Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 45: Ta Ku Pela Nambu Wa Yordani

Dyondzo 45: Ta Ku Pela Nambu Wa Yordani

Waswivo! Vaisrayele va pela Nambu wa Yordani! Kambe, a ma ri kwihi mati? Tanihi leswi enkarhini wolowo wa lembe a ku na timpfula to tala, nambu a wa ha ku tala. Kambe loko va pela nambu, mati wolawo hinkwawo a ma phyile! Kutani Vaisrayele va tsemakanye hi le ndhawini leyi omeke hilaha va endleke hakona eLwandle ro Tshwuka! Xana a ma ye kwihi mati wolawo hinkwawo? A hi voneni.

Vaisrayele va tsemakanya Nambu wa Yordani

Loko ku fike nkarhi wa leswaku Vaisrayele va pela Nambu wa Yordani, hi lawa marito lawa Yehovha a ma byeleke Yoxuwa leswaku a ma tivisa vanhu: ‘Vaprista va fanele va teka areka ya ntwanano va famba emahlweni ka hina. Loko va kandziya mati ya Nambu wa Yordani, mati ma ta yima.’

Hiloko vaprista va rhwala areka ya ntwanano va famba emahlweni ka vanhu. Loko va fika eYordani, vaprista va kandziye mati. Mati a ma khuluka hi matimba naswona a ma entile. Kambe loko va ma kandziya, ma yime hi ku hatlisa! A ku ri singita! Yehovha a a yimise mati lomu a ma ta ha kona. Ku nga ri kungani mati a ma phyile enambyeni!

Vaprista lava a va rhwale areka ya ntwanano va fambe endhawini leyi omeke enambyeni. Xana wa va vona laha xifanisweni? Loko va yime kwalaho, Vaisrayele hinkwavo va tsemakanye Nambu wa Yordani endhawini leyi omeke!

Loko se va helerile, Yehovha u byele Yoxuwa leswaku a byela vavanuna va matimba va 12, a ku: ‘Yanani enambyeni laha vaprista va yimeke kona ni areka ya ntwanano. Tekani maribye ya 12 mi wa fumba laha mi nga ta etlela kona madyambu ya namuntlha. Kutani enkarhini lowu taka, loko vana va n’wina va mi vutisa leswaku maribye lawa ma vula yini, mi fanele ku va byela leswaku mati ma yimile loko areka ya ntwanano ya Yehovha yi tsemakanya Yordani. Maribye lawa ma ta mi tsundzuxa hi ta singita leri!’ Yoxuwa na yena u teke maribye ya 12 laha vaprista a va yime kona eribuweni ra nambu.

Yoxuwa

Eku heteleleni Yoxuwa u byele vaprista lava a va rhwale areka ya ntwanano a ku: ‘Tlhandlukani mi huma eYordani.’ Kutani loko va heta ku huma, nambu wu tlhele wu sungula ku khuluka.

Yoxuwa 3:1-17; 4:1-18.



Swivutiso

  • Hi rihi singita leri endliweke hi Yehovha leswaku Vaisrayele va kota ku pela Nambu wa Yordani?
  • Vaisrayele a va fanele va endla yini ku kombisa leswaku va ni ripfumelo leswaku va ta kota ku pela Nambu wa Yordani?
  • Ha yini Yehovha a byele Yoxuwa leswaku a hlengeleta maribye ya 12 lamakulu eribuweni ra nambu?
  • Ku humelele yini loko vaprista va humile eYordani?

Swivutiso swo engetela

  • Hlaya Yoxuwa 3:1-17.

    Hilaha swi kombisiweke hakona emhakeni leyi, xana hi fanele ku endla yini leswaku Yehovha a hi pfuna ni ku hi katekisa?

    Xana xiyimo a xi ri njhani eNambyeni wa Yordani loko Vaisrayele va pelela eTikweni leri Tshembisiweke, naswona sweswo swi ri tlakuse njhani vito ra Yehovha?

  • Hlaya Yoxuwa 4:1-18.

    Maribye ya 12 lama tekiweke eYordani ma ya vekiwa eGiligala a ma tirha yini?