Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 46: Makhumbi Ya Yeriko

Dyondzo 46: Makhumbi Ya Yeriko

I yini lexi endleke leswaku makhumbi ya Yeriko ma wa? Swi vonaka onge ma biwe hi bomo leyikulu. Kambe eminkarhini yoleyo a ku nga ri na tibomo; hambi ku ri swibamu a va nga ri na swona. A ku ri singita rin’wana ra Yehovha! A hi kumeni leswaku swi endlekise ku yini.

Makhumbi ya Yeriko ma ri karhi ma wa

Twana leswi Yehovha a swi byeleke Yoxuwa: ‘Wena ni vavanuna va wena va nyimpi mi fanele ku macha mi rhendzela muti. Mi fanele ku macha mi wu rhendzela kan’we hi siku ku ringana masiku ya tsevu. Mi fanele mi swi endla mi rhwele areka ya ntwanano. Vaprista va nkombo va fanele ku famba emahlweni ka yona va ri karhi va yimba tinanga.

‘Hi siku ra vunkombo mi fanele mi macha mi rhendzela muti ka nkombo. Kutani yimbani tinanga ivi un’wana ni un’wana a ba hungwe ra nyimpi leyikulu. Naswona makhumbi ma ta mbundzumuka!’

Yoxuwa ni vanhu vakwe va endle leswi Yehovha a swi vuleke. Loko va ha macha, un’wana ni un’wana a a miyerile. A va lo whii! Leswi a swi twala a ku ri mpfumawulo wa tinanga ni wa ku macha ntsena. Valala va vanhu va Xikwembu eYeriko a va chuhile. Xana wa yi vona ntambhu liya yo tshwuka leyi lengaka efasitereni? I fasitere ra mani leriya? Ina, Rahava u endle leswi tinhlori timbirhi ti n’wi byeleke swona. Vandyangu wakwe hinkwavo va na yena, va langute leswi humelelaka.

Yoxuwa

Eku heteleleni, hi siku ra vunkombo, endzhaku ko macha va rhendzela muti ka nkombo, ku biwe tinanga, vavanuna va nyimpi va huwelerile kutani makhumbi ma mbundzumuka. Hiloko Yoxuwa a ku: ‘Dlayani un’wana ni un’wana emutini mi tlhela mi wu hisa. Hisani hinkwaswo. Mi fanele mi hlayisa ntsena silivhere, nsuku, koporo ni nsimbi kutani mi swi hoxa evuhlayiselweni bya xuma lebyi nga etendeni ra Yehovha.’

Yoxuwa u byele tinhlori letiya timbirhi a ku: ‘Yanani endlwini ya Rahava kutani mi vuya na yena swin’we ni vandyangu wakwe.’ Rahava ni ndyangu wakwe va ponile, hilaha tinhlori ti n’wi tshembiseke hakona.

Yoxuwa 6:1-25.



Swivutiso

  • Xana Yehovha u byele vavanuna va nyimpi ni vaprista leswaku va endla yini ku ringana masiku ya tsevu?
  • Xana vavanuna a va fanele va endla yini hi siku ra vunkombo?
  • Hilaha u swi vonaka hakona exifanisweni, xana ku humelela yini hi makhumbi ya Yeriko?
  • Ha yini ku ri ni ntambhu yo tshwuka leyi lengalengaka efasitereni?
  • Xana Yoxuwa u byele vavanuna va nyimpi leswaku va va endla yini vanhu swin’we ni muti, kambe ku vuriwa yini hi silivhere, nsuku, koporo ni nsimbi?
  • Xana vakamberi vambirhi va byeriwe ku endla yini?

Swivutiso swo engetela

  • Hlaya Yoxuwa 6:1-25.

    Xana ku macha ka Vaisrayele va rhendzela Yeriko hi siku ra vunkombo ku fana njhani ni ntirho wo chumayela wa Timbhoni ta Yehovha emasikwini lawa ya makumu?

    Xana vuprofeta lebyi rhekhodiweke eka Yoxuwa 6:26 byi hetiseke njhani emalembeni ya kwalomu ka 500 lama landzeleke, naswona leswi swi hi dyondzisa yini hi rito ra Yehovha?

DYONDZA SWO TALA

Rahava A Yingisa Swiletelo

Ndyangu wun’wana wu ponile loko marhangu ya muti wa Yeriko ma wa.