namuntlha hi ku namarhela ntwanano lowu a wu endleke ni Vagibiyoni?

  • Hlaya Yoxuwa 10:1-5.

    Xana ntshungu lowukulu namuntlha wu va tekelela njhani Vagibiyoni, naswona hi ku endla tano wu va valala va mani?