Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 44: Rahava A Tumbeta Tinhlori

Dyondzo 44: Rahava A Tumbeta Tinhlori

Vavanuna lava a va ri khombyeni. A va fanele ku baleka, loko swi nga ri tano, a va ta dlayiwa. A va ri tinhlori ta Vaisrayele naswona wansati loyi a va pfunaka a ku ri Rahava. Rahava a a tshama endlwini leyi nga erirhangwini ra muti wa Yeriko. A hi voneni leswaku ha yini vavanuna lava a va ri ekhombyeni.

Vaisrayele se a va lunghekele ku pela Nambu wa Yordani va ya etikweni ra Kanana. Kambe loko va nga si endla tano, Yoxuwa u rhumele tinhlori timbirhi. U ti byele a ku: ‘Fambani mi ya kambela tiko ni muti wa Yeriko.’

Rahava ni tinhlori timbirhi ta Vaisrayele

Loko tinhlori ti fika eYeriko, ti kongome endlwini ya Rahava. Kambe munhu un’wana u byele hosi ya Yeriko a ku: ‘Vavanuna vambirhi va Vaisrayele va te laha nivusiku va ta kambela tiko.’ Loko hosi yi twa sweswo, yi rhumele vavanuna eka Rahava, kutani va fike va n’wi lerisa va ku: ‘Humesa vavanuna lava ngheneke endlwini ya wena!’ Kambe Rahava a a tumbete tinhlori leti elwangwini ra yindlu yakwe. Hiloko a ku eka vona: ‘Vavanuna van’wana va tile eka mina, kambe a ndzi tivi lomu a va huma kona. Va fambile loko ri phumela ni nyangwa ya muti yi nga si pfariwa. Loko mo hatlisa, mi nga va kuma!’ Kutani vavanuna volavo va va sale ndzhaku.

Endzhaku ka loko va humile, Rahava u tsutsumele elwangwini. U byele tinhlori a ku: ‘Ndza swi tiva leswaku Yehovha u ta mi nyika tiko leri. Hi yi twile ndlela leyi a omiseke Lwandle ro Tshwuka ha yona loko mi huma aEgipta, ni ndlela leyi mi dlayeke ha yona hosi Sihoni na hosi Ogo. Ndzi mi kombe tintswalo, ndzi kombela mi ndzi tshembisa leswaku na mina mi ta ndzi kombisa musa. Ndzi kombela mi ponisa tatana na manana swin’we ni vamakwerhu va xinuna ni va xisati.’

Tinhlori ti tshembise leswaku ti ta endla tano, kambe Rahava a a fanele a endla swin’wana. Tinhlori leti ti te: ‘Teka ntambhu leyi yo tshwuka u yi bohelela efasitereni ra wena kutani u vitana maxaka ya wena hinkwawo ma ta endlwini ya wena. Kutani loko hi vuya ku ta teka Yeriko, hi ta vona ntambhu leyi efasitereni ra wena, xisweswo a hi nge dlayi munhu endlwini ya wena.’ Loko tinhlori ti tlhelela eka Yoxuwa, ti n’wi byele hinkwaswo leswi humeleleke.

Yoxuwa 2:1-24; Vaheveru 11:31.



Swivutiso

  • Xana Rahava u tshama kwihi?
  • I vamani vavanuna lavambirhi lava nga exifanisweni, naswona ha yini va ri eYeriko?
  • Xana hosi ya le Yeriko yi lerise Rahava leswaku a endla yini, naswona u hlamule a ku yini?
  • Xana Rahava u va pfune njhani vavanuna lavambirhi, naswona i yini leswi a swi kombeleke eka vona?
  • Xana vakamberi lavambirhi va n’wi tshembise yini Rahava?

Swivutiso swo engetela

  • Hlaya Yoxuwa 2:1-24.

    Xana xitshembiso xa Yehovha lexi rhekhodiweke eka Eksoda 23:28 xi hetiseke njhani loko Vaisrayele va fika ekusuhi ni muti wa Yeriko?

  • Hlaya Vaheveru 11:31.

    Xana xikombiso xa Rahava xi wu kandziyisa njhani nkoka wa ku va ni ripfumelo?

DYONDZA SWO TALA

Rahava A A Pfumela Eka Yehovha

Dyondza ndlela leyi Rahava ni ndyangu wakwe va ponisiweke ha yona loko muti wa Yeriko wu lovisiwa.

Rahava U ‘Vuriwe La Lulameke Hikwalaho Ka Mintirho’

Xana rungula ra Rahava ri swi kombisa njhani leswaku ku hava ni un’we wa hina loyi a nga riki wa nkoka eka Yehovha? Hi nga dyondza yini eka ripfumelo rakwe?